ക്യാപ്റ്റന്‍ മില്ലര്‍ റിലീസില്‍ പ്രശ്നമോ: ധനുഷിന്‍റെ ഏറ്റവും ബജറ്റ് കൂടിയ ചിത്രത്തിന് തിരിച്ചടിയാകുമോ ?

തമിഴ്, കന്നഡ, ഹിന്ദി പതിപ്പുകൾ 2024 ജനുവരി 12-ന് തിയറ്ററുകളിൽ റിലീസ് ചെയ്യുമെന്ന് നിര്‍മ്മാതാക്കള്‍ സ്ഥിരീകരിച്ചിട്ടുണ്ടെങ്കിലും തെലുങ്ക് പതിപ്പ് അതേ തീയതിയിൽ റിലീസ് ചെയ്യുമോ എന്നതില്‍ വ്യക്തതയില്ല.

ഹൈദരാബാദ്:ധനുഷിന്‍റെ കരിയറിലെ ഏറ്റവും വലിയ ബജറ്റിലൊരുങ്ങുന്ന ചിത്രമാണ് ക്യാപ്റ്റന്‍ മില്ലര്‍. 2024 ജനുവരി 12-നാണ് ചിത്രം റിലീസാകുന്നത്. സംക്രാന്തി പൊങ്കല്‍ റിലീസാണ് ചിത്രം. തമിഴില്‍ പൊങ്കലിന് ഏറ്റവും വലിയ റിലീസായ ചിത്രം എന്നാല്‍ തെലുങ്ക് സംസ്ഥാനങ്ങളില്‍ അങ്ങനെയല്ല. നിരവധി ചിത്രങ്ങളും ഡബ്ബ് ചെയ്ത പതിപ്പുകളും ഉൾപ്പെടെയുള്ള സിനിമകളുടെ ഒരു നീണ്ട നിര തെലുങ്ക് സംസ്ഥാനങ്ങളിൽ സംക്രാന്തിക്ക് റിലീസിന് ഒരുങ്ങുകയാണ്. അക്കൂട്ടത്തിലാണ് ധനുഷിന്റെ ക്യാപ്റ്റൻ മില്ലറും ഉൾപ്പെടുന്നത്.

എന്നാല്‍ ഏറ്റവും പുതിയ അപ്ഡേറ്റില്‍ തമിഴ്, കന്നഡ, ഹിന്ദി പതിപ്പുകൾ 2024 ജനുവരി 12-ന് തിയറ്ററുകളിൽ റിലീസ് ചെയ്യുമെന്ന് നിര്‍മ്മാതാക്കള്‍ സ്ഥിരീകരിച്ചിട്ടുണ്ടെങ്കിലും തെലുങ്ക് പതിപ്പ് അതേ തീയതിയിൽ റിലീസ് ചെയ്യുമോ എന്നതില്‍ വ്യക്തതയില്ല. ഇതില്‍ ഔദ്യോഗിക പ്രഖ്യാപനം ഉടൻ പ്രതീക്ഷിക്കുന്നു. നിർമ്മാതാക്കൾ മറ്റൊരു തീയതി തിരഞ്ഞെടുക്കുമോ അല്ലെങ്കിൽ ഒടിടിയില്‍ നേരിട്ട് റിലീസ് ചെയ്യുമോ എന്നതാണ് ഇപ്പോള്‍ ചോദ്യം ഉയരുന്നത്.

പ്രിയങ്ക മോഹൻ നായികയായി അഭിനയിക്കുന്നു, ചിത്രത്തിൽ ശിവ് രാജ്കുമാർ, സുന്ദീപ് കിഷൻ, നിവേദിത സതീഷ്, ജോൺ കൊക്കൻ, വിജയകൻ, ആർആർആർ ഫെയിം എഡ്വേർഡ് സോണൻബ്ലിക്ക് എന്നിവരും പ്രധാന വേഷങ്ങളിൽ അഭിനയിക്കുന്നു.

സത്യജ്യോതി ഫിലിംസിന്റെ ബാനറിൽ സെന്തിൽ ത്യാഗരാജും അർജുൻ ത്യാഗരാജനും ചേർന്ന് നിർമ്മിച്ച ചിത്രം ജി വി പ്രകാശ് കുമാറാണ് സംഗീതം നൽകിയിരിക്കുന്നത്.

ക്യാപ്റ്റൻ മില്ലെര്‍ ഒരു ആക്ഷൻ ചിത്രമായിരിക്കും എന്ന് നേരത്തെ റിപ്പോര്‍ട്ടുകളുണ്ടായിരുന്നു. അടുത്തിടെ പുറത്തിറങ്ങിയ പല ആക്ഷൻ ചിത്രങ്ങളില്‍ വയലൻസിന്റെ അതിപ്രസരമുണ്ടായതിനാല്‍ ക്യാപ്റ്റൻ മില്ലെറും അത്തരത്തിലുള്ളതായിരുന്നോ എന്ന് ആശങ്കയുണ്ടായിരുന്നു. എന്നാല്‍ യു സര്‍ട്ടഫിക്കറ്റ് ധനുഷ് ചിത്രത്തിന് ലഭിച്ചിരിക്കുന്നു എന്നതിനാല്‍ ആരാധകരുടെ ആശങ്കകള്‍ ഒഴിവായിരിക്കുകയാണ്.