മോഹന്‍ലാലിന് മുന്‍പേ റിലീസ് തീയതി ഉറപ്പിച്ച് അജയ് ദേവ്‍ഗണ്‍; ഹിന്ദി 'ദൃശ്യം 3' എത്തുക ഈ ദിവസം

ചിത്രത്തിന്‍റെ തിരക്കഥാ ജോലികള്‍ പുരോഗമിക്കുകയാണെന്ന് റിപ്പോര്‍ട്ടുകള്‍

ഹിന്ദി ദൃശ്യം 3 നിര്‍മ്മാതാക്കള്‍ ചിത്രം കണ്‍ഫേം ചെയ്തത് സംബന്ധിച്ച വാര്‍ത്തകള്‍ കഴിഞ്ഞ ദിവസം എത്തിയിരുന്നു. നിര്‍മ്മാതാക്കളായ പനോരമ സ്റ്റുഡിയോസ് ആണ് ബോംബെ സ്റ്റോക്ക് എക്സ്ചേഞ്ചില്‍ ഫയല്‍ ചെയ്ത വിവരങ്ങളില്‍ ദൃശ്യം 3 ന്‍റെ കാര്യവും ഉള്‍പ്പെടുത്തിയിരുന്നത്. ദൃശ്യം 3 സജീവ നിര്‍മ്മാണത്തില്‍ ആണെന്നും അഭിഷേക് പതക് സംവിധാനം ചെയ്യുന്ന ചിത്രത്തില്‍ അജയ് ദേവ്ഗണ്‍ ആയിരിക്കും നായകനെന്നും നിര്‍മ്മാണ കമ്പനി നല്‍കിയ വിവരത്തില്‍ ഉണ്ട്. കമ്പനി ബോംബെ സ്റ്റോക്ക് എക്സ്ചേഞ്ചില്‍ നല്‍കിയ വിവരങ്ങളില്‍ കൗതുകകരമായ മറ്റൊരു കാര്യം കൂടിയുണ്ട്. ചിത്രത്തിന്‍റെ റിലീസ് തീയതിയാണ് അത്.

2026 ലെ ഗാന്ധി ജയന്തി ദിനത്തില്‍ (ഒക്ടോബര്‍ 2) ചിത്രം തിയറ്ററുകളില്‍ എത്തുമെന്നാണ് നിര്‍മ്മാതാക്കള്‍ അറിയിച്ചിരിക്കുന്നത്. നിലവില്‍ ഹിന്ദിയില്‍ മറ്റ് ചിത്രങ്ങളൊന്നും ഈ റിലീസ് തീയതിയില്‍ എത്തുമെന്ന് പ്രഖ്യാപിച്ചിട്ടില്ല. അതിനാല്‍ ഒരു സോളോ റിലീസ് ആഗ്രഹിച്ച് തന്നെയാണ് നിര്‍മ്മാതാക്കള്‍ ഈ ദിവസം തെര‍‍ഞ്ഞെടുത്തിരിക്കുന്നത്. അതേസമയം ഷാരൂഖ് ഖാനെ നായകനാക്കി സിദ്ധാര്‍ഥ് ആനന്ദ് സംവിധാനം ചെയ്യുന്ന കിംഗ് എന്ന ചിത്രം ഇതേ ദിവസം തിയറ്ററുകളില്‍ എത്തിയേക്കുമെന്ന് റിപ്പോര്‍ട്ടുകള്‍ ഉണ്ടായിരുന്നു. എന്നാല്‍ ഇക്കാര്യത്തില്‍ ഔദ്യോഗിക പ്രതികരണങ്ങളൊന്നും ഇതുവരെ എത്തിയിട്ടില്ല. 

