Bermuda Song : 'ബര്മുഡ'യ്ക്കായി മോഹന്ലാല് പാടിയ ഗാനം പുറത്തിറക്കി മമ്മൂട്ടി- വീഡിയോ
Synopsis
ഷെയ്ൻ നിഗം ചിത്രത്തിനായി നടൻ മോഹൻലാല് പാടിയ ഗാനം കേള്ക്കാം (Bermuda Song).
ടി കെ രാജീവ് കുമാര് സംവിധാനം ചെയ്യുന്ന ചിത്രമാണ് 'ബര്മുഡ'. ഷെയ്ന് നിഗം, വിനയ് ഫോര്ട് എന്നിവരാണ് ചിത്രത്തില് പ്രധാന കഥാപാത്രങ്ങളാകുന്നത്. 'ബര്മുഡ'യ്ക്കായി മോഹന്ലാല് പാടിയ ഗാനത്തിന്റെ ലിറിക്കല് വീഡിയോ പുറത്തുവിട്ടിരിക്കുകയാണ്. മമ്മൂട്ടി ആണ് സാമൂഹ്യ മാധ്യമ പേജിലൂടെ ഗാനം പുറത്തിറക്കിയത് (Bermuda Song).
നേരത്തെ ടി കെ രാജീവ് കുമാറിന്റെ 'കണ്ണെഴുതി പൊട്ടുംതൊട്ട്' എന്ന ചിത്രത്തിലും മോഹൻലാൽ പാടിയിരുന്നു. ചിത്രത്തിലെ 'കൈതപ്പൂവിൻ കന്നികുറുമ്പിൽ' എന്ന് തുടങ്ങുന്ന ഗാനം ഇന്നും മലയാളികളുടെ ഇഷ്ടഗാനങ്ങളിൽ ഒന്നാണ്. പുതിയ ഗാനവും ആരാധകര് ഏറ്റെടുത്തുകഴിഞ്ഞു. ഓഗസ്റ്റ് 19നാകും ഷെയ്ൻ ചിത്രം പ്രേക്ഷകർക്ക് മുന്നിലെത്തുക.
കശ്മീരി നടി ഷെയ്ലീ കൃഷന് ആണ് ചിത്രത്തില് നായികയാവുന്നത്. നവാഗതനായ കൃഷ്ണദാസ് പങ്കി രചന നിര്വ്വഹിച്ചിരിക്കുന്ന ചിത്രത്തില് 'ഇന്ദുഗോപന്' എന്ന കഥാപാത്രത്തെയാണ് ഷെയ്ന് നിഗം അവതരിപ്പിക്കുന്നത്. 'ഇന്ദുഗോപന്' 'സബ് ഇന്സ്പെക്ടര് ജോഷ്വ'യുടെ അടുത്ത് ഒരു പരാതിയുമായി എത്തുന്നിടത്താണ് ചിത്രത്തിന്റെ കഥാവികാസം. കോമഡി ഡ്രാമ വിഭാഗത്തില് പെടുന്നതാണ് ചിത്രം. 'ജോഷ്വ'യായി വേഷമിടുന്നത് വിനയ് ഫോര്ട്ട് ആണ്. ഹരീഷ് കണാരന്, സൈജു കുറുപ്പ്, സുധീര് കരമന, മണിയന്പിള്ള രാജു, ഇന്ദ്രന്സ്, സാജന് സുദര്ശന്, ദിനേശ് പണിക്കര്, കോട്ടയം നസീര്, ശ്രീകാന്ത് മുരളി, നന്ദു, നിരഞ്ജന അനൂപ്, ഗൗരി നന്ദ, നൂറിന് ഷെറീഫ്, ഷൈനി സാറ എന്നിവരും ചിത്രത്തില് അഭിനയിക്കുന്നു.
24 ഫ്രെയിംസിന്റെ ബാനറില് സൂരജ് സി കെ, ബിജു സി കെ, ബാദുഷ എന് എം എന്നിവരാണ് നിര്മ്മിക്കുന്നത്. മണി രത്നത്തിന്റെ അസോസിയേറ്റ് ആയി പ്രവര്ത്തിച്ച ഷെല്ലി കാലിസ്റ്റ് ആണ് ഛായാഗ്രഹണം. എഡിറ്റിംഗ് ശ്രീകര് പ്രസാദ്. സംഗീതം രമേഷ് നാരായണ്. കലാസംവിധാനം ദിലീപ് നാഥ്. സൗണ്ട് ഡിസൈനര് അജിത്ത് എബ്രഹാം. വിഷ്വല് ഡിസൈനര് മുഹമ്മദ് റാസി. വസ്ത്രാലങ്കാരം സമീറ സനീഷ്. ചമയം അമല് ചന്ദ്രന്. ചീഫ് അസോസിയേറ്റ് ഡയറക്റ്റേഴ്സ് കെ രാജേഷ്, ഷൈനി ബെഞ്ചമിന്. നൃത്തസംവിധാനം പ്രസന്ന സുജിത്ത്. സ്റ്റില്സ് ഹരി തിരുമല.
Read More : അഫ്സലിന്റെ ശബ്ദത്തിൽ 'വരാതെ വന്നത്', 'ടു മെന്നി'ലെ രണ്ടാം ഗാനവും ഹിറ്റ്