ലോകകപ്പിലെ ഏറ്റവും വലിയ വിജയങ്ങളില് ആദ്യ പത്തില് നാലിലും ഇംഗ്ലണ്ട്
Synopsis
അഫ്ഗാനിസ്ഥാനെതിരേ അവര് 397 എന്ന റണ്മല കെട്ടിപ്പൊക്കുകയും ചെയ്തു. പിന്നീട് ന്യൂസിലന്ഡിനെതിരേ 119 റണ്സിന്റെ വിജയം സ്വന്തം പേരിലാക്കി. ചെസ്റ്റര്ലീ സ്ട്രീറ്റില് നടന്ന ഈ ലീഗ് മത്സരത്തില് ഇംഗ്ലണ്ട് കിവീസിനെതിരേ 305 റണ്സാണ് നേടിയത്. ടൂര്ണമെന്റിലെ ഏറ്റവും വലിയ മൂന്നാമത്തെ വിജയമാണിത്.
ലണ്ടന്: ലോകകപ്പ് കിരീടമുയര്ത്തിയ ഇംഗ്ലണ്ട് അത് അര്ഹിച്ചതായിരുന്നുവെന്ന് ടൂര്ണമെന്റിലെ അവരുടെ പ്രകടനം സൂചിപ്പിക്കുന്നു. ലോകകപ്പിലെ ഏറ്റവും വലിയ വിജയം സ്വന്തമാക്കിയതും അവര് തന്നെ. മാഞ്ചസ്റ്ററില് നടന്ന മത്സരത്തില് അഫ്ഗാനിസ്ഥാനെതിരേയായിരുന്നു ടൂര്ണമെന്റിലെ ഏറ്റവും വലിയ വിജയം. 150 റണ്സിന്റെ വന് വിജയമാണ് ഇംഗ്ലീഷ് പട അന്നു സ്വന്തമാക്കിയത്.
വന്വിജയങ്ങളുടെ പട്ടികയില് രണ്ടാം സ്ഥാനത്തുള്ളത് ടീം ഇന്ത്യയാണ്. വെസ്റ്റിന്ഡീസിനെതിരേ മാഞ്ചസ്റ്ററില് നേടിയ 125 റണ്സിന്റെ വിജയം. കോലിപ്പടയും കൂട്ടരും കരീബിയന് കൂട്ടത്തിനെതിരേ അന്ന് അടിച്ചു കൂട്ടിയത് ഏഴു വിക്കറ്റ് നഷ്ടത്തില് 269 റണ്സായിരുന്നു. വിന്ഡീസാവട്ടെ 143 റണ്സിന് എല്ലാവരും പുറത്താവുകയും ചെയ്തു. നായകനായി മുന്നില് നിന്നു പൊരുതിയ വിരാട് കോലിയായിരുന്നു (72) ഈ കളിയിലെ കേമന്.
ആറാമത്തെ വലിയ വിജയത്തിന്റെ ക്രെഡിറ്റ് പാക്കിസ്ഥാനാണ്. അവര് ലോര്ഡ്സില് ബംഗ്ലാദേശിനെതിരേ നേടിയത് 94 റണ്സിന്റെ വിജയമാണ്. ആദ്യം ബാറ്റ് ചെയ്ത അവര് 315 റണ്സ് അടിച്ചു കൂട്ടുകയും ചെയ്തു. ഏഴാം സ്ഥാനത്ത് പിന്നെയും ടീം ഇന്ത്യ തന്നെ. മാഞ്ചസ്റ്ററിലായിരുന്നു കോലിയുടെയും കൂട്ടുകാരുടെയും ഈ പ്രകടനം. എതിരാളികളാവട്ടെ വന്വൈരികളായ പാക്കിസ്ഥാനും. അവരെ കീഴടക്കിയത് 89 റണ്സിന്. പാക് പടയ്ക്കെതിരേ ഇന്ത്യ നേടിയത് അഞ്ചു വിക്കറ്റ് നഷ്ടത്തില് 336 റണ്സായിരുന്നു. രോഹിത് ശര്മ 140 റണ്സ് നേടിയ ഈ മത്സരത്തില് മഴ ഇടയ്ക്ക് കളി മുടക്കുകയും ചെയ്തു.
ടൂര്ണമെന്റിലെ ഏറ്റവും വലിയ വിജയങ്ങള് പിറന്നത് മാഞ്ചസ്റ്ററിലാണ്. ഇംഗ്ലണ്ടും ഇന്ത്യയുമാണ് ഇവിടെ നിന്നും വന് വിജയങ്ങള് വാര്ത്തെടുത്തത്. ഇന്ത്യ രണ്ടു തവണ ഇവിടെ മിന്നും വിജയം സ്വന്തമാക്കി. വെസ്റ്റിന്ഡീസിനെതിരേയും പാക്കിസ്ഥാനെതിരേയും.