'കങ്കുവ'യ്ക്ക് ശേഷം ശിവയുടെ അടുത്ത ചിത്രം അജിത്തുമായി

കങ്കുവയുടെ സംവിധായകൻ ശിവയുടെ അടുത്ത ചിത്രം അജിത്ത് കുമാറിനൊപ്പമായിരിക്കുമെന്ന് നിർമ്മാതാവ് സ്ഥിരീകരിച്ചു. 

ചെന്നൈ: സൂര്യ നായകനായ കങ്കുവ കഴിഞ്ഞ ദിവസമാണ് റിലീസായത്. ആദ്യ ദിനത്തില്‍ 50 കോടിക്ക് അടുത്ത് ആഗോള കളക്ഷന്‍ എന്നാണ് റിപ്പോര്‍ട്ടുകള്‍. എന്നാല്‍ ചിത്രത്തിന് വലിയതോതില്‍ നെഗറ്റീവ് റിവ്യൂകള്‍ ലഭിക്കുന്നുണ്ട്. അതിനിടയില്‍ ചിത്രത്തിന്‍റെ സംവിധായകന്‍ ശിവയുടെ അടുത്ത ചിത്രം സംബന്ധിച്ച അപ്ഡേറ്റും പുറത്ത് എത്തിയിരിക്കുകയാണ്. 

സിരുത്തെ ശിവയുടെ അടുത്ത ചിത്രം നടന്‍ അജിത്ത് കുമാറിനൊപ്പം ആയിരിക്കും എന്നാണ് വിവരം. കങ്കുവ നിര്‍മ്മാതാവ് ജ്ഞാനവേല്‍ രാജയാണ് ഈകാര്യം ചെന്നൈയില്‍ മാധ്യമങ്ങളെ കണ്ടപ്പോള്‍ സ്ഥിരീകരിച്ചത്. കങ്കുവ 2 അപ്ഡേറ്റ് സംബന്ധിച്ചുള്ള ചോദ്യത്തിന് അജിത്ത് ശിവ ചിത്രത്തിന് ശേഷം എന്നാണ് കങ്കുവ നിര്‍മ്മാതാവ് പറഞ്ഞത്. 

2025 ഏപ്രിലില്‍ ചിത്രത്തിന്‍റെ ഷൂട്ടിംഗ് ആരംഭിക്കും എന്നാണ് വിവരം. ഗുഡ് ബാഡ് അഗ്ലി എന്ന ചിത്രത്തിന് ശേഷം അജിത്ത് ശിവ ചിത്രത്തില്‍ എത്തും എന്നാണ് വിവരം. ഒരു ആക്ഷന്‍ ചിത്രമായിരിക്കും ഇതെന്നാണ് വിവരം. 

വീരം, വേതാളം, വിവേകം, വിശ്വാസം എന്നീ ചിത്രങ്ങൾക്ക് ശേഷം അജിത്തിനൊപ്പം സിരുത്തൈ ശിവ ഒരുക്കുന്ന അഞ്ചാമത്തെ ചിത്രമായിരിക്കും ഇത്. വിവേകം ഒഴികെ ബാക്കി മൂന്ന് ശിവ അജിത്ത് ചിത്രങ്ങളും തമിഴ്‌നാട്ടിൽ വിജയം നേടിയ ചിത്രങ്ങളായിരുന്നു. 

അതേ സമയം കങ്കുവ കടുത്ത വിമര്‍ശനം നേരിടുന്ന വേളയില്‍ ശിവ വീണ്ടും അജിത്ത് ചിത്രവുമായി എത്തും എന്ന വാര്‍ത്ത അജിത്ത് ആരാധകര്‍ക്കിടയില്‍ മുറുമുറുപ്പുണ്ടാക്കുന്നു എന്ന തരത്തില്‍ എക്സ് പോസ്റ്റുകള്‍ വരുന്നുണ്ട്. 

അജിത്തിന്‍റെതായി അടുത്തതായി വിടാ മുയാർച്ചി എന്ന ചിത്രമാണ് റിലീസ് ആകാനിരിക്കുന്നത്. അതിന് ശേഷം ഗുഡ് ബാഡ് അഗ്ലി എന്ന ചിത്രവും അണിയറയില്‍ ഒരുങ്ങുന്നുണ്ട്.