പിള്ളേര് അടിച്ചുനേടിയ 100 കോടി; ആ രം​ഗങ്ങളൊന്നും ഡ്യൂപ്പല്ല, 50ന്റെ നിറവിൽ 'ആർഡിഎക്സ്'

ഏതാനും നാളുകൾക്ക് മുൻപ് ആർഡിഎക്സ് ഒടിടിയിൽ എത്തിയിരുന്നു. 

ഒരു സിനിമയ്ക്ക് മികച്ച മൗത്ത് പബ്ലിസിറ്റി ലഭിക്കുക എന്നത് വലിയൊരു കാര്യമാണ്. ഈ പ്രേക്ഷ പ്രതികരണമാണ് സിനിമയുടെ ജയ-പരാജയങ്ങൾ തീരുമാനിക്കുന്നത്. ഈ ട്രെന്റാണ് മലയാള സിനിമ ഇപ്പോൾ പിന്തുടരുന്നതും. അത്തരത്തിൽ സൂപ്പർ താരങ്ങളൊന്നും ഇല്ലാതെ എത്തി, പ്രേക്ഷ- നിരൂപക പ്രശംസകൾ ഒരുപോലെ നേടിയ ചിത്രമായിരുന്നു ആർഡിഎക്സ്. ഷെയ്ൻ നി​ഗം, ആന്റണി വർ​ഗീസ്, നീരജ് മാധവ് തുടങ്ങിയ യുവതാരങ്ങളെ കേന്ദ്ര കഥാപാത്രമാക്കി നഹാസ് ഹിദായത്ത് ആണ് ആർഡിഎക്സ് സംവിധാനം ചെയ്തത്. 

ഓണം റിലീസ് ആയി ഓ​ഗസ്റ്റ് 25ന് ആയിരുന്നു ആർഡിഎക്സ് തിയറ്ററുകളിൽ എത്തിയത്. എന്നാൽ ഒപ്പം വന്നവരെയും പിന്നീട് വന്നവരെയും പിന്തള്ളിക്കൊണ്ട് ആർഡിഎക്സ് വിജയ​ഗാഥ രചിച്ചു. മുൻവിധികളെ മാറ്റി മറിച്ച ചിത്രം 100 കോടി ക്ലബ്ബിലും ഒടുവിൽ ഇടം നേടി. ഇപ്പോഴിതാ ആർഡിഎക്സ് റിലീസ് ചെയ്തിട്ട് അൻപതാം ദിവസം പിന്നിടുകയാണ്. ഈ സന്തോഷം അണിയറ പ്രവർത്തകർ പങ്കുവച്ചു. 

ചിത്രത്തിന്റെ മേക്കിം​ഗ് വീഡിയോ ആണ് അണിയറ പ്രവർത്തകർ പുറത്തുവിട്ടിരിക്കുന്നത്. ഫൈറ്റ് സീനുകൾ, ഫൈറ്റ് പ്രാക്ടീസുകൾ, ഷൂട്ടിം​ഗ് തുടങ്ങി എല്ലാ രം​ഗങ്ങളും ഉൾക്കൊള്ളിച്ചുള്ളതാണ് വീഡിയോ. ഷെയ്നും ആന്റണിയും നീരജും ഈ വീഡിയോ പങ്കുവച്ചിട്ടുണ്ട്. "ഈ നാഴികക്കല്ല് ആഘോഷിക്കാൻ ലൊക്കേഷനിലേക്ക് ഒരു തിരിഞ്ഞു നോട്ടം. ഞങ്ങളുടെ യാത്ര അവിസ്മരണീയമാക്കിയതിന് നന്ദി!", എന്ന കുറിപ്പോടെ ആണ് ഇവർ വീഡിയോ ഷെയർ ചെയ്തത്.  

റോബർട്ട്, റോണി, സേവ്യർ എന്നീ കഥാപാത്രങ്ങളുടെ ചുരുക്കെഴുത്താണ് ആർഡിഎക്സ്. ഈ മൂന്ന് പേരിലൂടെയും ആണ് ചിത്രം മുന്നോട്ട് പോകുന്നത്. സമീപകാലത്ത് മലയാളത്തിൽ ഇറങ്ങിയ മികച്ചൊരു അടിപ്പടം എന്ന് പ്രേക്ഷകർ വിലയിരുത്തിയ ചിത്രത്തിൽ ബാബു ആന്റണി, ലാൽ, ഐമ, മഹിമ, വിഷ്ണു അ​ഗസ്ത്യ, മാലാ പാർവതി തുടങ്ങി നിരവധി പേർ അണിനിരന്നിരുന്നു. ഏതാനും നാളുകൾക്ക് മുൻപ് ആർഡിഎക്സ് ഒടിടിയിൽ എത്തിയിരുന്നു. 

ഏഷ്യാനെറ്റ് ന്യൂസ് തത്സമയ വാർത്തകൾ..