ജനങ്ങള്‍ക്ക് നിങ്ങളെ വേണം, ശബ്ദമില്ലാത്തവരുടെ ശബ്ദം: അഖിൽ മാരാർക്ക് ആശംസയുമായി ബി​ഗ് ബോസ് താരം

തൃക്കാക്കരയിൽ ട്വന്റി 20 സ്ഥാനാർത്ഥിയായി മത്സരിക്കുന്ന അഖിൽ മാരാർക്ക് മുൻ ബിഗ് ബോസ് താരം സെറീന ആശംസകൾ നേർന്നു. അഖിൽ ജനങ്ങളുടെ ആളാണെന്നും സമൂഹത്തിന് ആവശ്യമുള്ള വ്യക്തിയാണെന്നും സെറീന പറഞ്ഞു.

തൃക്കാക്കര മണ്ഡലത്തിൽ ട്വൻ്റി 20 പാർട്ടി സ്ഥാനാർത്ഥിയായി മത്സരിക്കുന്ന അഖിൽ മാരാർക്ക് ആശംസയുമായി മുൻ ബി​ഗ് ബോസ് താരം സെറീന. അഖിൽ മാരാർ ജനങ്ങളുടെ ആളാണെന്നും സമൂഹത്തിന് ശരിക്കും ആവശ്യമുള്ളൊരാളാണെന്നും സെറീന പറയുന്നു. "ശബ്ദമില്ലാത്തവരുടെ ശബ്ദം" എന്ന് മുൻപിട്ടൊരു പോസ്റ്റ് വെറുമൊരു വാചകമായിരുന്നില്ലെന്നും നിങ്ങൾ ആരാണെന്നതിൻ്റെ പ്രതിഫലനമായിരുന്നുവെന്നും സെറീന പറഞ്ഞു.

സെറീനയുടെ വാക്കുകൾ ഇങ്ങനെ

കഴിഞ്ഞ മൂന്ന് വർഷമായി എനിക്ക് നിങ്ങളെ അറിയാം. പല സൗഹൃദങ്ങളെയും പോലെ, ഞങ്ങളുടേത് സൗമ്യമായ തുടക്കമായിരുന്നില്ല. അൽപ്പം കയ്പ്പോടെയാണ് ആരംഭിച്ചത്. എന്നാൽ സമയം കടന്നുപോകുന്തോറും നല്ലൊരു സൗഹൃദം ഉടലെടുത്തു. നിങ്ങളെല്ലാം സ്വപ്നം കണ്ടുകൊണ്ടിരുന്നു. സിനിമയുടെ, രാഷ്ട്രീയത്തിൻ്റെ, ക്രിക്കറ്റിൻ്റെ...ലോകം കാണുന്നതിന് വളരെ മുമ്പുതന്നെ ആ സ്വപ്നങ്ങളിൽ നിങ്ങൾ വിശ്വസിച്ചു.

മലയാളത്തിലെ ഏറ്റവും വലിയ റിയാലിറ്റി ഷോയിൽ അതിൻ്റെ ചരിത്രത്തിൽ തന്നെ ഏറ്റവും കൂടുതൽ വോട്ടുകൾ നേടി വിജയിച്ചത് വെറുമൊരു വിജയമായിരുന്നില്ല. അത് ജനങ്ങളുടെ ഹൃദയത്തിൽ നിങ്ങൾ വഹിക്കുന്ന വിശ്വാസത്തിൻ്റെയും സ്നേഹത്തിൻ്റെയും സ്വാധീനത്തിൻ്റെയും പ്രതിഫലനമായിരുന്നു. നിങ്ങളിലൂടെ നിരവധി ജീവിതങ്ങൾ ജീവിച്ചു. ആ യാത്രയിൽ ഞാൻ കണ്ടത് അതിജീവിച്ച ഒരാളെ മാത്രമല്ല, ഒരു യഥാർത്ഥ മനുഷ്യനെയും കൂടിയായിരുന്നു. ഇന്ന് നിങ്ങളോട് ബഹുമാനം മാത്രമാണ്.

ഞാൻ ഒരിക്കൽ കണ്ടൊരു കാര്യം പറയട്ടെ ? ഞങ്ങൾ സുഹൃത്തുക്കളുടെ ഇടയിലെ ഒരു യാത്രയിൽ , ഒരു അപരിചതന്റെ കാൾ അഖിലേട്ടനു വന്നു. ആൾ ഒരു തെറ്റ് ചെയ്യാത്ത പ്രശ്നത്തിലാണെന്നു മനസിലായി. ആ സമയത്തു ഞാൻ കണ്ടത് വേറെ ഒരു മനുഷ്യനെ ആയിരുന്നു. ഒരു വിരാമവുമില്ലാതെ തിരികെയുള്ള കോളുകൾ-പകരം ഒന്നും പ്രതീക്ഷിക്കാതെ, സാധ്യമായ എല്ലാ വഴികളിലും സഹായിക്കാൻ പരമാവധി ശ്രമിക്കുന്നു. എന്നെ സംബന്ധിച്ചിടത്തോളം നിരുപാധികം, നിസ്വാർത്ഥരായിരിക്കുക എന്നതാണ് ഒരു യഥാർത്ഥ നേതാവ്.

നിങ്ങൾ ജനങ്ങളുടെ ആളാണ്. സമൂഹത്തിന് ശരിക്കും ആവശ്യമുള്ളൊരാൾ. "ശബ്ദമില്ലാത്തവരുടെ ശബ്ദം" എന്ന നിങ്ങളുടെ ഒരു പോസ്റ്റിൽ കമൻ്റ് ചെയ്തത് ഞാൻ ഇപ്പോഴും ഓർക്കുന്നു. അത് വെറുമൊരു വാചകമായിരുന്നില്ല. നിങ്ങൾ ആരാണെന്നതിൻ്റെ പ്രതിഫലനമായിരുന്നു. തൃക്കാക്കര മണ്ഡലത്തിൽ ട്വൻ്റി 20 പാർട്ടിയുടെ സ്ഥാനാർത്ഥി ആയതിന് ഹൃദയം നിറഞ്ഞ അഭിനന്ദനങ്ങൾ. നിങ്ങളിലെ നീതിയും നിങ്ങളുടെ യാത്രയുടെ പിന്നിലെ ഉദ്ദേശ്യവും ആളുകൾ കാണുമെന്ന് ഞാൻ വിശ്വസിക്കുന്നു. നിങ്ങൾ ജനങ്ങൾക്ക് വേണ്ടിയുള്ള ശക്തവും സത്യസന്ധവുമായ ശബ്ദമായി മാറട്ടെ. എന്നെങ്കിലും, സംസ്ഥാനത്തിൻ്റെ തന്നെ ശബ്ദമാകട്ടെ. ഒരുപാട് സ്നേഹവും ബഹുമാനവും വിശ്വാസവും.