വിന്‍ഡീസിനെതിരെ രണ്ടാം ടി20 ഇന്ത്യക്ക് ടോസ് നഷ്ടം! ഹര്‍മന്‍പ്രീത് കൗര്‍ പുറക്ക്, സജന സജീവന്‍ തുടരും

ഒരു മാറ്റവുമായിട്ടാണ് ഇന്ത്യ ഇറങ്ങുന്നത്. ക്യാപ്റ്റന്‍ ഹര്‍മന്‍പ്രീത് കൗര്‍ പരിക്കിനെ തുടര്‍ന്ന് ഇന്ന് കളിക്കുന്നില്ല.

നവി മുംബൈ: വെസ്റ്റ് ഇന്‍ഡീസ് വനിതകള്‍ക്കെതിരായ രണ്ടാം ടി20യില്‍ ഇന്ത്യന്‍ വനിതകള്‍ ആദ്യം ബാറ്റ് ചെയ്യും. നവി മുംബൈ ഡിവൈ പാട്ടീല്‍ ക്രിക്കറ്റ് സ്റ്റേഡിയത്തില്‍ ടോസ് നേടിയ വിന്‍ഡീസ് ക്യാപ്റ്റന്‍ ഹെയ്‌ലി മാത്യൂസ് ബൗളിംഗ് തിരഞ്ഞെടുക്കുകയായിരുന്നു. ഒരു മാറ്റവുമായിട്ടാണ് ഇന്ത്യ ഇറങ്ങുന്നത്. ക്യാപ്റ്റന്‍ ഹര്‍മന്‍പ്രീത് കൗര്‍ പരിക്കിനെ തുടര്‍ന്ന് ഇന്ന് കളിക്കുന്നില്ല. പകരം രാഘ്‌വി ബിസ്റ്റ് ടീമിലെത്തി. ഇന്ത്യ എയ്ക്ക് വേണ്ടി മിന്നുന്ന പ്രകടനം പുറത്തെടുത്ത 20കാരിയുടെ അരങ്ങേറ്റം കൂടിയാണിന്ന്. മലയാളി താരം സജന സജീവന്‍ പ്ലേയിംഗ് ഇലവനില്‍ സ്ഥാനം നിലനിര്‍ത്തി. മറ്റൊരു താരം മിന്നു മണിക്ക് ഇന്നും അവസരം ലഭിച്ചില്ല. മത്സരം സ്പോര്‍ട്സ് 18യില്‍ തത്സമയം കാണാം. മൊബൈല്‍ ഉപയോക്താക്കള്‍ക്ക് ജിയോ സിനിമയിലും കാണാം. ഇരു ടീമുകളുടേയും പ്ലേയിംഗ് ഇലവന്‍ അറിയാം.

വെസ്റ്റ് ഇന്‍ഡീസ്: ഹെയ്ലി മാത്യൂസ് (ക്യാപ്റ്റന്‍), ക്വാന ജോസഫ്, ഷെമൈന്‍ കാംബെല്ലെ (വിക്കറ്റ് കീപ്പര്‍), ഡിയാന്ദ്ര ഡോട്ടിന്‍, ചിനെല്ലെ ഹെന്റി, നെറിസ ക്രാഫ്റ്റണ്‍, ഷാബിക ഗജ്നബി, സൈദ ജെയിംസ്, അഷ്മിനി മുനിസാര്‍, അഫി ഫ്‌ലെച്ചര്‍, കരിഷ്മ റാംഹരക്ക്.

ഇന്ത്യ: സ്മൃതി മന്ദാന (ക്യാപ്റ്റന്‍), ഉമാ ചേത്രി, ജെമീമ റോഡ്രിഗസ്, റിച്ച ഘോഷ് (വിക്കറ്റ് കീപ്പര്‍), രാഘ്‌വി ബിസ്റ്റ്, സജീവന്‍ സജന, ദീപ്തി ശര്‍മ, രാധാ യാദവ്, സൈമ താക്കൂര്‍, ടിറ്റാസ് സാധു, രേണുക താക്കൂര്‍ സിംഗ്. 

ആദ്യ മത്സരം ജയിച്ച ഇന്ത്യ മൂന്ന് ടി20കളുള്ള പരമ്പരയില്‍ 1-0ത്തിന് മുന്നിലാണ്. ടി20യ്ക്ക് ശേഷം ഏകദിന പരമ്പരയില്‍ ഇരുവരും കളിക്കും. മൂന്ന് ഏകദിനങ്ങളാണുള്ളത്. ടി20 മത്സരങ്ങള്‍ നവി മുംബൈ, ഡി വൈ പാട്ടീല്‍ സ്റ്റേഡിയത്തിലും ഏകദിനങ്ങള്‍ വഡോദരയിലുമാണ് നടക്കുക. മൂന്നാം ടി20 9ന് നടക്കും. എല്ലാ മത്സരങ്ങളും വൈകിട്ട് ഏഴിന് ആരംഭിക്കും. ആദ്യ ഏകദിനം 22ന് ആരംഭിക്കും. 24ന് രണ്ടാം ഏകദിനവും 27 അവസാന ഏകദിനവും കളിക്കും. എല്ലാ മത്സരങ്ങളും ഉച്ചയ്ക്ക് 1.30നാണ്. 

15 അംഗ ടീമിനെയാണ് പ്രഖ്യാപിച്ചിരുന്നത്. മോശം ഫോമിലുള്ള ഓപ്പണര്‍ ഷെഫാലി വര്‍മയെ ഒരു ടീമിലേക്കും പരിഗണിച്ചിട്ടില്ല. ഷെഫാലി ഓസീസിനെതിരേയും കളിച്ചിരുന്നില്ല. അരുന്ധതി റെഡ്ഡിയും പുറത്തായി. പരിക്കിനെ തുടര്‍ന്ന് ശ്രേയങ്ക പാട്ടീല്‍, യഷ്ടിക ഭാട്ടിയ, പ്രിയ പൂനിയ എന്നിവരെ ടീമീലേക്ക് പരിഗണിച്ചില്ല. നന്ദിനി കശ്യപ്പ്, രാഘ്‌വി ബിഷ്ട് എന്നിവര്‍ ടി20 ടീമിലെ പുതുമുഖങ്ങളാണ്. പ്രതീക റാവല്‍ ഏകദിനത്തിലേക്കും ആദ്യ വിളിയെത്തി.