മണികണ്ഠന്റെ സംവിധാനത്തില്‍ വെബ് സീരീസില്‍ വിജയ് സേതുപതി

വിജയ് സേതുപതി വെബ് സീരീസില്‍ അഭിനയിക്കുന്നു.

തെന്നിന്ത്യയിലെ മികച്ച താരങ്ങളില്‍ ഒരാളാണ് വിജയ് സേതുപതിയെന്നത് എടുത്തുപറയേണ്ട ആവശ്യമില്ല. ഒന്നിനൊന്ന് വ്യത്യസ്‍തമായ കഥാപാത്രങ്ങളായി എത്തിക്കൊണ്ടിരിക്കുന്ന വിജയ് സേതുപതി നായകനാകുന്ന പുതിയ ചിത്രം 'ഡിഎസ്‍പി' ആണ്. വിജയ് സേതുപതി ചിത്രത്തിന്റെ ഫസ്റ്റ് ലുക്ക് ഓണ്‍ലൈനില്‍ തരംഗമായിരുന്നു. ഡിസ്‍നി പ്ലസ് ഹോട്ട് സ്റ്റാര്‍ വൻ ബജറ്റില്‍ നിര്‍മിക്കുന്ന വെബ്‍ സീരീസില്‍ വിജയ് സേതുപതി അഭിനയിക്കുന്നുവെന്നാണ് പുുതിയ റിപ്പോര്‍ട്ട്.

'കാക്ക മുട്ടൈ' ഫെയിം മണികണ്ഠൻ ആയിരിക്കും വെബ്‍ സീരീസ് സംവിധാനം ചെയ്യുന്നത്. 'ഡിഎസ്‍പി' എന്ന ചിത്രത്തിന്റെ സംവിധാനം പൊൻറാം നിര്‍വഹിക്കുമ്പോള്‍ നായിക അനുകീര്‍ത്തി വാസാണ്. ദിനേഷ് കൃഷ്‍ണനും വെങ്കടേഷും ആണ് ഛായാഗ്രാഹണം നിര്‍വഹിക്കുന്നത്. വിവേക് ഹര്‍ഷൻ ചിത്രസംയോജനം നിര്‍വഹിക്കുമ്പോള്‍ സംഗീത സംവിധാനം ഡി ഇമ്മനാണ്. 'ഡിഎസ്‍പി' എന്ന ചിത്രത്തിന്റെ റിലീസ് പ്രഖ്യാപിച്ചിട്ടില്ല. കാര്‍ത്തിക് സുബ്ബരാജ് ആണ് ചിത്രം നിര്‍മിക്കുന്നത്. സ്റ്റോണ്‍ ബെഞ്ച് ഫിലിംസിന്റെ ബാനറിലാണ് ചിത്രത്തിന്റെ നിര്‍മാണം.

വിജയ് സേതുപതി പ്രധാന കഥാപാത്രമാകുന്ന ചിത്രം 'മെറി ക്രിസ്‍മസ്' റിലീസ് അടുത്തവര്‍ഷത്തേയ്‍ക്ക് മാറ്റിയിരുന്നു.  കത്രീന കൈഫ് നായികയാകുന്ന ചിത്രം ശ്രീറാം രാഘവൻ ആണ് സംവിധാനം ചെയ്യുന്നത്. മധു നീലകണ്ഠനാണ് ചിത്രത്തിന്റെ ഛായാഗ്രാഹണം നിര്‍വഹിക്കുന്നത്. സഞ്‍ജയ് കപൂര്‍, ടിന്നു ആനന്ദ്, വിനയ് പതക്, പ്രതിമ കസ്‍മി, രാധിക ശരത്‍കുമാര്‍, കവിൻ ജയ് ബാബു, ഷണ്‍മുഖരാജൻ എന്നിവരും അഭിനയിക്കുന്ന ചിത്രത്തിന്റെ ചിത്രസംയോജനം നിര്‍വഹിക്കുന്നത് പ്രീതം ആണ്.

വിജയ് സേതുപതി ബോളിവുഡ് ചിത്രത്തിലും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. അറ്റ്‍ലീ സംവിധാനം ചെയ്യുന്ന 'ജവാൻ' എന്ന ചിത്രത്തിലാണ് വിജയ് സേതുപതി അഭിനയിക്കുന്നത്. ഷാരൂഖ് ഖാനാണ് ചിത്രത്തില്‍ നായകനാകുന്നത്.  'ജവാൻ' എന്ന ചിത്രത്തില്‍ നയൻതാര നായികയാകുമ്പോള്‍ സാന്യ മല്‍ഹോത്ര, പ്രിയാമണി, ദീപിക പദുക്കോണ്‍, സുനില്‍ ഗ്രോവര്‍ എന്നിവരും അഭിനയിക്കുന്നു. റുബൻ ആണ് ചിത്രത്തിന്റെ ചിത്രസംയോജനം നിര്‍വഹിക്കുന്നത്. ജി കെ വിഷ്‍ണുവാണ് ചിത്രത്തിന്റെ ഛായാഗ്രാഹണം. അനിരുദ്ധ് രവിചന്ദ്രനാണ് ചിത്രത്തിന്റെ സംഗീത സംവിധായകൻ.