ഏറ്റവും കുറവ് റണ്‍സ് വിട്ടു കൊടുത്ത ബൗളര്‍മാരില്‍ വെസ്റ്റിന്‍ഡീസിന്റെ കെമാര്‍ റോച്ചാണ് മുന്നിലുള്ളത്. അദ്ദേഹത്തിന്റെ 3.66 ഈ ലോകകപ്പിലെ മികച്ച പ്രകടനമാണ്.
ഈ ലോകകപ്പിലെ ഏറ്റവും മികച്ച ബൗളിങ് ആവറേജ് ഇന്ത്യന്‍ താരം വിജയ് ശങ്കറിന്റേത്. പരുക്കേറ്റു ടൂര്‍ണമെന്റില്‍ നിന്നും പുറത്തായ താരത്തിന്റെ ബൗളിങ് ശരാശരി 11 ആണ്. തൊട്ടു പിന്നാലെ മറ്റൊരു ഇന്ത്യന്‍ താരം സെമിയില്‍ കളിക്കാന്‍ ഇടം നേടാതെ പോയ മുഹമ്മദ് ഷമിയാണ്. ഷമിയുടെ ആവറേജ് 13.87 ആണ്. മൂന്നാം സ്ഥാനത്തുള്ളത് പാക്കിസ്ഥാന്റെ ഷഹീന്‍ അഫ്രീദിയും (14.62), നാലാമത് ഓസ്‌ട്രേലിയയുടെ മിച്ചല്‍ സ്റ്റാര്‍ക്കുമാണ് (16.61). ന്യൂസിലന്‍ഡിന്റെ ജയിംസ് നീഷാമാണ് പട്ടികയില്‍ 18.18 ബൗളിങ് ആവറേജുമായി അഞ്ചാം സ്ഥാനത്ത്.
മൂന്നു മത്സരങ്ങള്‍ മാത്രം കളിച്ച വിജയ് പന്തെറിഞ്ഞതാവട്ടെ ഒരേയൊരു മത്സരത്തിലും. മാഞ്ചസ്റ്ററില്‍ പാക്കിസ്ഥാനെതിരേ എറിഞ്ഞ ആദ്യ പന്തില്‍ തന്നെ അദ്ദേഹത്തിനു വിക്കറ്റും ലഭിച്ചു. 5.2 ഓവറില്‍ 22 റണ്‍സ് വിട്ടുകൊടുത്തു രണ്ടു വിക്കറ്റും വീഴ്ത്തി. എന്നാല്‍, സതാംപ്ടണില്‍ അഫ്ഗാനിസ്ഥാനെതിരേയും മാഞ്ചസ്റ്ററില്‍ വെസ്റ്റിന്‍ഡീസിനെതിരേയും വിജയ് ശങ്കറിനു പന്തെറിയാനുള്ള അവസരം ലഭിച്ചതുമില്ല. പാക്കിസ്ഥാനെതിരേയുള്ള മത്സരത്തില്‍ ഇന്ത്യന്‍ പേസര്‍ ഭുവനേശ്വര്‍ കുമാറിന് പരുക്കേറ്റ് പിന്‍മാറേണ്ടി വന്നതു കൊണ്ടാണ് വിജയ് ശങ്കറിനു ബൗള്‍ ചെയ്യാനായത്.