Ram : മൂന്ന് വര്‍ഷങ്ങള്‍ക്ക് ശേഷം 'റാം' തുടങ്ങുന്നു, പിന്തുണയ്‍ക്കണമെന്ന് ജീത്തു ജോസഫ്

മോഹൻലാല്‍ നായകനാകുന്ന ചിത്രത്തിന്റെ ചിത്രീകരണം ഇന്ന് തുടങ്ങുന്നു (Ram).  

മോഹൻലാലിനെ നായകനാക്കി ജീത്തു ജോസഫ് പ്രഖ്യാപിച്ച ചിത്രമാണ് 'റാം'. വലിയ ക്യാൻവാസില്‍ ചിത്രീകരണം വേണ്ടിവരുന്ന 'റാം' കൊവിഡ് മഹാമാരിയെ തുടര്‍ന്ന് നിര്‍ത്തിവയ്‍ക്കുകയായിരുന്നു. 'ട്വല്‍ത്ത് മാന്‍' എന്ന ചിത്രം മോഹലാലിനെ നായകനാക്കി ജീത്തു ജോസഫ് ഒരുക്കുകയും ചെയ്‍തു. ഇപ്പോഴിതാ 'റാം' പുനരാരംഭിക്കുകയാണ് എന്ന വാര്‍ത്തകളാണ് വരുന്നത് (Ram).

മൂന്ന് വര്‍ഷത്തിന് ശേഷം ചിത്രം തുടങ്ങുന്നുവെന്ന് ജീത്തു ജോസഫ് തന്നെയാണ് അറിയിച്ചിരിക്കുന്നത്. എല്ലാവരുടെയും പ്രാര്‍ഥനയും പിന്തുണയും വേണമെന്നും ജീത്തു ജോസഫ് സാമൂഹ്യമാധ്യമത്തിലൂടെ അഭ്യര്‍ഥിക്കുന്നു. ലണ്ടൻ, പാരിസ് എന്നിവടങ്ങളാണ് ചിത്രത്തിന്റെ പ്രധാന ലൊക്കേഷനുകള്‍ എന്ന് നേരത്തെ പ്രഖ്യാപിച്ചരുന്നു. തൃഷയാണ് 'റാം' എന്ന ചിത്രത്തില്‍ നായികയായി എത്തുന്നത്.

ജീത്തു ജോസഫും മോഹൻലാലും ഏറ്റവും ഒടുവില്‍ ഒന്നിച്ച 'ട്വല്‍ത്ത് മാൻ' വലിയ രീതിയില്‍ പ്രേക്ഷക പ്രീതി നേടിയിരുന്നു. കൃഷ്‍ണകുമാറിന്റെ തിരക്കഥയിലാണ് ജീത്തു ജോസഫ് 'ട്വല്‍ത്ത് മാൻ' സംവിധാനം ചെയ്‍തത്. ഒരു മിസ്‍റ്ററി ത്രില്ലര്‍ ചിത്രമായിരുന്നു 'ട്വല്‍ത്ത് മാൻ'. ഡയറക്ട് ഒടിടി റിലീസ് ആയിരുന്ന ചിത്രത്തിന് മികച്ച പ്രതികരണമാണ് ലഭിച്ചിരുന്നത്.

അനുശ്രീ, അദിതി രവി, സൈജു കുറുപ്പ്, വീണ നന്ദകുമാര്‍, ശിവദ നായര്‍, ഉണ്ണി മുകുന്ദൻ തുടങ്ങി ഒട്ടേറെ താരങ്ങള്‍ ചിത്രത്തിലുണ്ടായിരുന്നു. സതീഷ് കുറുപ്പ് ആണ് ചിത്രത്തിന്റെ ഛായാഗ്രാഹണം നിര്‍വഹിച്ചത്. രാജീവ് കോവിലകം ആയിരുന്നു ചിത്രത്തിന്റെ കലാസംവിധായകൻ. ലിന്റ ജീത്തു ആയിരുന്നു ചിത്രത്തിന്റെ കോസ്റ്റ്യൂം ഡിസൈനര്‍.

മോഹന്‍ലാല്‍ ആദ്യമായി സംവിധാനം ചെയ്യുന്ന 'ബറോസ്' അടുത്തിടെ ചിത്രീകരണം പൂര്‍ത്തിയാക്കിയിരുന്നു. ആശിർവാദ് സിനിമാസാണ് 'ബറോസ്' നിർമ്മിക്കുന്നത്. ഇന്ത്യയിലെ ആദ്യ ത്രീഡി ചിത്രമായിരുന്ന 'മൈ ഡിയര്‍ കുട്ടിച്ചാത്തന്‍' സംവിധാനം ചെയ്‍ത ജിജോയുടെ കഥയെ ആസ്‍പദമാക്കിയാണ് മോഹന്‍ലാല്‍ സിനിമയൊരുക്കുന്നത്. ബറോസ് എന്ന ചിത്രത്തിന്റെ ലൊക്കേഷനില്‍ നിന്നുള്ള ഫോട്ടോകള്‍ മോഹന്‍ലാല്‍ തന്നെ പങ്കുവെച്ചിരുന്നു.