വിനായക ചതുര്‍ത്ഥി: ഭക്തിപൂർണം ആഘോഷങ്ങൾ

കേരളത്തിലെ പ്രശസ്തമായ ഗണപതി ക്ഷേത്രങ്ങളായ പഴവങ്ങാടി, കൊട്ടാരക്കര, മള്ളിയൂർ, ഇടപ്പള്ളി എന്നിവിടങ്ങളിൽ വിനായക ചതുര്‍ത്ഥി ഏറെ ഭക്തിപൂർവ്വം ആഘോഷിക്കാറുണ്ട്.

ചിങ്ങമാസത്തിലെ കറുത്തവാവ് കഴിഞ്ഞു വരുന്ന ചതുര്‍ത്ഥി അഥവാ വെളുത്തപക്ഷ ചതുര്‍ത്ഥി ദിവസമാണ് വിനായക ചതുർത്ഥി അഥവാ ഗണേശ ചതുര്‍ത്ഥി ആചരിക്കുന്നത്. ഗണപതിയുടെ പുനർജന്മത്തെ അനുസ്മരിക്കാനും ആഘോഷിക്കാനുമുള്ള പ്രത്യേക ദിനമാണ് വിനായക ചതുര്‍ത്ഥി. ഭക്തർക്ക് ഗണപതിയോടുള്ള സ്നേഹവും സമർപ്പണവും പ്രകടിപ്പിക്കാനും, അദ്ദേഹത്തിന്റെ അനുഗ്രഹം തേടാനുമുള്ള അവസരമായാണ് ഈ ഉത്സവം ഒരുക്കുന്നത്.

കേരളത്തിലെ പ്രശസ്തമായ ഗണപതി ക്ഷേത്രങ്ങളായ പഴവങ്ങാടി, കൊട്ടാരക്കര, മള്ളിയൂർ, ഇടപ്പള്ളി എന്നിവിടങ്ങളിൽ വിനായക ചതുര്‍ത്ഥി ഏറെ ഭക്തിപൂർവ്വം ആഘോഷിക്കാറുണ്ട്. ഗണപതിയുടെ ജന്മദിനമായാണ് ഈ ദിനം ഭക്തജനങ്ങൾ വിശ്വസിക്കുന്നത്. അതിനാൽ തന്നെ വീടുകളിലും ക്ഷേത്രങ്ങളിലും ഗണപതിക്ക് പ്രത്യേക പൂജകൾ നടത്തുകയും ചെയ്യുന്നു. വിഘ്നനിവാരകനായ ഗണപതിയുടെ അനുഗ്രഹത്താൽ പുതിയ തുടക്കങ്ങൾ വിജയകരമാകുമെന്നാണ് ഭക്തർ വിശ്വസിക്കുന്നത്.

ഗണപതിയുടെ ജനനവുമായി ബന്ധപ്പെട്ടുള്ള ഐതിഹ്യം വളരെ രസകരവും ഭക്തിപ്രധാനവുമാണ്. ഒരിക്കൽ പാർവതിദേവി കുളിക്കാനായി പോയപ്പോൾ, തന്റെ ശരീരത്തിലെ ചന്ദനപ്പൊടി കൊണ്ടു രൂപപ്പെടുത്തിയ ഒരു ബാലനെ കാവലിനായി അവിടെ നിയമിച്ചു. ആരെയും അകത്ത് കടക്കാൻ അനുവദിക്കരുതെന്നായിരുന്നു കർശന നിർദ്ദേശം.

ആ സമയം പരമശിവൻ അവിടേക്ക് പ്രവേശിക്കാൻ ശ്രമിച്ചപ്പോൾ, ബാലൻ തന്റെ അമ്മ നൽകിയ ഉത്തരവനുസരിച്ച് അദ്ദേഹത്തെ തടഞ്ഞു. പ്രകോപിതനായ ശിവൻ, തന്റെ ത്രിശൂലം ഉപയോഗിച്ച് ബാലന്റെ തല വെട്ടി മാറ്റി. സംഭവം അറിഞ്ഞ പാർവതീദേവി അതീവ ദുഃഖിതയായി, ബാലനെ തിരികെ ജീവിപ്പിക്കണമെന്നു ശിവനോട് ആവശ്യപ്പെട്ടു.

പാർവതിയുടെ ദുഖം കണ്ട ശിവൻ, തന്റെ ഭൃത്യന്മാരോട് ഉത്തരവിട്ടു: വടക്കോട്ട് തല കാണുന്ന ആദ്യ ജീവിയുടെ തല കൊണ്ടുവരിക. അവർ ഒരു ആനയുടെ കുഞ്ഞിനെ കണ്ടു, അതിന്റെ തല കൊണ്ടുവന്നു. ആ തല ബാലന്റെ ശരീരത്തിൽ വച്ചപ്പോൾ അവൻ വീണ്ടും ജീവിച്ചു. ശിവൻ അവനെ ഗണപതി എന്നു നാമകരണം ചെയ്തു, വിഘ്നനിവാരകൻ എന്നും ലോകത്തിലെ എല്ലാ ആരാധനകൾക്കും ആദ്യം ആരാധിക്കപ്പെടുന്ന ദേവൻ എന്നും പ്രഖ്യാപിച്ചു.

ഇതാണ് വിനായക ചതുർഥി ആഘോഷങ്ങളിലൂടെ ഭക്തർ ഓർമ്മിക്കുന്ന ഗണേശജന്മ ഐതിഹ്യം.