അൻപ് അറിവിന്റെ സംഘട്ടന സംവിധാനത്തില്‍ 'ആര്‍ഡിഎക്സ്'‍, ഷെയ്‍നും ആന്റണി വര്‍ഗീസും നീരജും കൈകോര്‍ക്കുന്നു

'മിന്നൽ മുരളി'ക്കു ശേഷം സോഫിയാ പോൾ നിർമ്മിക്കുന്ന ചിത്രമാണ് 'ആർഡിഎക്സ്'.

'മിന്നൽ മുരളി'യുടെ മികച്ച വിജയത്തിനു ശേഷം വീക്കെന്റ് ബ്ലോക്ബസ്റ്ററിന്റെ ബാനറിൽ സോഫിയാ പോൾ നിർമ്മിക്കുന്ന  'ആർഡിഎക്സ്' എന്ന ചിത്രംnzനവാഗതനായ നഹാസ് ഹിദായത്ത് കഥയെഴുതി സംവിധാനം ചെയ്യുന്നു.ആക്ഷൻ പശ്ചാത്തലത്തിൽ അണിയിച്ചൊരുക്കുന്ന ഈ ചിത്രം മലയാളത്തിലെ മികച്ച അക്ഷൻ ചിത്രത്തിന്റെ ഗണത്തിൽപ്പെടുത്താവുന്നതാണ്. പവർ ആക്ഷൻ എന്ന ടാഗ് ലൈനിൽ ഒരുങ്ങുന്ന ഈ ചിത്രം
മാർഷൽ ആർട്ട് സീന് ഏറെ പ്രാധാന്യമുള്ളതാണ്. ഈ ചിത്രത്തിന്റെ ആക്ഷൻ കൊറിയോഗ്രാഫി കൈകാര്യം ചെയ്യുന്നത് ദേശീയ അവാർഡ് ജേതാവ് അൻപ് അറിവാണ്.
സമീപകാലത്ത് മെഗാ വിജയങ്ങൾ കരസ്ഥമാക്കിയിട്ടുള്ള 'കെജിഎഫ്', 'കൈതി', 'വിക്രം', ചിത്രീകരണം നടക്കുന്ന വൻ ചിത്രമായ 'സലാർ' തുടങ്ങിയ ചിത്രങ്ങൾക്ക് അക്ഷൻ ഒരുക്കിയ ഇന്ത്യയിലെ ഏറ്റം മികച്ച ആക്ഷൻ കമ്പോസറാണ് അൻപ് അറിവ്. തൊണ്ണൂറു ദിവസത്തോളം നീണ്ടു നിൽക്കുന്ന ചിത്രീകരണമാണ് ഈ ചിത്രത്തിനു വേണ്ടി ഒരുക്കിയിരിക്കുന്നത്.

ബേസിൽ ജോസഫ് സംവിധാനം ചെയ്ത 'ഗോദ' എന്ന ചിത്രത്തിൽ സഹസംവിധായകനായി തുടക്കം കുറിച്ച ആളാണ് 'ആര്‍ഡിഎക്സ്' ഒരുക്കുന്ന നഹാസ്. 'കളർ പടം' എന്ന ഒരു ഷോർട്ട് ഫിലിം സഹാസിന്റേതായി ശ്രദ്ധിക്കപ്പെട്ടിരുന്നു. 'റോബര്‍ട്ട്', 'ഡോണി', 'സേവ്യര്‍' എന്നിവരാണ് 'ആര്‍ഡിഎക്സി'ലെ പ്രധാന കഥാപാത്രങ്ങള്‍. ഒരു പ്രദേശം അറിഞ്ഞു നല്‍കിയ പേരാണ് ഇവര്‍ക്ക് 'ആര്‍ഡിഎക്സ്' എന്നത്. പശ്ചിമകൊച്ചിയിലെ ഇണപിരിയാത്ത സൗഹൃദക്കണ്ണികളായ ഇവരുടെ ജീവിതത്തിൽ അരങ്ങേറുന്ന സംഭവങ്ങളാണ് ഈ ചിത്രത്തിലൂടെ അവതരിപിക്കുന്നത്. പ്രധാനമായും യൂത്തിന്റെ കാഴ്ച്ചപ്പാടുകൾക്കും അവരുടെ വികാരവിചാരങ്ങൾക്കും ഏറെ പ്രാധാന്യം നൽകി യാണ് ഈ ചിത്രത്തിന്റെ അവതരണം. ത്രില്ലർ മൂഡിൽ അവതരിപ്പിക്കുന്ന ചിത്രമാണങ്കിലും നർമ്മവും പ്രണയവും ഇമോഷനും എല്ലാം കോർത്തിണക്കിയ ഒരു ക്ലീൻ എന്റർടൈനറായിരിക്കും ഈ ചിത്രം.

