‘രാം സേതു’വിന്റെ രഹസ്യം കണ്ടുപിടിക്കാൻ അക്ഷയ് കുമാർ; ശ്രദ്ധനേടി ഫസ്റ്റ് ​ഗ്ലിംപ്‍സ്

രാം സേതു ഒക്ടോബർ 25ന് തിയറ്ററുകളിലെത്തും.

നടൻ‌ അക്ഷയ് കുമാറിന്റേതായി അണിയറയിൽ ഒരുങ്ങുന്ന ബി​ഗ് ബജറ്റ് ചിത്രമാണ് ‘രാം സേതു’. അഭിഷേക് ശർമ സംവിധാനം ചെയ്യുന്ന ചിത്രത്തിൽ പുരാവസ്തു ​ഗവേഷകനായാണ് അക്ഷയ് കുമാർ എത്തുന്നത്. റിലീസിനൊരുങ്ങുന്ന ചിത്രത്തിന്റെ ഫസ്റ്റ് ​ഗ്ലിംപ്‍സ് പുറത്തുവിട്ടിരിക്കുകയാണ് അണിയറ പ്രവർത്തകർ ഇപ്പോൾ. 

ആകാംക്ഷയും കൗതുകവും മാസ് ബിജിഎമ്മും ഉൾപ്പെടുത്തിയാണ് ഫസ്റ്റ് ​ഗ്ലിംപ്‍സ് പുറത്തുവിട്ടിരിക്കുന്നത്. 
ജാക്വിലിൻ ഫെർണാണ്ടസ്, നുസ്രത്ത് ഭറുച്ച, സത്യദേവ് എന്നിവരാണ് അക്ഷയ്ക്ക് ഒപ്പം ചിത്രത്തിൽ പ്രധാന വേഷത്തിലെത്തുന്ന താരങ്ങൾ. രാം സേതു ഒക്ടോബർ 25ന് തിയറ്ററുകളിലെത്തും.

നേരത്തെ ചിത്രത്തിനെതിരെ ബി​ജെപി നേതാവ് സുബ്രഹ്മണ്യന്‍ സ്വാമി രം​ഗത്തെത്തിയിരുന്നു.  'രാം സേതു' ചരിത്രം വളച്ചൊടിക്കുന്നതാണെന്നാണ് അദ്ദേഹ​ത്തിന്റെ ആരോപണം. അക്ഷയ് കുമാര്‍ അടക്കമുള്ള അഭിനേതാക്കള്‍ക്കും ചിത്രത്തിന്റെ അണിയറ പ്രവര്‍ത്തകര്‍ക്കുമെതിരെ നിയമ നടപടിക്ക് ഒരുങ്ങുകയാണെന്ന് സുബ്രഹ്മണ്യന്‍ സ്വാമി അറിയിച്ചിരുന്നു. ലൈക്ക പ്രൊഡക്ഷന്‍സ്, കേപ് ഓഫ് ഗുഡ് ഫിലിംസ്, അബുണ്ടാന്റിയ എന്റര്‍ടൈന്മെന്റ് തുടങ്ങിയവരാണ് നിര്‍മാതാക്കൾ.

അതേസമയം, അടുത്തിടെ റിലീസ് ചെയ്ത അ​ക്ഷയ് കുമാർ ചിത്രങ്ങളെല്ലാം തന്നെ വൻ പരാജയമാണ് നേരിട്ടു കൊണ്ടിരിക്കുന്നത്. 'രക്ഷാബന്ധന്‍' എന്ന ചിത്രമാണ് അക്ഷയ് കുമാറിന്റേതായി ഒടുവിൽ റിലീസ് ചെയ്തത്. വമ്പൻ ഹൈപ്പോടെ എത്തിയ ചിത്രത്തിന് പക്ഷേ ബോക്സ് ഓഫീസിൽ പിടിച്ചു നിൽക്കാനായില്ല. അക്ഷയ് കുമാറിന്റെ ഈ വര്‍ഷത്തെ ഏറ്റവും വലിയ പരാജയമായി ചിത്രം മാറിയിരിക്കുകയാണ്. ബച്ചന്‍ പാണ്ഡെ, സമ്രാട്ട് പൃഥ്വിരാജ് എന്നീ ചിത്രങ്ങളും ഇത്തരത്തിൽ വൻ പരാജയം ഏറ്റുവാങ്ങിയിരുന്നു. കഴിഞ്ഞ വർഷം ഓ​ഗസ്റ്റിൽ ഇറങ്ങിയ ബെൽ ബോട്ടം എന്ന സിനിമയും ഫ്ലോപ്പായിരുന്നു. ഈ കാലയളവിൽ താരത്തിന്റെ ഒരേയൊരു ഹിറ്റ് ചിത്രം സൂര്യവംശി മാത്രമാണ്. 2021 നവംബറിലായിരുന്നു ഈ ചിത്രം തിയറ്ററുകളിൽ എത്തിയത്.