അപ്പോ എങ്ങനെയാ..തുടങ്ങുവല്ലേ ? ദിലീപ്, വിനീത്, ധ്യാൻ ടീമിന്‍റെ 'ഭ.ഭ.ബ', വൻ അപ്ഡേറ്റ് വരുന്നു

വമ്പൻ ബജറ്റില്‍ ഒരുങ്ങുന്ന ചിത്രം. 

ദിലീപിനെ നായകനാക്കി ധനഞ്ജയ് ശങ്കര്‍ സംവിധാനം ചെയ്യുന്ന ഭ.ഭ.ബ എന്ന ചിത്രത്തിന്റെ പ്രധാന അപ്ഡേറ്റ് വരുന്നു. ജൂലൈ 4ന് ആണ് ഈ അപ്ഡേറ്റ് എത്തുക. 'അപ്പോ എങ്ങനെയാ... തുടങ്ങുവല്ലേ' എന്ന് കുറിച്ച് കൊണ്ട് ദിലീപ് തന്നെയാണ് ഇക്കാര്യം അറിയിച്ചിരിക്കുന്നത്. ഭയം ഭക്തി ബഹുമാനം എന്നാണ് ചിത്രത്തിന്റെ പൂർണ പേര്. 

വിനീത് ശ്രീനിവാസനും ധ്യാൻ ശ്രീനിവാസനും അഭിനയിക്കുന്ന ചിത്രം നിർമിക്കുന്നത് ​ഗോകുലം ​ഗോപാലന്റെ നേതൃത്വത്തിലുള്ള ​ഗോകുലം മൂവീസ് ആണ്. താര ദമ്പതിമാരായ നൂറിൻ ഷെരീഫും ഫാഹിം സഫറും ചേർന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. ഒരു മാസ് എന്റർടെയ്നർ ആയാണ് സിനിമ ഒരുങ്ങുന്നതെന്നാണ് വിവരം. വമ്പൻ ഹിറ്റ് ചിത്രങ്ങൾ നിർമ്മിച്ചിട്ടുള്ള ഗോകുലം മൂവീസിന്‍റെ ബാനറും ഈ പ്രോജക്റ്റിന്മേല്‍ പ്രേക്ഷക പ്രതീക്ഷ ഉയര്‍ത്തുന്ന ഘടകമാണ്.

കോ- പ്രൊഡ്യൂസേര്‍സ് വി സി പ്രവീണ്‍, ബൈജു ഗോപാലൻ എന്നിവരും എക്‌സിക്യൂട്ടീവ് പ്രൊഡ്യൂസര്‍  കൃഷ്ണമൂര്‍ത്തിയുമാണ്. വിനീത് ശ്രീനിവാസൻ, ധ്യാൻ ശ്രീനിവാസൻ എന്നിവരും ചിത്രത്തിന്റെ ഭാഗമാണ്. വിനീത് ശ്രീനിവാസന്റെ സംവിധാന സഹായിയായി നേരത്തെ പ്രവർത്തിച്ചിട്ടുള്ളയാളാണ് ഭ.ഭ.ബ യുടെ സംവിധായകൻ ധനഞ്ജയ് ശങ്കര്‍. 

വമ്പൻ ബജറ്റില്‍ ഒരുങ്ങുന്ന ചിത്രത്തിൽ തമിഴ് സിനിമകളിലെ നൃത്ത സംവിധായകനും നടനുമായ സാന്‍ഡി മാസ്റ്ററും കൊമെഡിയൻ റെഡിംഗ് കിങ്സ്‌ലിയും അഭിനയിക്കുന്നുണ്ട്. ബാലു വർഗീസ്, ബൈജു സന്തോഷ്‌,  സിദ്ധാർഥ് ഭരതൻ, ശരണ്യ പൊൻവണ്ണൻ എന്നിവരാണ് മറ്റ് താരങ്ങൾ. വാർത്താ പ്രചരണം വൈശാഖ് സി വടക്കേവീട്, ജിനു അനിൽകുമാർ. ചിത്രത്തില്‍ മോഹന്‍ലാല്‍ ഉണ്ടെന്ന തരത്തില്‍ അഭ്യൂഹങ്ങളുണ്ട്. ഇക്കാര്യത്തില്‍ ഔദ്യോഗിക വിശദീകരണങ്ങളൊന്നും വന്നിട്ടില്ല. അതേസമയം, പ്രിന്‍സ് ആന്‍ഡ് ഫാമിലിയാണ് ദിലീപിന്‍റേതായി ഏറ്റവും ഒടുവില്‍ റിലീസ് ചെയ്ത ചിത്രം. 

ഏഷ്യാനെറ്റ് ന്യൂസ് തത്സമയ വാർത്തകൾ അറിയാം..