WI vs IND : സഹതാരങ്ങള് ബഹുദൂരം പിന്നില്; ഇതിലും നാണംകെട്ട റെക്കോര്ഡ് രോഹിത് ശര്മ്മയ്ക്ക് വരാനില്ല
Synopsis
രാജ്യാന്തര ടി20യില് ഏറ്റവും കൂടുതല് തവണ പൂജ്യത്തിന് പുറത്തായ ഇന്ത്യന് താരങ്ങളില് ഹിറ്റ്മാന് സഹതാരങ്ങളെ ബഹദൂരം പിന്നിലാക്കി
വാര്ണര് പാര്ക്ക്: വെസ്റ്റ് ഇന്ഡീസിന് എതിരായ രണ്ടാം ടി20യില്(WI vs IND 2nd T20I) ഗോള്ഡന് ഡക്കായതോടെ നാണക്കേടിന്റെ പടുകുഴിയില് ഇന്ത്യന് നായകന് രോഹിത് ശര്മ്മ(Rohit Sharma). രാജ്യാന്തര ടി20യില് ഏറ്റവും കൂടുതല് തവണ പൂജ്യത്തിന് പുറത്തായ ഇന്ത്യന് താരങ്ങളില് ഹിറ്റ്മാന് സഹതാരങ്ങളെ ബഹദൂരം പിന്നിലാക്കി. എട്ടാം തവണയാണ് അന്താരാഷ്ട്ര ടി20യില് രോഹിത് ശര്മ്മ പൂജ്യത്തില് മടങ്ങുന്നത്. നാല് തവണ പൂജ്യത്തില് പുറത്തായിട്ടുള്ള കെ എല് രാഹുലാണ്(KL Rahul) രണ്ടാമത്.
വിന്ഡീസ് ഒപ്പത്തിനൊപ്പം
ആവേശം അവസാന ഓവർ വരെ നീണ്ടെങ്കിലും ഇന്ത്യക്കെതിരെയുള്ള രണ്ടാം ടി20 അഞ്ച് വിക്കറ്റിന് ജയിച്ച് ആതിഥേയരായ വിൻഡീസ് പരമ്പരയിൽ ഒപ്പമെത്തി. ആവേശ് ഖാൻ എറിഞ്ഞ അവസാന ഓവറിൽ 10 റൺസായിരുന്നു വിൻഡീസിന് വിജയിക്കാന് വേണ്ടിയിരുന്നത്. എന്നാൽ ആദ്യ പന്തിൽ നോബോൾ എറിഞ്ഞ ആവേശ് രണ്ടാം പന്തിൽ സിക്സും തൊട്ടടുത്ത പന്തിൽ ഫോറും വഴങ്ങിയതോടെ വിൻഡീസ് സമ്മർദ്ദമില്ലാതെ ലക്ഷ്യത്തിലെത്തി. സ്കോർ: ഇന്ത്യ- 19.4 ഓവറിൽ 138. വിൻഡീസ്- 19.2 ഓവറിൽ 141/5. 52 പന്തിൽ 68 റൺസെടുത്ത ഓപ്പണർ ബ്രെൻഡൻ കിങ്ങും 19 പന്തിൽ 31 റൺസെടുത്ത ഡോവോൻ തോമസുമാണ് വിൻഡീസിനെ ജയിപ്പിച്ചത്. അവസാന ഓവറിൽ തകർത്തടിച്ച തോമസിന്റെ ഇന്നിങ്സ് നിർണായകമായി. അർഷ്ദീപ് സിംഗ്, രവീന്ദ്ര ജഡേജ, ആര് അശ്വിൻ, ഹാർദിക് പാണ്ഡ്യ, ആവേശ് ഖാൻ എന്നിവർ ഓരോ വിക്കറ്റ് വീഴ്ത്തി.
മക്കോയിയുടെ ആറ് വിക്കറ്റില് വീണ ഇന്ത്യ
നേരത്തെ ആദ്യം ബാറ്റ് ചെയ്ത ഇന്ത്യ 19.4 ഓവറിൽ 138 റൺസിന് എല്ലാവരും പുറത്താവുകയായിരുന്നു. നാലോവറിൽ വെറും 17 റൺസ് വഴങ്ങി ആറ് വിക്കറ്റ് വീഴ്ത്തിയ ഒബെദ് മക്കോയിയാണ് ഇന്ത്യയെ തകർത്തത്. 31 റൺസെടുത്ത ഹാർദിക് പാണ്ഡ്യയും 27 റൺസെടുത്ത രവീന്ദ്ര ജഡേജയും 24 റൺസെടുത്ത റിഷഭ് പന്തുമാണ് ഭേദപ്പെട്ട പ്രകടനം നടത്തിയത്. ക്യാപ്റ്റൻ രോഹിത് ശർമ്മ പൂജ്യത്തിന് പുറത്തായി. ഇന്ത്യ ഒരിക്കൽ പോലും മത്സരത്തിലേക്ക് തിരിച്ചുവരുമെന്ന പ്രതീതിയുണ്ടായില്ല. സൂര്യകുമാർ യാദവ്(11), ശ്രേയസ് അയ്യർ(10), ദിനേഷ് കാർത്തിക്(7) എന്നിവർ നിരാശപ്പെടുത്തി. രവിചന്ദ്ര അശ്വിൻ 10 റൺസെടുത്തു. വിൻഡീസിന് വേണ്ടി മക്കോയിയുടെ ആറിന് പുറമെ ജേസൻ ഹോൾഡർ രണ്ടും അൽസാരി ജോസഫ്, അക്കീൽ ഹൊസെയ്ൻ എന്നിവർ ഓരോ വിക്കറ്റും നേടി.
അവസാന ഓവറിൽ വിജയം പിടിച്ചെടുത്ത് വിൻഡീസ്; പരമ്പരയിൽ ഒപ്പത്തിനൊപ്പം
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!