'ഗെറ്റ് സെറ്റ് ബേബി'യിലൂടെ വേറിട്ടൊരു കഥാപാത്രവുമായി ഉണ്ണി മുകുന്ദൻ, ചിത്രീകരണം പൂർത്തിയായി
Synopsis
നിഖില വിമലാണ് ഉണ്ണി മുകുന്ദൻ ചിത്രത്തില് നായിക.
ഉണ്ണി മുകുന്ദൻ നായകനാകുന്ന പുതിയ ചിത്രം ‘ഗെറ്റ് സെറ്റ് ബേബി’യുടെ ചിത്രീകരണം തൊടുപുഴയിൽ പൂർത്തിയായി. സംവിധാനം നിര്വഹിക്കുന്നത് വിനയ് ഗോവിന്ദാണ്. സാമൂഹികപ്രസക്തിയുള്ള ഒരു ഫാമിലി എന്റര്ടെയ്നര് ചിത്രമായിരിക്കും ഗെറ്റ് സെറ്റ് ബേബിയെന്നാണ് റിപ്പോര്ട്ട്. നിഖില വിമലാണ് നായിക.
ഗെറ്റ് സെറ്റ് ബേബി എന്ന ചിത്രത്തില് ഐവിഎഫ് സ്പെഷ്യലിസ്റ്റ് ആയ ഒരു ഡോക്ടർ നേരിടുന്ന പ്രശ്നങ്ങളും അത് പരിഹരിക്കാൻ അയാൾ കണ്ടെത്തുന്ന വഴികളും രസകരമായ രീതിയിൽ പ്രതിപാദിക്കുന്നു. ഉണ്ണിമുകുന്ദൻ തികച്ചും വ്യത്യസ്തമായ മറ്റൊരു കഥാപാത്രത്തെ ഗെറ്റ് സെറ്റ് ബേബിയില് അവതരിപ്പിക്കുമ്പോള് പ്രതീക്ഷകളോടെ ജീവിതത്തെ കാണുന്ന കരുത്തുറ്റ നായികാ കഥാപാത്രമായിട്ടാണ് നിഖില വിമല് എത്തുക. അലക്സ് ജെ പുളിക്കലാണ് ഛായാഗ്രഹണം. ശ്യാം മോഹനും ജോണി ആന്റണിക്കുമൊപ്പം ചിത്രത്തില് മീര വാസുദേവ്, ഭഗത് മാനുവൽ, സുരഭി ലക്ഷ്മി, മുത്തുമണി, വർഷ രമേഷ്, ജുവൽ മേരി, അഭിരാം, ഗംഗ മീര തുടങ്ങി മലയാളത്തിലെ പ്രമുഖ താരങ്ങൾ അണിനിരക്കുമ്പോള് രചന നിർവഹിക്കുന്നത് വൈവി രാജേഷും അനൂപ് രവീന്ദ്രനും സംഗീത സംവിധാനം സാം സിഎസും നിര്മാണം സ്കന്ദാ സിനിമാസും കിംഗ്സ്മെൻ പ്രൊഡക്ഷൻസുമാണ്.
ഉണ്ണി മുകുന്ദന്റേതായി ഇനി വരാനിരിക്കുന്ന ചിത്രം ജയ് ഗണേഷാണ്. സംവിധാനം രഞ്ജിത് ശങ്കറാണ്. മഹിമ നമ്പ്യാരാണ് നായിക. ഏപ്രില് 11നാണ് റിലീസ്.
ഗന്ധർവ്വ ജൂനിയര് എന്ന ഒരു ചിത്രവും ഉണ്ണി മുകുന്ദൻ നായകനാകുന്നതില് പ്രേക്ഷകര് പ്രതീക്ഷയോടെ കാത്തിരിക്കുന്നതാണ്. ഒരു ഫാന്റസി കോമഡി ഴോണര് ചിത്രമായിരിക്കും ഗന്ധര്വ ജൂനിയര് എന്നാണ് പ്രതീക്ഷിക്കപ്പെടുന്നത്. ചിത്രത്തിൽ ഗന്ധർവ്വനായി ഉണ്ണി മുകുന്ദൻ എത്തും. സംവിധാനം വിഷ്ണു അരവിന്ദ് നിര്വഹിക്കുമ്പോള് തിരക്കഥ എഴുതുന്നത് പ്രവീൺ പ്രഭാറാം, സുജിൻ സുജാതൻ എന്നിവര് ചേര്ന്നാണ്.
ഏഷ്യാനെറ്റ് ന്യൂസ് ലൈവ് കാണാന് ഇവിടെ ക്ലിക് ചെയ്യുക