അമിതാബ് ബച്ചൻ ദൈവമെന്ന് ആരാധകൻ, വീടിന് മുന്നിൽ ബിഗ് ബിയുടെ കൂറ്റൻ പ്രതിമ

പ്രതിമ പ്രത്യേകം രൂപകൽപ്പന ചെയ്ത് രാജസ്ഥാനിൽ നിർമ്മിച്ച് പിന്നീട് അമേരിക്കയിലേക്ക് അയച്ചതാണ്. മുഴുവൻ പദ്ധതിക്കുംഏകദേശം 60 ലക്ഷം രൂപ ചിലവായി

വാഷിംഗ്ടൺ: ന്യൂജേഴ്‌സിയിലെ എഡിസൺ സിറ്റിയിലെ വീട്ടിൽ ബോളിവുഡ് താരം അമിതാഭ് ബച്ചന്റെ  പ്രതിമ സ്ഥാപിച്ച് ഇന്ത്യൻ-അമേരിക്കൻ കുടുംബം. പ്രമുഖ കമ്മ്യൂണിറ്റി നേതാവ് ആൽബർട്ട് ജസാനി പ്രതിമ ഔദ്യോഗികമായി അനാച്ഛാദനം ചെയ്തപ്പോൾ, എഡിസണിലെ റിങ്കുവിന്റെയും ഗോപി സേത്തിന്റെയും വീടിന് പുറത്ത് 600-ഓളം ആളുകൾ ഒത്തുകൂടി.

ഒരു വലിയ ഗ്ലാസ് ബോക്സിനുള്ളിലാണ് പ്രതിമ സ്ഥാപിച്ചിരിക്കുന്നത്. ചടങ്ങിൽ പടക്കം പൊട്ടിക്കലും ഇന്ത്യൻ സൂപ്പർ താരത്തിന്റെ ഫാൻസ് ക്ലബ്ബിന്റെ ആഹ്ലാദകരമായ നൃത്തവും ഉണ്ടായിരുന്നു. "എനിക്കും എന്റെ ഭാര്യക്കും അദ്ദേഹം ദൈവത്തിൽ നിന്ന് ഒട്ടും ചെറുതല്ല," ഇന്റർനെറ്റ് സുരക്ഷാ എഞ്ചിനീയറായ ഗോപി സേത്ത് പിടിഐയോട് പറഞ്ഞു.

"അദ്ദേഹത്തിൽ നിന്ന് എന്നെ പ്രചോദിപ്പിക്കുന്ന ഏറ്റവും വലിയ കാര്യം സിനിമാ ജീവിതം മാത്രമല്ല, യഥാർത്ഥ ജീവിതവുമാണ് ... അദ്ദേഹം എങ്ങനെ പൊതുസ്ഥലത്ത് പ്രത്യക്ഷപ്പെടുന്നു, എങ്ങനെ ആശയവിനിമയം നടത്തുന്നു,... എല്ലാം നിങ്ങൾക്കറിയാം. അദ്ദേഹം വളരെ കുലീനനാണ്. അദ്ദേഹം തന്റെ ആരാധകരെ ശ്രദ്ധിക്കുന്നു. മറ്റ് പല താരങ്ങളെയും പോലെയല്ല അദ്ദേഹം. അതുകൊണ്ടാണ് എന്റെ വീടിന് പുറത്ത് അദ്ദേഹത്തിന് പദവി ലഭിക്കണമെന്ന് ഞാൻ കരുതിയത്," സേത്ത് പറഞ്ഞു.

1990-ൽ കിഴക്കൻ ഗുജറാത്തിലെ ദാഹോദിൽ നിന്ന് യുഎസിലെത്തിയ സേത്ത്, കഴിഞ്ഞ മൂന്ന് പതിറ്റാണ്ടുകളായി "ബിഗ് ബി എക്സ്റ്റൻഡഡ് ഫാമിലി" എന്ന വെബ്‌സൈറ്റായ www.BigBEFamily.com നടത്തിവരുന്നു. വെബ്‌സൈറ്റ്, മറ്റ് കാര്യങ്ങൾക്കൊപ്പം, അമിതാഭ് ബച്ചന്റെ ആഗോള ആരാധകരുടെ കൂട്ടായ്മയാണെന്നും അദ്ദേഹം പറഞ്ഞു. 

പ്രതിമയെ കുറിച്ച് ബച്ചന് അറിവുണ്ടെന്ന് സേത്ത് പറയുന്നു. താൻ ഇത്തരത്തിലുള്ള സ്നേഹ പരിചരണം അർഹിക്കുന്നില്ലെന്ന് സൂപ്പർ താരം തന്നോട് പറഞ്ഞെങ്കിലും അത് തന്നെ ഈ പ്രവർത്തിയിൽ നിന്ന് തടഞ്ഞില്ലെന്നും സേത്ത് പറഞ്ഞു. ബച്ചൻ തന്റെ "കോൻ ബനേഗാ ക്രോർപതി" മോഡിൽ ഇരിക്കുന്നതായി കാണിക്കുന്ന പൂർണ്ണകായ പ്രതിമ പ്രത്യേകം രൂപകൽപ്പന ചെയ്ത് രാജസ്ഥാനിൽ നിർമ്മിച്ച് പിന്നീട് അമേരിക്കയിലേക്ക് അയച്ചതാണ്. മുഴുവൻ പദ്ധതിക്കും 75,000 ഡോളറിലധികം (ഏകദേശം 60 ലക്ഷം രൂപ) ചിലവായതായി സേത്ത് പറഞ്ഞു.

1991-ൽ ന്യൂജേഴ്‌സിയിൽ നടന്ന നവരാത്രി ആഘോഷത്തിനിടെയാണ് താൻ ആദ്യമായി  "ദൈവത്തെ" കണ്ടുമുട്ടുന്നതെന്ന് സേത്ത് പറഞ്ഞു. അന്നുമുതൽ താൻ ഒരു വലിയ ബച്ചൻ ആരാധകനായിരുന്നു.  സാഹിബ് തന്റെ ആരാധകരെയും അനുഭാവികളെയും തന്റെ വിപുലമായ കുടുംബം എന്നാണ് വിളിക്കുന്നതെന്ന് സേത്ത് പറഞ്ഞു. "യുഎസിൽ ഒരു പ്രതിമ സ്ഥാപിക്കുന്നത് ഒരുപാട് വെല്ലുവിളികൾ നിറഞ്ഞതാണ്, ഇത് മറ്റുള്ളവയേക്കാൾ ബുദ്ധിമുട്ടായിരുന്നു," സേത്ത് കൂട്ടിച്ചേർത്തു.