സച്ചി-സേതു കൂട്ടുകെട്ടിലെ ആദ്യത്തെ തിരക്കഥ ചോക്ലേറ്റില്‍ പൃഥ്വിരാജ് ആയിരുന്നു നായകന്‍. സച്ചി ആദ്യമായി സംവിധാനം ചെയ്ത അനാര്‍ക്കലിയിലും പൃഥ്വിരാജ് പ്രധാന വേഷത്തില്‍ എത്തി.
കൊച്ചി: സംവിധായകന്‍ സച്ചിയുടെ വേര്‍പാടില്‍ അനുശോചിച്ച് നടന്‍ പൃഥ്വിരാജിന്‍റെ ഫേസ്ബുക്ക് പോസ്റ്റ്. പോയി എന്ന ഒറ്റവാക്കില്‍ സച്ചിയുടെ ചിത്രവും ഉള്‍കൊള്ളിച്ചാണ് പൃഥ്വിയുടെ പോസ്റ്റ്. പൃഥ്വിരാജിന്‍റെ അവസാനമായി റിലീസായ ചിത്രം അയ്യപ്പനും കോശിയും ആയിരുന്നു സച്ചി അവസാനം സംവിധാനം ചെയ്ത ചിത്രവും. സച്ചിയുടെ തിരക്കഥയില്‍ ഏറ്റവും കൂടുതല്‍ അഭിനയിച്ച താരവും പൃഥ്വിയായിരുന്നു.
സച്ചി-സേതു കൂട്ടുകെട്ടിലെ ആദ്യത്തെ തിരക്കഥ ചോക്ലേറ്റില്‍ പൃഥ്വിരാജ് ആയിരുന്നു നായകന്‍. സച്ചി ആദ്യമായി സംവിധാനം ചെയ്ത അനാര്‍ക്കലിയിലും പൃഥ്വിരാജ് പ്രധാന വേഷത്തില്‍ എത്തി. സച്ചി അവസാനമായി രചന മാത്രം നിര്‍വ്വഹിച്ച ഡ്രൈവിംഗ് ലൈസന്‍സില്‍ ഹരീന്ദ്രന്‍ എന്ന സൂപ്പര്‍ ഹീറോയുടെ വേഷമായിരുന്നു പൃഥ്വിക്ക്.
അതീവ ഗുരുതരാവസ്ഥയിലായിരുന്ന സച്ചി (കെ ആര്‍ സച്ചിദാനന്ദന്‍, 48) രാത്രിയോടെയാണ് തൃശൂര്‍ ജൂബിലി മിഷന്‍ ആശുപത്രിയില്‍ അന്തരിച്ചത്. രക്തസമ്മര്‍ദ്ദം നിയന്ത്രിച്ചുനിര്‍ത്താനുള്ള മരുന്നുകളോടെ വെന്‍റിലേറ്ററിലായിരുന്നു അദ്ദേഹം. നാളെ കൊച്ചിയില്‍ എത്തിക്കുന്ന മൃതദേഹം രവിപുരം ശ്‍മശാനത്തില്‍ സംസ്‍ക്കരിക്കും.
ഏതാനും ദിവസങ്ങള്‍ക്കു മുന്‍പ് വടക്കാഞ്ചേരിയിലെ സ്വകാര്യ ആശുപത്രിയില്‍ സച്ചിയെ ഇടുപ്പ് മാറ്റിവെക്കല്‍ ശസ്ത്രക്രിയയ്ക്കു വിധേയനാക്കിയിരുന്നു.
അതിനുശേഷമാണ് അദ്ദേഹത്തിനു ഹൃദയാഘാതം സംഭവിച്ചത്. 16ന് പുലര്‍ച്ചെയാണ് ജൂബിലി മിഷന്‍ ആശുപത്രിയില്‍ സച്ചിയെ പ്രവേശിപ്പിച്ചത്. അദ്ദേഹത്തിന്‍റെ തലച്ചോര്‍ പ്രതികരിക്കുന്നില്ലെന്നും ഹൈപോക്സിക് ബ്രെയിന്‍ ഡാമേജ് (എന്തെങ്കിലും കാരണത്താല്‍ തലച്ചോറിലേക്ക് ഓക്സിജന്‍ എത്താത്ത അവസ്ഥ) സംഭവിച്ചിട്ടുണ്ടെന്നും ജൂബിലി മിഷന്‍ ആശുപത്രി 16ന് പുറത്തിറക്കിയ മെഡിക്കല്‍ റിപ്പോര്‍ട്ടില്‍ പറഞ്ഞിരുന്നു.
ചോക്ലേറ്റ് എന്ന സിനിമയ്ക്ക് തിരക്കഥ എഴുതിയാണ് സച്ചി മലയാള സിനിമയിലേക്ക് എത്തുന്നത്. പിന്നീട് സച്ചി-സേതു കൂട്ടുകെട്ടില്‍ നിരവധി ഹിറ്റ് സിനിമകള്‍ പിറന്നിരുന്നു. റണ്‍ബേബി റണ്‍ എന്ന സിനിമയിലൂടെയാണ് സച്ചി സ്വതന്ത്ര തിരക്കഥാകൃത്താകുന്നത്. 2015 ല്‍ ഇറങ്ങിയ അനാര്‍ക്കലിയാണ് സച്ചി ആദ്യം സംവിധാനം ചെയ്ത സിനിമ. അയ്യപ്പനും കോശിയുമാണ് സച്ചിയുടെ അവസാന ചിത്രം. രാമലീല അടക്കം പന്ത്രണ്ടോളം സിനിമകളുടെ തിരക്കഥാകൃത്താണ് സച്ചി.