'ജീവന്‍ രാജായി' സൈജു കുറുപ്പ്; ചിരിപ്പിച്ച് 'മധുര മനോഹര മോഹ'ത്തിന്റെ പുതിയ ടീസര്‍ പുറത്ത്

'മധുരം മനോഹരം മോഹ'ത്തിന്റെ പുതിയ ടീസര്‍ പുറത്ത്.

രണ്ടാംവാരത്തിലേക്ക് എത്തി വിജയകരമായി പ്രദര്‍ശിപ്പിച്ചുകൊണ്ടിരിക്കുന്ന ചിത്രം 'മധുരം മനോഹരം മോഹ'ത്തിന്റെ പുതിയ ടീസര്‍ പുറത്തുവിട്ടു. ഇംഗ്ലീഷ് ഗാനശകലത്തിന്റെ അകമ്പടിയോടെ സൈജുവിന്റെ കഥാപാത്രമായ 'ജീവന്‍ രാജി'നെ പ്രേക്ഷകര്‍ക്ക് പരിചയപ്പെടുത്തിക്കൊണ്ടാണ് ടീസര്‍ ഒരുക്കിയിരിക്കുന്നത്. കാഴ്‍ചക്കാരെ രസിപ്പിക്കുന്ന മുഴുനീള എന്റര്‍ടെയ്‍നറാണ് ചിത്രം എന്നാണു പ്രേക്ഷകാഭിപ്രായം. മികച്ച അഭിപ്രായമുള്ളതിനാല്‍ തിങ്കളാഴ്‍ച മുതല്‍ ചിത്രത്തിന് കേരളത്തിലുടനീളം കൂടുതല്‍ പ്രദര്‍ശനങ്ങള്‍ ലഭിച്ചിരുന്നു.

സ്റ്റെഫി സേവ്യര്‍ ആണ് ചിത്രം സംവിധാനം ചെയ്‍തിരിക്കുന്നത്. ഷറഫുദ്ധീൻ, രജിഷ വിജയൻ എന്നിവരാണ് ചിത്രത്തില്‍ പ്രധാന വേഷങ്ങളില്‍ എത്തിയിരിക്കുന്നത്. ചന്ദ്രു സെല്‍വ രാജ ആണ് ചിത്രത്തിന്റെ ഛായാഗ്രാഹണം നിര്‍വഹിച്ചിരിക്കുന്നത്. മഹേഷ് ഗോപാലും ജയ് വിഷ്‍ണുവുമാണ് തിരക്കഥ എഴുതിയിരിക്കുന്നത്.

ബിത്രീഎം ക്രിയേഷൻസിന്റെ ഏറ്റവും പുതിയ ചിത്രമാണ് ഇത്. 'ഹൃദയം' എന്ന സൂപ്പര്‍ഹിറ്റ് മലയാള ചിത്രത്തിലെ ഗാനങ്ങളിലൂടെ ശ്രദ്ധയാകര്‍ഷിച്ച ഹിഷാം അബ്‍ദുള്‍ വഹാബ് ആണ് സംഗീത സംവിധായകൻ. നിര്‍മാണ നിര്‍വ്വഹണം ഷബീര്‍ മലവെട്ടത്ത്. അപ്പു ഭട്ടതിരിയാണ് ചിത്രത്തിന്റെ എഡിറ്റിംഗ്.

പത്തനംതിട്ടയിലെ ജില്ലയിലെ നായര്‍ തറവാട്ടിനെ കേന്ദ്രീകരിച്ചാണ് സൈജു കുറുപ്പ്, അല്‍ത്താഫ് സലിം, വിജയരാഘവൻ, സുനില്‍ സുഗത, ബിജു സോപാനം, ബിന്ദു പണിക്കര്‍ എന്നിവരും വേഷമിടുന്ന ചിത്രത്തിന്റെ അവതരണം. ഒരു കുടുംബത്തില്‍ അരങ്ങേറുന്ന കൊച്ചു കൊച്ചു കാര്യങ്ങള്‍ തികഞ്ഞ നര്‍മത്തിന്റെ മേമ്പൊടിയോടെ അവതരിപ്പിക്കുകയും ഒപ്പം ചില സന്ദേശങ്ങളും ഷറഫുദ്ധീന്റെ ഈ ചിത്രം നല്‍കുന്നു എന്നാണ് റിപ്പോര്‍ട്ട്. ജയൻ ക്രയോണാണ് ചിത്രത്തിന്റെ കലാസംവിധാനം. മേക്കപ്പ് റോണക്സ് സേവ്യര്‍, കോസ്റ്റ്യും ഡിസൈൻ സനൂജ് ഖാൻ, പിആര്‍ഒ വാഴൂര്‍ ജോസ്, ആതിര ദില്‍ജിത്ത്, ഡിസൈനുകള്‍ യെല്ലോടൂത്ത്‌സ്, ഡിജിറ്റല്‍ മാര്‍ക്കറ്റിങ് ഒബ്‍സ്‍ക്യൂറ എന്നിവരുമാണ് ചിത്രത്തിന്റെ മറ്റ് പ്രവര്‍ത്തകര്‍.

'ഇതാണ് ഒറിജിനലെങ്കിൽ അത് ഭൂമിക്കുതന്നെ ഭാരം'; ഫിറോസ് ഖാനുമായുള്ള അഭിമുഖം