ദുൽഖർ സൽമാന്‍റെ ജന്മദിനം; ക്ഷേത്രത്തിൽ 501 പേർക്ക് സദ്യയൊരുക്കി നിർമ്മാതാവ്

നിർമ്മാതാവ് പ്രജീവ് സത്യവ്രതനാണ് ആഘോഷം സംഘടിപ്പിച്ചത്

നടന്‍ ദുൽഖർ സൽമാന്റെ ജന്മദിനത്തോടനുബന്ധിച്ച് ക്ഷേത്രത്തിൽ പ്രത്യേക പൂജയും സദ്യയും നടത്തി നിര്‍മ്മാതാവ്. ദുല്‍ഖറിന്‍റെ ആയുരാരോഗ്യ സൗഖ്യത്തിനുള്ള പൂജയും 501 പേര്‍ക്കുള്ള സദ്യയും ഒരുക്കിയത് നിർമ്മാതാവ് പ്രജീവ് സത്യവ്രതനാണ്. വെന്നിക്കോട് വലയന്റെകുഴി ശ്രീ ദേവിക്ഷേത്രത്തിലായിരുന്നു വഴിപാടും അന്നദാനവും. ഫൈനൽസ്, രണ്ട് എന്നീ സിനിമകളുടെ നിർമ്മാതാവാണ് പ്രജീവ് സത്യവ്രതൻ. 

പ്രജീവം മൂവീസിന്റെ ബാനറിൽ അദ്ദേഹം പുതുതായി നിർമ്മിക്കുന്ന ഗ്യാങ്സ് ഓഫ് സുകുമാരക്കുറുപ്പ് റിലീസിന് തയ്യാറെടുക്കുകയാണ്. ഷെബി ചൗഘട്ട് സംവിധാനം ചെയ്യുന്ന ഈ ചിത്രത്തില്‍ ദുൽഖർ സൽമാന്‍ നായകനായ കുറുപ്പ് എന്ന സിനിമയുമായി ബന്ധപ്പെട്ട് ചില രംഗങ്ങളുണ്ട്. കൂടാതെ ദുൽഖർ സൽമാനെക്കുറിച്ച് ഒരു ഗാനവും ഒരുക്കിയിരിക്കുന്നു. ബി കെ ഹരിനാരായണൻ, മെജോ ജോസഫ് ടീമിന്റേതാണ് വ്യത്യസ്തമായ ഈ ഗാനം.

പ്ലസ് ടു, ബോബി, കാക്കിപ്പട എന്നീ സിനിമകൾക്ക് ശേഷം ഷെബി ചൗഘട്ട് സംവിധാനം ചെയ്യുന്ന ഗ്യാങ്സ് ഓഫ് സുകുമാരക്കുറുപ്പ്  എന്ന സിനിമയുടെ പോസ്റ്റ് പ്രൊഡക്ഷൻ ജോലികൾ പുരോഗമിക്കുകയാണ്. ഷാജികൈലാസിന്‍റെ മകന്‍ റുഷിൻ ഷാജികൈലാസ് ആദ്യമായി നായക വേഷത്തിൽ അഭിനയിക്കുന്ന സിനിമയാണിത്. സുകുമാരക്കുറുപ്പ് എന്ന ടൈറ്റിൽ കഥാപാത്രമായി അബു സലിം എത്തുന്നു. ജോണി ആന്റണി, ടിനി ടോം, ശ്രീജിത്ത് രവി, ഇനിയ, സുജിത് ശങ്കർ, എബിൻ ബിനോ, ദിനേശ് പണിക്കർ, സിനോജ് വർഗീസ്, അജയ് നടരാജ്, സൂര്യ ക്രിഷ്, വൈഷ്ണവ് ബൈജു, പാർവതി രാജൻ ശങ്കരാടി തുടങ്ങി നിരവധി താരങ്ങൾ അഭിനയിക്കുന്നു.

സംവിധായകൻ ഷെബി ചൗഘട്ടിന്റെ കഥയ്ക്ക് വി ആർ ബാലഗോപാൽ തിരക്കഥയും സംഭാഷണവും എഴുതുന്നു. ഹരിനാരായണന്റെ വരികൾക്ക് മെജോ ജോസഫിന്റെ സംഗീതം. വിനീത് ശ്രീനിവാസൻ, അഫ്സൽ, മുരളീകൃഷ്ണ എന്നിവരാണ് ഗാനങ്ങൾ ആലപിച്ചിരിക്കുന്നത്. ക്യാമറ രജീഷ് രാമൻ, എഡിറ്റിംഗ് സുജിത് സഹദേവ്, ആക്ഷൻ കോറിയോഗ്രാഫർ റൺ രവി, പിആർഒ എം കെ ഷെജിൻ.

ഏഷ്യാനെറ്റ് ന്യൂസ് ലൈവ് കാണാം