'ചന്ദ്രു വക്കീല്‍' കരിയറിലെ നാഴികക്കല്ല, 'ജയ് ഭീമി'ന്റെ ഒന്നാം വാര്‍ഷികത്തില്‍ സൂര്യ

'ജയ് ഭീമി'ന്റെ ഒന്നാം വാര്‍ഷികത്തില്‍ സന്തോഷം പ്രകടിപ്പിച്ച് സൂര്യ.  

തമിഴകം ചര്‍ച്ച ചെയ്‍ത ചിത്രമായിരുന്നു സൂര്യ നായകനായ 'ജയ് ഭീം'. പ്രമേയത്തിന്റെ കരുത്തായിരുന്നു അതിന് കാരണം. 'ജയ് ഭീമെ'ന്ന ചിത്രം അടിസ്ഥാനവര്‍ഗത്തിന്റെ നീതിക്കുവേണ്ടിയുള്ള പോരാട്ടത്തെ കുറിച്ചാണ് പറയുന്നത്. 2 ഡി എന്‍റര്‍ടെയ്‍ന്‍മെന്‍റിന്‍റെ ബാനറില്‍ താൻ നിര്‍മിച്ച ജയ് ഭീം റിലീസ് ചെയ്‍ത് ഒരു വര്‍ഷം തികയുന്നതിന്റെ സന്തോഷം പങ്കുവെച്ചിരിക്കുകയാണ് ഇപ്പോള്‍ സൂര്യ.

ഇതുപോലെ ഒരു അര്‍ഥവത്തായ സിനിമ നല്‍കിയതിന് ജ്ഞാനവേലിനും ടീമിനും നന്ദി പറയുന്നുവെന്നാണ് സൂര്യ ട്വീറ്റ് ചെയ്‍തിരിക്കുന്നത്. കരിയറില്‍ ഒരു നാഴികക്കല്ലായ കഥാപാത്രമാണ് 'ചന്ദ്രു വക്കീല്‍' എന്നും സൂര്യ പറയുന്നു. ത സെ ജ്ഞാനവേലിന്റെ സംവിധാനത്തിലായിരുന്നു ചിത്രം എത്തിയത്. മലയാളി താരങ്ങളായ ലിജോമോള്‍ ജോസും രജിഷ വിജയനും ചിത്രത്തില്‍ പ്രധാന കഥാപാത്രങ്ങളായി എത്തിയിരുന്നു. 'ജയ് ഭീം' ചിത്രത്തിന്റെ തിരക്കഥയും ത സെ ജ്ഞാനവേലിന്റേതാണ്. യുഗഭാരതി ആണ് ചിത്രത്തിന്റെ ഗാനരചയിതാവ്. സീൻ റോള്‍ദാനാണ് ചിത്രത്തിന്റെ സംഗീത സംവിധാനം നിര്‍വഹിച്ചത്.

സിരുത്തൈ ശിവ സംവിധാനം ചെയ്യുന്ന ചിത്രത്തിലാണ് സൂര്യ ഇപ്പോള്‍ അഭിനയിച്ചുകൊണ്ടിരിക്കുന്നത്.  'സൂര്യ 42' എന്ന് പേരിട്ടിരിക്കുന്ന ചിത്രം പ്രേക്ഷകര്‍ ഏറെ പ്രതീക്ഷയോടെ കാത്തിരിക്കുന്ന ഒന്നാണ്. സ്റ്റുഡിയോ ഗ്രീനിന്റെ ബാനറില്‍ കെ ഇ ജ്ഞാനവേല്‍രാജയും യു വി ക്രിയേഷൻസിന്റെ ബാനറില്‍ വംശി പ്രമോദും ചേര്‍ന്നാണ് ചിത്രം നിര്‍മിക്കുന്നത്. പ്രൊഡക്ഷൻ കണ്‍ട്രോളര്‍ ആര്‍ എസ് സുരേഷ് മണ്യൻ ആണ്. പ്രൊഡക്ഷൻ എക്സിക്യുട്ടീവ് രാമ ദോസ്സ് ആണ്. പ്രൊഡക്ഷൻ കോര്‍ഡിനേറ്റര്‍ ഇ വി ദിനേശ് കുമാറുമാണ്. 'സൂര്യ 42'ന്റെ ഫസ്റ്റ് ലുക്ക് പ്രേക്ഷകര്‍ ഏറ്റെടുത്തിരുന്നു.

ദിഷാ പതാനി നായികയാകുന്ന 'സൂര്യ 42'ന്റെ സംഭാഷണങ്ങള്‍ എഴുതുന്നത് മദൻ കര്‍ക്കിയാണ്. വിവേകയും മദൻ കര്‍കിയും ഗാനരചന നിര്‍വഹിക്കുമ്പോള്‍ ദേവി ശ്രീ പ്രസാദ് ആണ് സംഗീത സംവിധായകൻ. വെട്രി പളനിസാമിയാണ് ഛായാഗ്രാഹണം നിര്‍വഹിക്കുന്നത്. നിഷാദ് യൂസഫ് ആണ് ചിത്രസംയോജനം നിര്‍വഹിക്കുക.