വലിയ മുടക്കുമുതലോടെ എത്തുന്ന ഈ ചിത്രം ഉയർന്ന സാങ്കേതിക മികവു പുലർത്തുന്ന ചിത്രം കൂടിയാണ്. ഷെയ്‍ൻ നിഗം 'റോബർട്ടി'നേയും, ആന്റണി വർഗീസ് 'ഡോണി'യേയും നീരജ് മാധവ് 'സേവ്യറി'നേയും പ്രതിനിധീകരിക്കുന്നു. ലാൽ മറ്റൊരു പ്രധാന കഥാപാത്രത്തെ ചിത്രത്തില്‍ അവതരിപ്പിക്കുന്നു. മാലാ പാർവ്വതി, നിഷാന്ത് സാഗർ എന്നിവരും പ്രധാന താരങ്ങളാണ്.രണ്ടു നായികമാരാണ് ഈ ചിത്രത്തിലുള്ളത്. തമിഴ് സിനിമയിലൂടെ ശ്രദ്ധേയയായ മഹിമാ നമ്പ്യാരാണ് ഈ ചിത്രത്തിലെ ഒരു നായിക. 'മുന്തിരിവള്ളികൾ തളിർക്കുമ്പോൾ' എന്ന ചിത്രത്തിലൂടെ ശ്രദ്ധേയയ ഐമ റോസ്മിയാണ് മറ്റൊരു നായിക.

തിരക്കഥ - ഷബാസ് റഷീദ് - ആദർശ് സുകുമാരൻ. 'കൈതി', 'വിക്രം വേദ' തുടങ്ങിയ ചിത്രങ്ങളിലൂടെ ശ്രദ്ധേയനായ സാം സി.എസ്.ആണ് ഈ ചിത്രത്തിന്റെ സംഗീത സംവിധായകൻ മനു മഞ്ജിത്തിന്റേതാണ് വരികൾ,
അലക്സ് ജെ പുളിക്കൽ ഛായാഗ്രഹണവും റിച്ചാർഡ് കെവിൻ ചിത്രസംയോജനവും നിർവ്വഹിക്കുന്നു. കലാസംവിധാനം - പ്രശാന്ത് മാധവ്. കോസ്റ്റ്യും - ഡിസൈൻ - ധന്യാ ബാലകൃഷ്ണൻ
മേക്കപ്പ് - റോണക്സ് സേവ്യർ.ചീഫ് അസ്സോസ്സിയേറ്റ് ഡയറക്ടർ - വിശാഖ്. നിർമ്മാണ നിർവ്വഹണം - ജാവേദ് ചെമ്പ്.ഓഗസ്റ്റ് പതിനേഴിന് കൊച്ചി ഇടപ്പള്ളി അഞ്ചു മന ക്ഷേത്രത്തിൽ നടക്കുന്ന പൂജാ ചടങ്ങോടെ (ചിങ്ങം ഒന്ന് ) ചിത്രീകരണമാരംഭിക്കുന്ന ഈ ചിത്രം വീക്കെന്റ് ബ്ലോക് ബസ്റ്റർ പ്രദർശനത്തിനെത്തിക്കുന്നു. പിആര്‍ഒ വാഴൂർ ജോസ്.