നിഖില്‍ സിദ്ധാര്‍ഥയുടെ 'സ്വയംഭൂ' തുടങ്ങി, ചിത്രത്തില്‍ നായിക സംയുക്ത

നിഖില്‍ സിദ്ധാര്‍ഥയുടെ 'സ്വയംഭൂ' എന്ന ചിത്രത്തില്‍ സംയുക്ത നായികയായെത്തുന്നു.

'കാര്‍ത്തികേയ' എന്ന ചിത്രത്തിലൂടെ ശ്രദ്ധയാകര്‍ഷിച്ച താരമാണ് നിഖില്‍ സിദ്ധാര്‍ഥ. 'കാര്‍ത്തികേയ 2' പാൻ ഇന്ത്യൻ ചിത്രമാകുകയും വൻ വിജയം സ്വന്തമാക്കുകയും ചെയ്‍തതിനാല്‍ നിഖില്‍ സിദ്ധാര്‍ഥയ്‍ക്ക് രാജ്യമൊട്ടാകെ ആരാധകരമുണ്ടായി. അതിനാല്‍ നിഖില്‍ സിദ്ധാര്‍ഥയുടെ പുതിയ സിനിമകള്‍ക്കായി ഒട്ടേറെ പേര്‍ കാത്തിരിക്കുന്നുമുണ്ട്. നിഖില്‍ സിദ്ധാര്‍ഥ നായകനാകുന്ന പുതിയ ചിത്രം 'സ്വയംഭൂ' ആരംഭിച്ചിരിക്കുകയാണ്.

ഭരത് കൃഷ്‍ണമാചാരിയാണ് ചിത്രത്തിന്റെ സംവിധാനം. മലയാളി നടി സംയുക്ത നായികയായെത്തുന്നു. ചിത്രത്തിന്റെ പ്രമേയം ഇതുവരെ പുറത്തുവിട്ടിട്ടില്ല. 'സ്വയംഭൂ' ഒരു പാൻ ഇന്ത്യൻ ചിത്രം ആയിരിക്കും.

നിഖില്‍ സിദ്ധാര്‍ഥ നായകനായി ഒടുവിലെത്തിയ ചിത്രം 'സ്‍പൈ' ആയിരുന്നു. ഗാരി ബിഎച്ചാണ് ചിത്രത്തിന്റെ സംവിധാനം. നിഖില്‍ സിദ്ധാര്‍ഥയ്‍ക്കു പുറമേ 'സ്‍പൈ' സിനിമയില്‍ ഐശ്വര്യ മേനോൻ, അഭിനവ്, സന്യ താക്കൂര്‍, ആര്യൻ രാജേഷ്, മകരന്ദ് ദേശ്‍പാണ്ഡേ, രവി വര്‍മ, സച്ചിൻ ഖേഡെകര്‍, സുരേഷ് ദയാനന്ദ് റെഡ്ഡി, നിതിൻ മേഹ്‍ത, ജിഷു സെൻഗുപ്‍ത, പ്രിഷ സിംഗ് എന്നിവര്‍ക്കൊപ്പം റാണ ദഗുബാട്ടി അതിഥി വേഷത്തിലും എത്തി. നിഖില്‍ സിദ്ധാര്‍ഥ റോ ഏജന്റ് കഥാപാത്രമായിട്ടായിരുന്നു 'സ്‍പൈ'യില്‍ വേഷമിട്ടത്. കെ രാജശേഖര റെഡ്ഡി ആയിരുന്നു ചിത്രത്തിന്റെ നിര്‍മാണം. വംശിയായിരുന്നു നിഖിലിന്റെ ചിത്രത്തിന്റെ ഛായാഗ്രാഹണം. വിശാല്‍ ചന്ദ്രേശഖറായിരുന്നു സംഗീതം.

നിഖില്‍ സിദ്ധാര്‍ഥ നായകനായി ഇതിനുമുമ്പെത്തിയ ചിത്രം '18 പേജെസ്' ആയിരുന്നു. പല്‍നാട്ടി സൂര്യ പ്രതാപിന്റെ സംവിധാനത്തിലുള്ള ചിത്രം വൻ ഹിറ്റായിരുന്നു. നടൻ ചിമ്പുവും ഒരു ഗാനമാലപിച്ച ചിത്രത്തിന് ഗോപി സുന്ദര്‍ ആണ് സംഗീത സംവിധാനം നിര്‍വഹിച്ചിരിക്കുന്നത്. എ വസന്താണ് ചിത്രത്തിന്റെ ഛായാഗ്രാഹണം നിര്‍വഹിച്ചിക്കുന്നത്. നവീൻ നൂലിയാണ് ചിത്രസംയോജനം നിര്‍വഹിച്ചത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക