Lalitham Sundaram : മലയാളത്തിന്റെ നൊസ്റ്റാള്‍ജിക് ഗാനങ്ങള്‍, 'ലളിതം സുന്ദരം' വീഡിയോ കാണാം

പഴയ മലയാള സിനിമകളിലെ ഹിറ്റ് മെലഡികളാണ് ഗാനരംഗത്ത് ഉപയോഗിച്ചിരിക്കുന്നത് (Lalitham Sundaram).

മഞ്‍ജു വാര്യര്‍ ചിത്രമായി ഏറ്റവും ഒടുവില്‍ പ്രദര്‍ശനത്തിന് എത്തിയത് 'ലളിതം സുന്ദര'മാണ്. 'ലളിതം സുന്ദരം' സിനിമ സംവിധാനം ചെയ്‍തത് മഞ്‍ജു വാര്യരുടെ സഹോദരനും നടനുമായ മധു വാര്യരാണ്. 'ലളിതം സുന്ദരം' സിനിമയുടെ വിശേഷണങ്ങള്‍ ഓണ്‍ലൈനില്‍ തരംഗമായിരുന്നു. ലളിതം സുന്ദരം ചിത്രത്തിലെ ഗാനരംഗത്തിന്റെ വീഡിയോ പുറത്തുവിട്ടിരിക്കുകയാണ് ഇപ്പോള്‍ (Lalitham Sundaram).

പഴയ മലയാള സിനിമകളിലെ ഹിറ്റ് മെലഡികളാണ് 'ലളിതം സുന്ദര'ത്തിനായി ഉപയോഗിച്ചിരിക്കുന്നത്. ഹരിശങ്കര്‍, അഞ്‍ജലി വാര്യര്‍, ബിജു മേനോൻ, ആനി അമീ, നന്ദു കര്‍ത്ത, രഞ്‍ജിത് ജയരാമൻ എന്നിവരാണ് ഗാനങ്ങള്‍ പാടിയിരിക്കുന്നത്. വളരെ മനോഹരമായിട്ടാണ് ചിത്രത്തില്‍ പഴയ കാല ഗാനങ്ങള്‍ കോര്‍ത്തിണക്കിയിരിക്കുന്നത്.  ഡിസ്‍നി പ്ലസ് ഹോട്‍സ്റ്റാറിലാണ് ചിത്രം റിലീസ് ചെയ്‍തത്.

മഞ്‍ജു വാര്യര്‍ ആണ്  ചിത്രം നിര്‍മിച്ചതും. മഞ്‍ജു വാര്യർ പ്രൊഡക്ഷൻസിനൊപ്പം ചിത്രത്തിന്റെ നിര്‍മാണത്തില്‍ സെഞ്ച്വറിയും പങ്കാളിയാകുന്നു. ഇരുപതു വര്‍ഷങ്ങള്‍ക്ക് ശേഷം ബിജു മേനോനൊപ്പം നായികയായി മഞ്‍ജു വാര്യര്‍ അഭിനയിച്ചുവെന്ന പ്രത്യേകതയും ചിത്രത്തിനുണ്ട്.  മഞ്‍ജു വാര്യര്‍ തന്നെയാണ് ചിത്രത്തിന്റെ കേന്ദ്ര സ്ഥാനത്ത്.

സൈജു കുറുപ്പ്, സുധീഷ്, അനു മോഹന്‍, രഘുനാഥ് പലേരി, രമ്യ നമ്പീശൻ, സറീന വഹാബ്,  വിനോദ് തോമസ്, ആശാ അരവിന്ദ്, അഞ്‍ജന അപ്പുക്കുട്ടന്‍, മാസ്റ്റര്‍ ആശ്വിന്‍ വാര്യര്‍, ബേബി തെന്നല്‍ അഭിലാഷ് എന്നിവരും ചിത്രത്തില്‍ അഭിനയിക്കുന്നു. പ്രമോദ് മോഹൻ ആണ് ചിത്രത്തിന്റെ തിരക്കഥ എഴുതുന്നത്. പി സുകുമാർ, ഗൗതം ശങ്കർ എന്നിവരാണ് 'ലളിതം സുന്ദര'ത്തിന്റെ ഛായാഗ്രാഹണം. മോശമല്ലാത്ത പ്രതികരണമായിരുന്നു ചിത്രത്തിന് പ്രേക്ഷകില്‍ നിന്ന് ലഭിച്ചത്.

'ലളിതം സുന്ദരം' എന്ന ചിത്രത്തിന്റെ പ്രമോഷന്റെ ഭാഗമായി അടുത്തിടെ മധു വാര്യരുടെ സുഹൃത്ത് സ്‍കൈഡൈവ് നടത്തിയത് ചര്‍ച്ചയായിരുന്നു.  ചിത്രത്തിന്റെ സംവിധായകൻ മധു വാര്യർക്കും,  ചിത്രത്തിനും, ഇതിൽ പ്രവർത്തിച്ച ഓരോരുത്തർക്കും ആശംസകളേകി സഹപാഠി രാജിവ് രാഘവനാണ് സ്‍കൈഡൈവ് നടത്തിയത്.   'ലളിതം സുന്ദരം' എന്നെഴുതിയ വസ്‍ത്രം ധരിച്ചു കൊണ്ടായിരുന്നു സ്‍കൈഡൈവിംഗ്. ദുബായിൽ പ്രവർത്തിക്കുന്ന ജെംസ് ലെഗസി സ്‌കൂളിന്റെ, സ്‌കൂൾ ഓഫ് ഓപ്പറേഷൻസിന്റെ മാനേജർ ആണ് രാജീവ് രാഘവൻ. സൗഹൃദത്തിന് വേണ്ടി ഏതറ്റം വരെയും പോകും എന്ന് കാണിച്ചു തരുന്ന രാജീവ് രാഘവൻ പറയുന്നത്, ജീവിതത്തിലെ ഇതുപോലെ ഉള്ള ആഗ്രഹങ്ങൾ ഓരോന്നായി നടത്തിയെടുത്താൽ നമ്മുക്ക് 'ലളിതവും സുന്ദര'വുമായി സന്തോഷത്തോടെ മുന്നോട്ടു പോകാം എന്ന് കൂടിയാണ്. തന്റെ സുഹൃത്തിനു ഉള്ള ഒരു സർപ്രൈസ് സമ്മാനമായാണ് അദ്ദേഹം ഈ ആകാശ ചാട്ടം പ്ലാൻ ചെയ്‍തതും വിജയകരമായി തന്നെ നിർവ്വഹിച്ചതും.

മധു വാര്യരുടെ ആദ്യ സംവിധാന സംരഭമാണ് 'ലളിതം സുന്ദരം'. 'ദ ക്യാംപസ്', 'നേരറിയാൻ സിബിഐ' തുടങ്ങി ഒട്ടേറെ ചിത്രങ്ങളില്‍ അഭിനയിച്ചിട്ടുണ്ട് മധു വാര്യര്‍. കൊവിഡ് അടക്കമുള്ള പ്രതിസന്ധികള്‍ കാരണമായിരുന്നു 'ലളിതം സുന്ദരം' റിലീസ് വൈകിയത്. എന്തായാലും ഡയറക്ട് ഒടിടിയായി ചിത്രം പ്രദര്‍ശനത്തിയപ്പോള്‍ പ്രേക്ഷകര്‍ സ്വീകരിച്ചതിന്റെ സന്തോഷത്തിലാണ് മധു വാര്യരടക്കമുള്ളവര്‍.