പെപ്പെ എത്തി, ദുൽഖറുമായി നേർക്കുനേരോ ഒന്നിച്ചോ ? 'ഐ ആം ഗെയിം' ഓൺ
Synopsis
ദാവീദ് ആണ് ആന്റണി വർഗീസിന്റേതായി ഏറ്റവും ഒടുവിൽ റിലീസ് ചെയ്ത ചിത്രം.
ചെറിയൊരു ഇടവേളയ്ക്ക് ശേഷം ദുൽഖർ സൽമാൻ നായകനായി എത്തുന്ന മലയാള ചലച്ചിത്രം ഐ ആം ഗെയിമിലെ പുതിയ താരത്തെ പ്രഖ്യാപിച്ചു. ആന്റണി വർഗീസ് ആണ് ആ താരം. ആൻ്റണിയെ സ്വാഗതം ചെയ്തുകൊണ്ട് ദുൽഖർ തന്നൊണ് പോസ്റ്റർ പുറത്തുവിട്ടത്. ആര്ഡിഎക്സ് എന്ന അരങ്ങേറ്റ ചിത്രത്തിലൂടെ പ്രേക്ഷകശ്രദ്ധ നേടിയ നഹാസ് ഹിദായത്ത് ആണ് സംവിധാനം.
മലയാളത്തില് ദുല്ഖര് ഇതുവരെ ചെയ്തിട്ടില്ലാത്ത തരത്തിലുള്ള സിനിമയായിരിക്കും ഇതെന്നാണ് സൂചന. കിംഗ് ഓഫ് കൊത്തയ്ക്ക് ശേഷം ദുല്ഖറിന്റേതായി മലയാളത്തില് എത്തുന്ന സിനിമയായിരിക്കും ഇത്. കൊത്തയ്ക്ക് ശേഷം മറുഭാഷകളില് വലിയ വിജയങ്ങളുടെ ഭാഗമായിരുന്നെങ്കിലും മലയാളത്തിലേക്ക് ദുല്ഖര് എത്തിയിരുന്നില്ല. ഈ കാലയളവില് ലക്കി ഭാസ്കര് എന്ന തെലുങ്ക് ചിത്രത്തിലൂടെ ദുല്ഖര് കരിയറിലെ ഏറ്റവും വലിയ ബോക്സ് ഓഫീസ് വിജയം നേടിയിരുന്നു.
പാന് ഇന്ത്യന് തെലുങ്ക് ചിത്രം കല്ക്കി 2898 എഡിയില് ഒരു പ്രധാന കഥാപാത്രത്തെയും അദ്ദേഹം അവതരിപ്പിച്ചിരുന്നു. ഐ ആം ഗെയിം കൂടാതെ തമിഴില് നിന്ന് കാന്ത എന്ന ചിത്രവും ദുല്ഖറിന്റേതായി വരാനുണ്ട്. നഹാസ് സംവിധാനം ചെയ്യുന്ന ചിത്രത്തിലൂടെ ദുല്ഖര് മലയാളത്തിലേക്ക് വന് തിരിച്ചുവരവ് നടത്തുമെന്നാണ് ആരാധകരുടെ പ്രതീക്ഷ.
ദാവീദ് ആണ് ആന്റണി വർഗീസിന്റേതായി ഏറ്റവും ഒടുവിൽ റിലീസ് ചെയ്ത ചിത്രം. ഗോവിന്ദ് വിഷ്ണു സംവിധാനം ചെയ്ത ചിത്രത്തില് ലിജോമോൾ ജോസ്, വിജയരാഘവൻ, സൈജു കുറുപ്പ്, കിച്ചു ടെല്ലസ് തുടങ്ങിയവരാണ് പ്രധാന വേഷങ്ങളിൽ എത്തിയത്. എബി അലക്സ് എബ്രഹാം, ടോം ജോസഫ്, സെഞ്ച്വറി മാക്സ് ജോൺ ആൻഡ് മേരി പ്രൊഡക്ഷൻസ്, പനോരമ സ്റ്റുഡിയോസ് എന്നിവർ ചേർന്നാണ് ചിത്രം നിർമ്മിച്ചത്.
ഏഷ്യാനെറ്റ് ന്യൂസ് തത്സമയ വാർത്തകൾ അറിയാം..