ആവേശം കൊള്ളിക്കുന്ന രം​ഗങ്ങൾ, കണ്ടിറങ്ങിയത് അഭിമാനത്തോടെ: ഷൈൻ ചിത്രത്തെ കുറിച്ച് ദിയ സന

വിവേകാനന്ദനായി ഷൈൻ ടോം ചാക്കോ നിറഞ്ഞാടുമ്പോൾ സ്വാസിക, ഗ്രേസ് ആൻ്റണി, മറീന മൈക്കിൾ എന്നിവരും മികച്ച അഭിനയ മുഹൂർത്തങ്ങൾ പങ്ക് വെച്ച് കൈയ്യടി നേടുന്നു.

ഷൈൻ ടോം ചാക്കോയെ നായകനാക്കി കമൽ ഒരുക്കിയ 'വിവേകാനന്ദൻ വൈറലാണ്' എന്ന ചിത്രം മികച്ച അഭിപ്രായവുമായി തീയറ്ററുകളിൽ പ്രദർശനം തുടരുകയാണ്. ഇന്നത്തെ സമൂഹത്തിൽ സ്ത്രീകൾ നേരിടുന്ന ഒരു പ്രധാന പ്രശ്‌നത്തിലേക്ക് തുറന്ന് വെച്ച കണ്ണാടിയാണ് ഈ ചിത്രം. ചിത്രത്തിന് അഭിനന്ദനങ്ങളുമായി സോഷ്യൽ ആക്ടിവിസ്റ്റ് ദിയ സന ഫേസ്ബുക്കിൽ പങ്ക് വെച്ച ഒരു ലൈവ് വീഡിയോ ഇപ്പോൾ ശ്രദ്ധ നേടുകയാണ്. 

ഏറെ അഭിമാനത്തോടെയാണ് ചിത്രം കണ്ടിറങ്ങിയത് എന്നാണ് ദിയ വീഡിയോയിൽ പറയുന്നത്. തൻ്റെ ജീവിതത്തോട് ചേർന്ന് നിൽക്കുന്ന നിരവധി സംഭവങ്ങളാണ് സിനിമയിൽ കാണുവാൻ സാധിച്ചതെന്നും ആവേശം കൊള്ളിക്കുന്ന ചില രംഗങ്ങൾ കാരണം താൻ വേറെ ഒരു ലോകത്ത് എത്തിപ്പെട്ട അവസ്ഥ പോലുമുണ്ടായിയെന്നും ദിയ പറയുന്നു. വിവേകാനന്ദനെ പോലെയുള്ള വ്യക്തികൾ സമൂഹത്തിൽ ഉണ്ടെന്നും അത്തരത്തിൽ ഉള്ള ആണുങ്ങളെ കുറിച്ചുള്ള ചിത്രമാണ് ഇതെന്നും അവർ കൂട്ടിച്ചേർത്തു. കൂടാതെ എല്ലാ ആണുങ്ങളെയും പൊതുവായി കണക്കാക്കിയല്ല ചിത്രമെന്നും ദിയ സന വീഡിയോയിലൂടെ പറയുന്നുണ്ട്. 

മൃഗീയമായ സ്വഭാവമുള്ള വിവേകാനന്ദൻ എന്ന ഒരു വ്യക്തിയുടെ ജീവിതമാണ് ചിത്രത്തിലൂടെ തുറന്ന് കാട്ടുന്നത്. അയാളുടെ സ്വഭാവദൂഷ്യം കാരണം വലയുന്ന സ്ത്രീകളുടെ ഒരു പോരാട്ടമാണ് ചിത്രം പ്രേക്ഷകർക്ക് മുന്നിലേക്ക് അവതരിപ്പിച്ചിരിക്കുന്നത്. വിവേകാനന്ദനായി ഷൈൻ ടോം ചാക്കോ നിറഞ്ഞാടുമ്പോൾ സ്വാസിക, ഗ്രേസ് ആൻ്റണി, മറീന മൈക്കിൾ എന്നിവരും മികച്ച അഭിനയ മുഹൂർത്തങ്ങൾ പങ്ക് വെച്ച് കൈയ്യടി നേടുന്നു. സമൂഹത്തിന് മികച്ചൊരു സന്ദേശം കൈമാറുന്ന ചിത്രം രസകരവും അതേ സമയം ഏറെ ചിന്തിപ്പിക്കുന്ന രീതിയിലുമാണ് ഒരുക്കിയിരിക്കുന്നത്. ജോണി ആന്റണി, മാലാ പാർവതി,മഞ്ജു പിള്ള, നീന കുറുപ്പ്, ആദ്യാ, സിദ്ധാർത്ഥ ശിവ, ശരത് സഭ, പ്രമോദ് വെളിയനാട്, ജോസുകുട്ടി, രമ്യ സുരേഷ്, നിയാസ് ബക്കർ, സ്മിനു സിജോ, വിനീത് തട്ടിൽ, , അനുഷാ മോഹൻ തുടങ്ങിയവരും ചിത്രത്തിൽ അണിനിരക്കുന്നുണ്ട്. 

ഏഷ്യാനെറ്റ് ന്യൂസ് വാർത്തകൾ തത്സമയം അറിയാം..