വിജയ് നായകനായി അഭിനയിച്ച ചിത്രത്തിലെ സ്റ്റണ്ട് രംഗമാണ് ചെങ്കല്ചൂളയിലെ ആരാധകര് പുനരാവിഷ്കരിച്ചത്.
സൂര്യ നായകനായി അഭിനയിച്ച ചിത്രത്തിലെ ഒരു രംഗം റീക്രിയേറ്റ് ചെയ്തത് അടുത്തിടെ ഏറെ ശ്രദ്ധിക്കപ്പെട്ടിരുന്നു. അയാൻ എന്ന സൂര്യ ചിത്രത്തിലെ ഒരു ഗാനരംഗമാണ് ചെങ്കല്ച്ചൂളയിലെ കുട്ടികള് പുനരാവിഷ്കരിച്ചത്. ഇവരെ അഭിനന്ദിച്ച് സൂര്യ തന്നെ രംഗത്ത് എത്തുകയും ചെയ്തിരുന്നു. ഇപ്പോഴിതാ വിജയ് (Vijay) നായകനായ ചിത്രമായ തെരിയിലെ ഒരു ആക്ഷൻ രംഗമാണ് ചെങ്കല്ച്ചൂളയിലെ കുട്ടികള് റിക്രീയേറ്റ് ചെയ്തിരിക്കുന്നത്.
തിരുവനന്തപുരം സിറ്റിയിലെ ഹെവി ട്രാഫിക് ഉള്ള റോഡില് ഷൂട്ട് ചെയ്യുക എന്നത് തന്നെ ബുദ്ധിമുട്ടുള്ള കാര്യമാണ്. അപ്പോഴാണ് ഇങ്ങനെ പൂര്ണതയോടെ ഒരു സ്റ്റണ്ട് രംഗം ചെങ്കല്ചൂള അഥവാ രാജാജി നഗറിലെ കുട്ടികള് ചെയ്തിരിക്കുന്നത്. ഒട്ടേറെ കമന്റുകളാണ് ഇവരുടെ വീഡിയോയ്ക്ക് വരുന്നത്. ചിത്രസംയോജനത്തെ അഭിനന്ദിച്ചും കഥാപാത്രങ്ങളായി എത്തിയവരുടെ ടൈമിംഗ് എടുത്തുപറഞ്ഞുമാണ് കമന്റുകള്. വീഡിയോ കണ്ട് വിജയ് തന്നെ അഭിനന്ദിക്കുന്നതും കാത്തിരിക്കുകയാണ് കുട്ടികള്. നേരത്തെ സൂര്യ ചെങ്കല്ചൂളയിലെ കുട്ടികളെ അഭിനന്ദിച്ച് രംഗത്ത് എത്തിയിരുന്നു.
എന്തായാലും ചെങ്കല്ചൂളയിലെ കുട്ടികളുടെ വീഡിയോ ഓണ്ലൈനില് തരംഗമാണ്.
വിജയ് നായകനായ തെരിയെന്ന ചിത്രം അറ്റ്ലിയാണ് സംവിധാനം ചെയ്തത്.