റീ റിലീസ് ഓപണിംഗ് റെക്കോര്ഡ് വീഴ്ത്തുമോ? 'ഛോട്ടാ മുംബൈ' അഡ്വാന്സ് ബുക്കിംഗിലെ പ്രതികരണം ഇങ്ങനെ
Synopsis
മോഹന്ലാലിനെ നായകനാക്കി അന്വര് റഷീദ് ഒരേയൊരു ചിത്രം മാത്രമേ ഒരുക്കിയിട്ടുള്ളൂ
ഇന്ത്യന് സിനിമയിലെ റീ റിലീസ് ട്രെന്ഡില് മലയാളത്തില് നിന്നുള്ള അപ്കമിംഗ് റിലീസ് ആണ് മോഹന്ലാല് നായകനായ ഛോട്ടാ മുംബൈ. മോഹന്ലാല് നായകനാക്കി അന്വര് റഷീദ് സംവിധാനം ചെയ്ത ചിത്രത്തിന്റെ ഒറിജിനല് റിലീസ് 2007 ല് ആയിരുന്നു. 18 വര്ഷങ്ങള്ക്കിപ്പുറമാണ് ചിത്രം കൂടുതല് മിഴിവോടെ വീണ്ടും കാണികളിലേക്ക് എത്തുന്നത്. ചിത്രത്തിന്റെ അഡ്വാന്സ് ബുക്കിംഗിന് മികച്ച പ്രതികരണമാണ് ലഭിക്കുന്നത് പ്രധാന സെന്ററുകളിലെ ശ്രദ്ധേയ സ്ക്രീനുകളിലൊക്കെ ബുക്കിംഗ് ആരംഭിച്ച് ഏറെ വൈകാതെ ഫാസ്റ്റ് ഫില്ലിംഗ് സ്റ്റാറ്റസ് ആണ്. തിരുവനന്തപുരം ഏരീസ് പ്ലെക്സിലും എറണാകുളം കവിതയിലുമൊക്കെ ആദ്യ ഷോകള്ക്ക് വന് ബുക്കിംഗ് ആണ് ഇതിനകം തന്നെ ലഭിച്ചിരിക്കുന്നത്. അതേസമയം റീ റിലീസില് ചിത്രം നേടുന്ന ഓപണിംഗ് എത്രയെന്ന് അറിയാനുള്ള കാത്തിരിപ്പിലാണ് സിനിമാലോകം.
മോഹന്ലാലിനെ നായകനാക്കി അന്വര് റഷീദ് ഒരേയൊരു ചിത്രം മാത്രമേ ഒരുക്കിയിട്ടുള്ളൂ. എന്നാല് അത് അത്രയും എന്റര്ടെയ്ന്മെന്റ് വാല്യു ഉള്ള ഒന്നായിരുന്നു. ബെന്നി പി നായരമ്പലമായിരുന്നു ചിത്രത്തിന്റെ രചയിതാവ്. മിഴിവുറ്റ കഥാപാത്രങ്ങളും രസകരമായ കഥാസന്ദര്ഭങ്ങളും ചിത്രത്തില് ആവോളം ഉണ്ടായിരുന്നു. മോഹന്ലാലിനൊപ്പം വലിയൊരു താരനിരയും ചിത്രത്തില് എത്തി. മോഹന്ലാല് തല എന്ന് കൂട്ടുകാര് വിളിക്കുന്ന വാസ്കോ ഡ ഗാമ ആയപ്പോള് നടേശന് എന്ന പ്രതിനായക കഥാപാത്രത്തെ അവതരിപ്പിച്ചത് കലാഭവന് മണി ആയിരുന്നു. ഭാവന ആയിരുന്നു നായിക. സിദ്ദിഖ്, ജഗതി ശ്രീകുമാര്, ഇന്ദ്രജിത്ത് സുകുമാരന്, മണിക്കുട്ടന്, ബിജുക്കുട്ടന്, സായ് കുമാര്, രാജന് പി ദേവ്, വിനായകന്, മണിയന്പിള്ള രാജു, മല്ലിക സുകുമാരന്, സുരാജ് വെഞ്ഞാറമൂട്, കൊച്ചിന് ഹനീഫ, ഭീമന് രഘു, വിജയരാഘവന്, ബാബുരാജ്, സനുഷ, ഗീത വിജയന്, രാമു, കുഞ്ചന്, നാരായണന്കുട്ടി, സന്തോഷ് ജോഗി, ബിജു പപ്പന്, കൊച്ചുപ്രേമന്, നിഷ സാരംഗ്, ഷക്കീല തുടങ്ങിയവരാണ് ചിത്രത്തില് മറ്റ് കഥാപാത്രങ്ങളെ അവതരിപ്പിച്ചത്.
റീ റിലീസ് ട്രെന്ഡിന്റെ ഭാഗമായി തിയറ്ററുകളിലെത്തിയ ചിത്രങ്ങളില് പ്രേക്ഷകശ്രദ്ധ നേടിയതും നേടാതെപോയവയും ഉണ്ട്. എന്നാല് ഇത്തരത്തില് എത്തിയ മോഹന്ലാല് ചിത്രങ്ങളൊക്കെ തിയറ്ററില് ആളെ എത്തിച്ചിരുന്നു. സ്ഫടികം, ദേവദൂതന്, മണിച്ചിത്രത്താഴ് എന്നിവയാണ് റീ റിലീസ് ആയി സമീപകാലത്ത് എത്തിയ മോഹന്ലാല് ചിത്രങ്ങള്. അതിന് തുടര്ച്ചയെന്നോണം തിയറ്ററുകളില് എത്തുന്ന ചിത്രമാണ് ഛോട്ടാ മുംബൈ.
സിനിമകളിൽ നിന്ന് Malayalam OTT Release വരെ, Bigg Boss Malayalam Season 7 മുതൽ Mollywood Celebrity news, Exclusive Interview വരെ — എല്ലാ Entertainment News ഒരൊറ്റ ക്ലിക്കിൽ. ഏറ്റവും പുതിയ Movie Release, Malayalam Movie Review, Box Office Collection — എല്ലാം ഇപ്പോൾ നിങ്ങളുടെ മുന്നിൽ. എപ്പോഴും എവിടെയും എന്റർടൈൻമെന്റിന്റെ താളത്തിൽ ചേരാൻ ഏഷ്യാനെറ്റ് ന്യൂസ് മലയാളം വാർത്തകൾ