അതേസമയം അഭിഷേക് പതക് സംവിധാനം ചെയ്യുന്ന ഹിന്ദി ദൃശ്യം 3 നിലവില്‍ രചനാ ഘട്ടത്തില്‍ ആണെന്നാണ് ദേശീയ മാധ്യമങ്ങളില്‍ വരുന്ന റിപ്പോര്‍ട്ടുകള്‍. വയാകോം 18 സ്റ്റുഡിയോസുമായി ചേര്‍ന്നാണ് പനോരമ സ്റ്റുഡിയോസ് ചിത്രം നിര്‍മ്മിക്കുന്നത്. ഈ വര്‍ഷാവസാനം ഹിന്ദി ദൃശ്യം 3 ന്‍റെ ചിത്രീകരണം ആരംഭിക്കുമെന്നും ദേശീയ മാധ്യമങ്ങളിലെ റിപ്പോര്‍ട്ടുകളില്‍ ഉണ്ട്. ഇക്കുറി മലയാളം ദൃശ്യം 3 ല്‍ നിന്ന് വ്യത്യസ്തമായിരിക്കും ഹിന്ദി ചിത്രമെന്നും.

അതേസമയം ഈ വര്‍ഷം ഫെബ്രുവരി 20 നാണ് മോഹന്‍ലാലും ജീത്തുവും അടക്കമുള്ളവര്‍ സോഷ്യല്‍ മീഡിയയിലൂടെ ദൃശ്യം 3 ഔദ്യോഗികമായി പ്രഖ്യാപിച്ചത്. ബഹുഭാഷകളില്‍ മലയാളത്തില്‍ നിന്നുള്ള പാന്‍ ഇന്ത്യന്‍ റിലീസ് ആയി എത്താന്‍ സ്കോപ്പ് ഉള്ള ചിത്രമാണിത്. അതേസമയം അഭിഷേക് പതക്കും സഹ രചയിതാക്കളും ചേര്‍ന്ന് ദൃശ്യം മൂന്നാം ഭാ​ഗത്തിന്‍റെ ആശയം ജീത്തു ജോസഫിന് മുന്നില്‍ അവതരിപ്പിച്ചെന്ന് 2023 ജൂണില്‍ ചില ദേശീയ മാധ്യമങ്ങള്‍ റിപ്പോര്‍ട്ട് ചെയ്തിരുന്നു. അഭിഷേക് പതക്ക് അവതരിപ്പിച്ച ആശയം ജീത്തുവിന് ഇഷ്ടമായെന്നും ഇതിനെ മുന്‍നിര്‍ത്തി ജീത്തു ജോസഫ് ചിത്രത്തിന്‍റെ തിരക്കഥ രൂപപ്പെടുത്തുകയാണെന്നും. പ്രതീക്ഷിക്കപ്പെടുന്നതുപോലെ പ്രോജക്റ്റ് യാഥാര്‍ഥ്യമാവുന്നപക്ഷം ഹിന്ദി, മലയാളം പതിപ്പുകള്‍ ഒരുമിച്ച്, ഒരേ ദിവസം തിയറ്ററുകളില്‍ എത്തിക്കാനാണ് കൂട്ടായ തീരുമാനമെന്നും ഇതേ റിപ്പോര്‍ട്ടില്‍ ഉണ്ടായിരുന്നു. എന്നാല്‍ ഈ റിപ്പോര്‍ട്ടുകളെ തള്ളി ജീത്തു പ്രതികരിച്ചിരുന്നു. ദൃശ്യം 3 നായി പുറത്തുനിന്ന് കഥ എടുക്കില്ലെന്നും കഥ കേട്ടെന്ന് പറയുന്നത് വാസ്തവമല്ലെന്നുമായിരുന്നു അദ്ദേഹത്തിന്‍റെ പ്രതികരണം. ആദ്യ രണ്ട് ഭാഗങ്ങളില്‍ നിന്ന് വ്യത്യസ്തമായി ഹിന്ദി ദൃശ്യം 3 മലയാളവുമായി ബന്ധമില്ലാത്ത ഇന്‍ഡിപെന്‍ഡന്‍റ് പ്രൊഡക്ഷന്‍ ആയിരിക്കുമോ എന്നതാണ് കണ്ടറിയേണ്ട കൗതുകം.

ഏഷ്യാനെറ്റ് ന്യൂസ് ലൈവ് കാണാം