Basil Joseph : 'ഉഷയെ പോലെയല്ല ബ്രൂസ്ലി ബിജിയെ പോലെ സ്വന്തം കാലില് നില്ക്കണം'; സ്ത്രീകളോട് ബേസില്
Synopsis
ടൊവിനോ- ബേസിൽ ജോസഫ് കൂട്ടുക്കെട്ടിൽ പുറത്തിറങ്ങി ഏറെ ശ്രദ്ധ നേടിയ ചിത്രമാണ് മിന്നൽ മുരളി.
വനിത ശിശുവികസന വകുപ്പിനായി പുതിയ വീഡിയോയില് സംവിധായകൻ ബേസില് ജോസഫ്(Basil Joseph). തന്റെ സിനിമയായ മിന്നൽ മുരളിയിലെ(Minnal Murali) ഉഷ, ബ്രൂസ്ലി ബിജി എന്നീ കഥാപാത്രങ്ങളെ താരതമ്യം ചെയ്തു കൊണ്ടാണ് വീഡിയോ തയ്യാറാക്കിയിരിക്കുന്നത്. ഉഷയെ പോലെ ആകരുത് എന്നും പകരം ബ്രൂസ്ലി ബിജിയെ പോലെ സ്വന്തം കാലില് നില്ക്കാന് സ്ത്രീകള് പഠിക്കണമെന്നും ബേസില് പറയുന്നു.
'മിന്നല് മുരളിയിലെ ഉഷയെ നിങ്ങള് ശ്രദ്ധിച്ചിരുന്നോ. ഓരോ കാലത്തും ഉഷക്ക് ഓരോരുത്തരെ ആശ്രയിക്കേണ്ടി വരുന്നു. ചേട്ടനെ, ചേട്ടന്റെ സുഹൃത്തിനെ, ഷിബുവിനെ. ഉഷക്ക് സ്വന്തമായി വരുമാനം ഉണ്ടായിരുന്നെങ്കില് ഇങ്ങനെ മറ്റുള്ളവരെ ആശ്രയിക്കേണ്ടി വരുമായിരുന്നോ. ഭര്ത്താവ് ഇട്ടിട്ട് പോയാലും അന്തസ്സായി ജീവിക്കാമായിരുന്നു. മകളുടെ ചികിത്സയും നടത്താമായിരുന്നു. സ്ത്രീകള്ക്ക് ഫിനാന്ഷ്യല് ഫ്രീഡം കൂടി വേണം. അതുകൊണ്ട് ലേഡീസ്, നിങ്ങള് ബ്രൂസ്ലി ബിജിയെ പോലെ സ്വന്തം കാലില് നില്ക്കാന് പഠിക്കണം. സാമ്പത്തിക സ്വാതന്ത്ര്യത്തിലൂടെ പൂര്ണ സ്വാതന്ത്ര്യം നേടിയെടുക്കു. ആരേയും ആശ്രയിക്കാതെ മിന്നിത്തിളങ്ങൂ. ഫിനാന്ഷ്യല് ഫ്രീഡം നേടുന്നവരെ, ഇനി വേണ്ട വിട്ടുവീഴ്ച,' എന്നാണ് ബേസിൽ വീഡിയോയിൽ പറഞ്ഞത്.
ടൊവിനോ- ബേസിൽ ജോസഫ് കൂട്ടുക്കെട്ടിൽ പുറത്തിറങ്ങി ഏറെ ശ്രദ്ധ നേടിയ ചിത്രമാണ് മിന്നൽ മുരളി. ഇന്ത്യയൊട്ടാകെ ചിത്രത്തിന് വൻ സ്വീകാര്യതയായിരുന്നു ലഭിച്ചിരുന്നത്. ക്രിസ്മസ് റിലീസായി നെറ്റ്ഫ്ലിക്സിൽ എത്തിയ ചിത്രമാണ് മിന്നൽ മുരളി. നെറ്റ്ഫ്ലിക്സിന്റെ ആഗോള ലിസ്റ്റിലെ ആദ്യ പത്തില് തുടര്ച്ചയായ മൂന്ന് വാരങ്ങള് പിന്നിട്ട ചിത്രം 2021ല് ഏറ്റവുമധികം റേറ്റിംഗ് ലഭിച്ച ആക്ഷന്, അഡ്വഞ്ചര് ചിത്രങ്ങളുടെ ലിസ്റ്റിലും ഇടംപിടിച്ചിരുന്നു.
'ഗോദ' എന്ന സിനിമയ്ക്ക് ശേഷം ടൊവിനോ തോമസും സംവിധായകൻ ബേസിൽ ജോസഫും ഒന്നിച്ച സിനിമയാണ് മിന്നൽ മുരളി. മലയാളം, തമിഴ്, തെലുങ്ക്, കന്നഡ, ഹിന്ദി എന്നിങ്ങനെ അഞ്ച് ഭാഷകളിലാണ് ചിത്രം റിലീസ് ചെയ്തത്. ഇടിമിന്നല് അടിച്ച് പ്രത്യേക കഴിവ് ലഭിച്ച ജെയ്സണ് കുറുക്കന്മൂലയുടെ രക്ഷകനായി മാറുന്നതാണ് മിന്നല് മുരളി എന്ന ചിത്രത്തിലെ പ്രധാന ഇതിവൃത്തം.
അതേസമയം നാരദനാണ് ടൊവീനോയുടേതായി തിയറ്ററുകളിലെത്താനിരിക്കുന്ന അടുത്ത ചിത്രം. 'വൈറസി'നു ശേഷം ആഷിക് അബുവിന്റെ സംവിധാനത്തിലെത്തുന്ന ഫീച്ചര് ചിത്രമാണ് നാരദന്. ആണും പെണ്ണും എന്ന ആന്തോളജിയിലെ ഒരു ചെറു ചിത്രമാണ് ഇതിനിടെ ആഷിക്കിന്റേതായി പ്രദര്ശനത്തിനെത്തിയത്. 'മായാനദി'ക്കു ശേഷം ആഷിക്കും ടൊവീനോയും ഒന്നിക്കുന്ന ചിത്രവുമാണിത്. ഒരു ടെലിവിഷന് വാര്ത്താ ചാനലിന്റെ പശ്ചാത്തലത്തില് കഥ പറയുന്ന ചിത്രത്തില് ടൊവീനോ വാര്ത്താ അവതാരകനായി എത്തുന്നുണ്ട്. ഉണ്ണി ആര് രചന നിര്വ്വഹിച്ചിരിക്കുന്ന ചിത്രത്തില് അന്ന ബെന് ആണ് നായിക. മാര്ച്ച് 3ന് തിയറ്ററുകളില്.