അത് ഒഫിഷ്യല്! 'തലയും പിള്ളേരും' എന്നെത്തും? 'ഛോട്ടാ മുംബൈ' റീ റിലീസ് തീയതി ഔദ്യോഗികമായി പ്രഖ്യാപിച്ചു
Synopsis
2007 ല് റിലീസ് ചെയ്യപ്പെട്ട ചിത്രം
സമീപകാല റീ റിലീസ് ട്രെന്ഡില് മലയാളത്തില് നിന്ന് മറ്റൊരു ചിത്രം കൂടി തിയറ്ററുകളിലേക്ക്. മോഹന്ലാലിനെ നായകനാക്കി അന്വര് റഷീദ് സംവിധാനം ചെയ്ത്, 2007 ല് പുറത്തെത്തിയ ഛോട്ടാ മുംബൈ എന്ന ചിത്രമാണ് 4 കെ ഡോള്ബി അറ്റ്മോസ് സാങ്കേതിക മികവോടെ വീണ്ടും തിയറ്ററുകളില് എത്തുന്നത്. ഏറെക്കാലമായി മോഹന്ലാല് ആരാധകര് ആവശ്യപ്പെടുന്ന റീ റിലീസുകളില് ഒന്നാണ് ഇത്. മോഹന്ലാലിന്റെ വരുന്ന പിറന്നാള് ദിനത്തില് ചിത്രം തിയറ്ററുകളില് എത്തുമെന്നാണ് നേരത്തെ പ്രചരിച്ചിരുന്നത്. അടുത്തിടെ ചിത്രത്തിന്റെ നിര്മ്മാതാവും നടനുമായ മണിയന്പിള്ള രാജുവും ഈ ഡേറ്റ് കണ്ഫേം ചെയ്തിരുന്നു. ഇപ്പോഴിതാ റീ റിലീസ് തീയതി ഔദ്യോഗികമായി പ്രഖ്യാപിച്ചുകൊണ്ടുള്ള പോസ്റ്റര് പുറത്തെത്തിയിരിക്കുകയാണ്. മോഹന്ലാലും അന്വര് റഷീദും അടക്കമുള്ളവര് സോഷ്യല് മീഡിയയിലൂടെ പോസ്റ്റര് പങ്കുവച്ചിട്ടുണ്ട്.
മോഹന്ലാലിനെ നായകനാക്കി അന്വര് റഷീദ് ഒരേയൊരു ചിത്രം മാത്രമേ ഒരുക്കിയിട്ടുള്ളൂ. എന്നാല് അത് അത്രയും എന്റര്ടെയ്ന്മെന്റ് വാല്യു ഉള്ള ഒന്നായിരുന്നു. ബെന്നി പി നായരമ്പലമായിരുന്നു ചിത്രത്തിന്റെ രചയിതാവ്. മിഴിവുറ്റ കഥാപാത്രങ്ങളും രസകരമായ കഥാസന്ദര്ഭങ്ങളും ചിത്രത്തില് ആവോളം ഉണ്ടായിരുന്നു. മോഹന്ലാലിനൊപ്പം വലിയൊരു താരനിരയും ചിത്രത്തില് എത്തി. മോഹന്ലാല് തല എന്ന് കൂട്ടുകാര് വിളിക്കുന്ന വാസ്കോ ഡ ഗാമ ആയപ്പോള് നടേശന് എന്ന പ്രതിനായക കഥാപാത്രത്തെ അവതരിപ്പിച്ചത് കലാഭവന് മണി ആയിരുന്നു. ഭാവന ആയിരുന്നു നായിക. സിദ്ദിഖ്, ജഗതി ശ്രീകുമാര്, ഇന്ദ്രജിത്ത് സുകുമാരന്, മണിക്കുട്ടന്, ബിജുക്കുട്ടന്, സായ് കുമാര്, രാജന് പി ദേവ്, വിനായകന്, മണിയന്പിള്ള രാജു, മല്ലിക സുകുമാരന്, സുരാജ് വെഞ്ഞാറമൂട്, കൊച്ചിന് ഹനീഫ, ഭീമന് രഘു, വിജയരാഘവന്, ബാബുരാജ്, സനുഷ, ഗീത വിജയന്, രാമു, കുഞ്ചന്, നാരായണന്കുട്ടി, സന്തോഷ് ജോഗി, ബിജു പപ്പന്, കൊച്ചുപ്രേമന്, നിഷ സാരംഗ്, ഷക്കീല തുടങ്ങിയവരാണ് ചിത്രത്തില് കഥാപാത്രങ്ങളെ അവതരിപ്പിച്ചത്.
മോഹന്ലാല് ആരാധകര് സമീപ വര്ഷങ്ങളില് തങ്ങളുടെ ഒത്തുചേരലുകളില് പലപ്പോഴും ഛോട്ടാ മുംബൈ പ്രദര്ശിപ്പിച്ചിട്ടുണ്ട്. നിര്മ്മാതാവായ മണിയന്പിള്ള രാജുവിനോട് ചിത്രത്തിന്റെ റീ റിലീസിനെക്കുറിച്ച് സോഷ്യല് മീഡിയയിലൂടെ ആവശ്യം ഉയര്ത്തിയിട്ടുമുണ്ട്. സ്ഫടികം, ദേവദൂതന്, മണിച്ചിത്രത്താഴ് അടക്കമുള്ള റീ റിലീസുകള്ക്ക് ശേഷമെത്തുന്ന മോഹന്ലാലിന്റെ റീ റിലീസ് കൂടിയാണ് ഛോട്ടാ മുംബൈ.
സിനിമകളിൽ നിന്ന് Malayalam OTT Release വരെ, Bigg Boss Malayalam Season 7 മുതൽ Mollywood Celebrity news, Exclusive Interview വരെ — എല്ലാ Entertainment News ഒരൊറ്റ ക്ലിക്കിൽ. ഏറ്റവും പുതിയ Movie Release, Malayalam Movie Review, Box Office Collection — എല്ലാം ഇപ്പോൾ നിങ്ങളുടെ മുന്നിൽ. എപ്പോഴും എവിടെയും എന്റർടൈൻമെന്റിന്റെ താളത്തിൽ ചേരാൻ ഏഷ്യാനെറ്റ് ന്യൂസ് മലയാളം വാർത്തകൾ