സായ് പല്ലവിയുടെ ആസ്‍തിയെത്ര?, അമരന് വാങ്ങിച്ച പ്രതിഫലവും പുറത്ത്

സായ് പല്ലവി ഒരു സിനിമയ്‍ക്ക് വാങ്ങിക്കുന്ന പ്രതിഫലവും പുറത്ത്.

പ്രേക്ഷകരുടെ പ്രിയപ്പെട്ട ഒരു തെന്നിന്ത്യൻ താരമാണ് സായ് പല്ലവി. അമരൻ എന്ന ചിത്രമാണ് താരത്തിന്റേതായി ഒടുവില്‍ എത്തിയതും വിജയമായതും. സായ് പല്ലവിയുടെ ആസ്‍തിയെ കുറിച്ചുള്ള വാര്‍ത്തയാണ് പുതുതായി ശ്രദ്ധയാകര്‍ഷിക്കുന്നത്. സായ് പല്ലവിയുടെ ആസ്‍തി 47 കോടി രൂപയാണ് എന്നാണ് റിപ്പോര്‍ട്ടുകള്‍ സൂചിപ്പിക്കുന്നത്.

സിനിമയില്‍ നിന്നുള്ള പ്രതിഫലം തന്നെയാണ് താരത്തിന്റെ പ്രധാന വരുമാനം എന്നാണ് റിപ്പോര്‍ട്ട്. സായ് പല്ലവി കുറച്ച് പരസ്യ ചിത്രങ്ങള്‍ നിരസിച്ചത് വലിയ ചര്‍ച്ചയായി മാറിയിരുന്നു. അമരന് പ്രതിഫലം മൂന്ന് കോടിയാണ് താരത്തിന് ലഭിച്ചത് എന്നാണ് റിപ്പോര്‍ട്ടുകള്‍ വ്യക്തമാക്കുന്നത്. രാജ്‍കുമാര്‍ പെരിയസ്വാമിയുടെ സംവിധാനത്തില്‍ വന്ന ചിത്രത്തില്‍ നായകനായ ശിവകാര്‍ത്തികേയനും സായ് പല്ലവിയും കഥാപാത്രങ്ങളെ മികച്ചതാക്കിയെന്നാണ് അഭിപ്രായങ്ങള്‍.

സായ് പല്ലവി നായികയായി വരാനിരിക്കുന്ന ചിത്രം തണ്ടേലും ചര്‍ച്ചകളില്‍ നിറയുന്നതിനാല്‍ ആകാംക്ഷയുണ്ടാക്കുന്നതാണ്. തണ്ടേല്‍ ഒരു യഥാര്‍ഥ സംഭവത്തിന്റെ കഥയാണ് പ്രമേയമാക്കുന്നത് എന്നാണ് റിപ്പോര്‍ട്ടുകള്‍ സൂചിപ്പിക്കുന്നത്. ശ്രീകാകുളത്തില്‍ നിന്നുള്ള മത്സ്യത്തൊഴിലാളികളുടെ യഥാര്‍ഥ കഥയാണ് തണ്ടലിന്റേത്. എന്തായാലും നാഗചൈതന്യയുടെ തണ്ടേല്‍ സിനിമയുടെ കഥയുടെ സൂചനകള്‍ പുറത്തായത് ചര്‍ച്ചയായി മാറിയിട്ടുണ്ട്.

സായ് പല്ലവി നായികയാകുമ്പോള്‍ തണ്ടേല്‍ ചിത്രത്തില്‍ നായകനായി വേഷമിടുന്നത് നാഗചൈതന്യ ആണ്. സ്വന്തം അവകാശങ്ങള്‍ക്കായി പോരാടുന്ന യുവതിയായ കഥാപാത്രമായിട്ടാണ് സായ് പല്ലവി തണ്ടേലില്‍ നായികയാകുന്നത്. നായകനായ നാഗചൈതന്യക്ക് പ്രതിഫലം ഏഴ് കോടിയായിരിക്കും എന്ന് വ്യക്തമായിട്ടുണ്ടെങ്കിലും സായ് പല്ലവിക്ക് ലഭിക്കുന്ന തുക എത്രയെന്ന് പുറത്തുവിട്ടിട്ടില്ല എന്നാണ് ടോളിവുഡ് ഡോട് കോമിന്റെ റിപ്പോര്‍ട്ട്. സംവിധായകൻ ചന്ദൂ മൊണ്ടേടിയുടെ പുതിയ ചിത്രമായ തണ്ടേലില്‍ നാഗചൈതന്യക്ക് വലിയ പ്രതീക്ഷകളാണ് ഉള്ളത് എന്നതിനാല്‍ ആരാധകരും ആവേശത്തോടെയാണ് കാത്തിരിക്കുന്നത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക