കമല്‍ഹാസന്റെ പുതിയ നായകൻ ചിമ്പു, വീഡിയോ പുറത്ത്

ചിമ്പു നായകനാകുന്ന ചിത്രത്തിന്റെ പ്രഖ്യാപന വീഡിയോ കമല്‍ഹാസൻ പുറത്തുവിട്ടു.

'പത്ത് തല' എന്ന പുതിയ ചിത്രമാണ് ചിമ്പുവിന്റേതായി ആരാധകര്‍ ആകാംക്ഷയോടെ കാത്തിരിക്കുന്നത്. ഒബേലി എൻ കൃഷ്‍ണയാണ് ചിത്രം സംവിധാനം ചെയ്യുന്നത്. 'പത്തു തല'യുടെ റിലീസ് മാര്‍ച്ച് 30ന് ആയിരിക്കും എന്ന് പ്രഖ്യാപിച്ചിരുന്നു.  കമല്‍ഹാസൻ ചിമ്പുവിനെ നായകനാക്കി നിര്‍മിക്കുന്ന ചിത്രവും ഔദ്യോഗികമായി പ്രഖ്യാപിച്ചതാണ് ഇപ്പോള്‍ ആരാധകരെ ആവേശത്തിലാക്കുന്ന മറ്റൊരു പ്രധാന വാര്‍ത്ത.

ലോകേഷ് കനകരാജിന്റെ 'വിക്ര'ത്തിന്റെ വിജയത്തിനു ശേഷം കമല്‍ഹാസനും ആര്‍ മഹേന്ദ്രനും നിര്‍മിക്കുന്ന ചിത്രം ചിമ്പു നായകനായിട്ടാണ് എന്ന് പ്രഖ്യാപിച്ച് വീഡിയോയും പുറത്തുവിട്ടിരിക്കുകയാണ്. ഡെസിങ് പെരിയസ്വാമിയാണ് ചിത്രത്തിന്റെ സംവിധാനം. 'പത്ത് തല' എന്ന ചിത്രത്തിന്റെ ഛായാഗ്രാഹണം നിര്‍വഹിക്കുന്നത് ഫറൂഖ് ജെ ബാഷയാണ്. അനു സിത്താര, പ്രിയാ ഭവാനി ശങ്കര്‍, കാര്‍ത്തിക്, ഗൗതം വാസുദേവ് മേനോൻ എന്നിവര്‍ കഥാപാത്രങ്ങളാകുന്ന ചിത്രത്തിനായി എ ആര്‍ റഹ്‍മാൻ സ്വന്തം സംഗീതത്തില്‍ ആലപിച്ച ഗാനത്തിന്റെ വീഡിയോ അടുത്തിടെ പുറത്തുവിട്ടിരുന്നു.

ചിത്രത്തിന്റെ പ്രവര്‍ത്തകര്‍ക്കൊപ്പമുള്ള ഫോട്ടോ പങ്കുവെച്ച് സംവിധായകൻ ഒബേലി എൻ കൃഷ്‍ണ ചിത്രീകരണം പൂര്‍ത്തിയായതായി അറിയിച്ചത്. 'പത്ത് തല'യുടെ ഒടിടി റൈറ്റ്‍സ് വൻ തുകയ്‍ക്ക് വിറ്റുപോയതിനെ കുറിച്ചും വാര്‍ത്തകള്‍ വന്നിരുന്നു. ചിത്രത്തിന്റെ തിയറ്റര്‍ റിലീസിന് ശേഷമുള്ള ഒടിടി റൈറ്റ്സ് ആമസോണ്‍ പ്രൈം വീഡിയോയാണ് സ്വന്തമാക്കിയിരിക്കുന്നത് എന്നായിരുന്നു റിപ്പോര്‍ട്ട്. എന്തായാലും ചിമ്പുവിന് വലിയ പ്രതീക്ഷകളുള്ള ചിത്രമാണ് 'പത്ത് തല'.

ചിമ്പു നായകനാകുന്ന പുതിയ ചിത്രം എ ആര്‍ മുരുഗദോസ് സംവിധാനം ചെയ്‍തേക്കുമെന്നും റിപ്പോര്‍ട്ടുണ്ട്. ചിത്രം നിര്‍മിക്കാൻ ഹൊംമ്പാളെ ഫിലിംസ് ആലോചിക്കുന്നു. ഇക്കാര്യത്തില്‍ ഔദ്യോഗിക പ്രഖ്യാപനം വന്നിട്ടില. എ ആര്‍ മുരുഗദോസിന്റെ സംവിധാനത്തില്‍ ചിമ്പു നായകനായി സൂപ്പര്‍ഹീറോ ചിത്രം വരുന്നുവെന്ന അഭ്യൂഹം എന്തായാലും ആരാധകര്‍ ഏറ്റെടുത്തിരിക്കുകയാണ്. ചിമ്പു നായകനായി ഏറ്റവും ഒടുവില്‍ തിയറ്ററില്‍ എത്തിയ ചിത്രം 'വെന്ത് തനിന്തതു കാടാ'ണ്. ഗൗതം വാസുദേവ് മേനോനാണ് ചിത്രം സംവിധാനം ചെയ്‍തത്. 'വെന്ത് തനിന്തതു കാടി'ന് രണ്ടാം ഭാഗം വരുമെന്നും റിപ്പോര്‍ട്ടുണ്ട്.