പച്ച ബ്ലൗസും ചുവപ്പ് സാരിയും സ്വര്‍ണ്ണാഭരണങ്ങളുമായി കങ്കണ രാജസദസിന് സമാനമായ സെറ്റില്‍ ചുവടുവയ്ക്കുന്ന ചിത്രമാണ്...
ചെന്നൈ: ജയലളിതയുടെ ജീവിതം പറയുന്ന തലൈവിയിലെ കങ്കണയുടെ 'ന്യൂ ലുക്ക്' പുറത്തുവിട്ടു. നര്‍ത്തകിയുടെ വേഷത്തിലാണ് പോസ്റ്ററില്‍ കങ്കണ പ്രത്യക്ഷപ്പെടുന്നത്. പച്ച ബ്ലൗസും ചുവപ്പ് സാരിയും സ്വര്‍ണ്ണാഭരണങ്ങളുമായി കങ്കണ രാജസദസിന് സമാനമായ സെറ്റില്‍ ചുവടുവയ്ക്കുന്നതിന്‍റെ ചിത്രമാണ് ഇതെന്ന് വ്യക്തം.
എ എല്‍ വിജയ് ആണ് തലൈവി സംവിധാനം ചെയ്യുന്നത്. തെന്നിന്ത്യന്‍ നടിയില്‍ നിന്ന് ശക്തയായ രാഷ്ട്രീയ പ്രവര്‍ത്തകയിലേക്കുള്ള ജയലളിതയുടെ പ്രയാണമാണ് സിനിമ. നവംബര്‍ 2019 ല്‍ ചിത്രത്തിന്‍റെ ഫസ്റ്റ് ലുക്ക് പുറത്തുവിട്ടിരുന്നു. അതേസമയം കങ്കണയുടെ രാഷ്ട്രീയക്കാരിയായ ജയലളിതയിലേക്കുള്ള രൂപമാറ്റം വ്യക്തമാക്കുന്ന ആ പോസ്റ്റര്‍ ഏറെ വിമര്‍ശനം ഏറ്റുവാങ്ങിയിരുന്നു. 'വ്യാജം' എന്നാണ് ആളുകള്‍ ഇതിനെ വിളിച്ചത്.
ചിത്രത്തില്‍ എംജിആര്‍ ആയി എത്തുന്നത് അരവിന്ദ് സ്വാമിയാണ്. അദ്ദേഹത്തിന്‍റെ ഫസ്റ്റ് ലൂക്ക് കഴിഞ്ഞ മാസം പുറത്തുവിട്ടിരുന്നു. ജൂണ്‍ 26 ന് തമിഴ് , തെലുഗു, ഹിന്ദി ഭാഷകളിലായി ചിത്രം റിലീസ് ചെയ്യും.