'ആ ഫോണ് കോള് ഞാന് വിളിക്കരുതായിരുന്നു'; വിവാദത്തില് പ്രതികരണവുമായി ജോജു ജോര്ജ്
Synopsis
ജോജുവിന്റെ ഫോണ് കോളിന്റെ റെക്കോര്ഡ് സോഷ്യല് മീഡിയയില് കാര്യമായി പ്രചരിച്ചിരുന്നു
തന്റെ സംവിധാന അരങ്ങേറ്റ ചിത്രം പണിയെ വിമര്ശിച്ച് സോഷ്യല് മീഡിയയില് പോസ്റ്റ് ഇട്ട പ്രേക്ഷകനെ ജോജു ജോര്ജ് ഫോണില് വിളിച്ച് ഭീഷണിപ്പെടുത്തിയത് ചര്ച്ചയും വിവാദവുമായിരുന്നു. ആദര്ശ് എച്ച് എസ് എന്നയാളെയാണ് ജോജു ഫോണില് വിളിച്ചത്. ഇതിന്റെ ഓഡിയോ റെക്കോര്ഡ് ആദര്ശ് തന്നെ സോഷ്യല് മീഡിയയിലൂടെ പുറത്തുവിട്ടിരുന്നു. പിന്നാലെ പ്രതികരണവുമായി ജോജു ജോര്ജും എത്തിയിരുന്നു. പോസ്റ്റ് എഴുതിയയാള് പല സ്ഥലങ്ങളില് അത് കോപ്പി പേസ്റ്റ് ചെയ്തുവെന്നും സിനിമയിലെ സ്പോയിലര് പ്രചരിപ്പിച്ചുവെന്നും ജോജു സോഷ്യല് മീഡിയയിലൂടെ പറഞ്ഞിരുന്നു. ഇപ്പോഴിതാ പങ്കെടുത്ത ഒരു വേദിയിലും ജോജു ഈ വിഷയത്തില് പ്രതികരിച്ചിരിക്കുകയാണ്.
സൗദിയിലെ റിയാദില് നടന്ന ചിത്രത്തിന്റെ പ്രൊമോഷണല് വേദിയിലാണ് ജോജു ഇക്കാര്യം പറഞ്ഞത്. "സിനിമയുടെ റിവ്യൂ പറഞ്ഞതിലല്ല (ആ ഫോണ് കോള്). ടിക്കറ്റ് എടുത്ത് സിനിമ കണ്ട എല്ലാവരും അഭിപ്രായം പറയണം. ഇഷ്ടപ്പെട്ടില്ലെങ്കില് ഇഷ്ടപ്പെട്ടില്ലെന്ന് പറയണം. പക്ഷേ ഒരു പോസ്റ്റ് ഒരുപാട് സ്ഥലങ്ങളില് പ്രചരിപ്പിച്ചു. അതിന്റെ പേരില് ഉണ്ടായ കോലാഹലത്തില് ഞാന് ഒരു കോള് ചെയ്തുപോയി. അത് വിളിക്കരുതായിരുന്നു", ജോജു ജോര്ജ് പറയുന്നു. ആദ്യമായിട്ടാണ് തന്റെ ഒരു സിനിമയ്ക്ക് തിയറ്ററുകളില് ഇത്രയും സ്വീകരണം കിട്ടുന്നതെന്നും ജോജു കൂട്ടിച്ചേര്ത്തു. ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിച്ച സാഗര് സൂര്യ, ജുനൈസ് വി പി, ബോബി കുര്യന് തുടങ്ങിയവരും ജോജുവിനൊപ്പം എത്തിയിരുന്നു.
ആക്ഷന് ത്രില്ലര് ഗണത്തില് പെടുന്ന ചിത്രം ഒക്ടോബര് 24 നാണ് തിയറ്ററുകളില് എത്തിയത്. പ്രേക്ഷകരില് നിന്ന് പോസിറ്റീവ് മൗത്ത് പബ്ലിസിറ്റി നേടിയ ചിത്രം ബോക്സ് ഓഫീസില് മികച്ച പ്രകടനമാണ് കാഴ്ച വച്ചത്.
സിനിമകളിൽ നിന്ന് Malayalam OTT Release വരെ, Bigg Boss Malayalam Season 7 മുതൽ Mollywood Celebrity news, Exclusive Interview വരെ — എല്ലാ Entertainment News ഒരൊറ്റ ക്ലിക്കിൽ. ഏറ്റവും പുതിയ Movie Release, Malayalam Movie Review, Box Office Collection — എല്ലാം ഇപ്പോൾ നിങ്ങളുടെ മുന്നിൽ. എപ്പോഴും എവിടെയും എന്റർടൈൻമെന്റിന്റെ താളത്തിൽ ചേരാൻ ഏഷ്യാനെറ്റ് ന്യൂസ് മലയാളം വാർത്തകൾ