ഷെബി ചൗഘട്ട് സംവിധാനം ചെയ്‍ത 'കാക്കിപ്പട'യ്‍ക്ക് മെൽബൻ ഫെസ്റ്റിവലിലേക്ക് ക്ഷണം

'കാക്കിപ്പട'യ്‍ക്ക് മെൽബൻ ഫിലിം ഫെസ്റ്റിവലിലേക്ക് ക്ഷണം ലഭിച്ചതാണ് പുതിയ റിപ്പോര്‍ട്ട്.

ഷെബി ചൗഘട്ട് സംവിധാനം നിർവഹിച്ച ചിത്രമാണ് 'കാക്കിപ്പട'.  ഹൈദരാബാദിൽ നടന്ന ഒരു യഥാർത്ഥ സംഭവത്തിൽ നിന്ന് പ്രചോദനമുൾക്കൊണ്ട് ഒരുക്കിയതായിരുന്നു 'കാക്കിപ്പട'. ഷെബി ചൗഘട്ട് തന്നെയാണ് കാക്കിപ്പടയുടെ രചന നിർവഹിച്ചിരിക്കുന്നത്. 'കാക്കിപ്പട' എന്ന സിനിമയ്‍ക്ക് മെൽബണിൽ നടക്കുന്ന ഐ എഫ് എഫ് എം 2023ലേക്ക് ക്ഷണം ലഭിച്ചിരിക്കുന്നുവെന്നാണ് പുതിയ വാര്‍ത്ത.

ചിരഞ്‍ജീവിയെ നായകനാക്കി പന്ത്രണ്ടോളം ഹിറ്റ് ചിത്രങ്ങൾ നിർമ്മിച്ച കെ എസ് രാമറാവു 'കാക്കിപ്പട'യുടെ റീമേക്ക് അവകാശം വൻ തുകയ്ക്ക് സ്വന്തമാക്കിയിരുന്നു. ചിരഞ്‍ജീവി നായകനാകുന്ന ചിത്രത്തിന്റെ ഓഫീസില്‍വെച്ചാണ് റീമേക്ക് അവകാശം രാമറാവുവിന്റെ കമ്പനി സ്വന്തമാക്കിയ വിവരം ഔദ്യോഗികമായി പ്രഖ്യാപിച്ചത്.  'കാക്കിപ്പട'യുടെ തെലുങ്ക് പതിപ്പ് കാണുവാൻ വേണ്ടി കാത്തിരിക്കുകയാണെന്ന് ചിരഞ്‍ജീവി പറഞ്ഞതായി ഷെബി അറിയിക്കുകയും ചെയ്‍തിരുന്നു.  'കാക്കിപ്പട'യുടെ റീമേക്കില്‍ ആരൊക്കെയായിരിക്കും അഭിനയിക്കുക എന്നതറിയാൻ ആകാംക്ഷയോടെ കാത്തിരിക്കുകയാണ് ആരാധകരും.

തെളിവെടുപ്പിനായി കൊണ്ടുവരുന്ന ഒരു പ്രതിക്കൊപ്പം സഞ്ചരിക്കേണ്ടി വരുന്ന എട്ട് ആംഡ് പൊലീസ് ഉദ്യോഗസ്ഥരുടെ കഥയാണ് 'കാക്കിപ്പട' പറയുന്നത്. നിരഞ്‍ജ് മണിയൻപിള്ള രാജു, അപ്പാനി ശരത്ത്, ആരാധികാ, സുജിത് ശങ്കർ, മണികണ്ഠൻ ആചാരി, ജയിംസ് ഏല്യാ, സജിമോൻ പാറായിൽ, വിനോദ് സാക്, സൂര്യാ അനിൽ, പ്രദീപ്, മാലാ പാർവ്വതി, എന്നിവരും നിരവധി പുതുമുഖങ്ങളും ഈ ചിത്രത്തിൽ അണിനിരക്കുന്നു. 'കാക്കിപ്പട' എന്ന ചിത്രത്തിന്റെ സംഗീതം സംവിധാനം ജാസി ഗിഫ്റ്റ്. എസ് വി പ്രൊഡക്ഷൻസിന്റെ ബാനറിലാണ് ഷെജി വലിയകത്ത് ഈ ചിത്രം നിർമ്മിച്ചിരിക്കുന്നത്.

കലാസംവിധാനം സാബുറാം.  മേക്കപ്പ് പ്രദീപ് രംഗൻ, കോസ്റ്റ്യും ഡിസൈൻ. ഷിബു പരമേശ്വരൻ.  പ്രശാന്ത് കൃഷ്‍ ഛായാഗ്രാഹണം നിര്‍വഹിച്ചിരിക്കുന്നു. നിശ്ചല ഛായാഗ്രഹണം, അജി മസ്ക്കറ്റ്, നിർമ്മാണ നിർവ്വഹണം എസ് മുരുകൻ. പിആര്‍ഒ വാഴൂർ ജോസ് എന്നിവരുമായിരുന്നു.