സ്റ്റാർ സിംഗർ സീസൺ 9 റീലോഞ്ച് ഇവെന്‍റ് ഏഷ്യാനെറ്റിൽ

വിദ്യാസാഗറാണ് പരിപാടിയിലെ മുഖ്യാതിഥി

സംഗീതം, വിനോദം, ആഘോഷം എന്നിവയുടെ അവിസ്മരണീയ സായാഹ്നവുമായി മെഗാ സ്റ്റേജ് ഇവെന്റ് സ്റ്റാർ സിംഗർ സീസൺ 9 റീലോഞ്ച് ഇവെന്റ് ഏഷ്യാനെറ്റില്‍. 23 ന് വൈകിട്ട് 6 മണി മുതൽ ഏഷ്യാനെറ്റിൽ പരിപാടി സംപ്രേഷണം ചെയ്യും. പ്രശസ്ത സംഗീത സംവിധായകൻ വിദ്യാസാഗറാണ് പരിപാടിയിലെ മുഖ്യാതിഥി. സംഗീതയാത്രയുടെ 27 വർഷം പൂർത്തിയാക്കുന്ന അദ്ദേഹത്തെ ഏഷ്യാനെറ്റ് ചാനൽ ഹെഡ് കിഷൻ കുമാർ പൊന്നാടയണിയിച്ച് ആദരിച്ചു. ഈ പരിപാടിയിൽ ഉൾപ്പെടുത്തിയിരിക്കുന്ന എല്ലാ ഗാനങ്ങളും അദ്ദേഹത്തിന്റെ കരിയറിലെ മികച്ച ഹിറ്റുകൾ ആണ്.

ഈ ആഘോഷരാവിൽവച്ച് കുഞ്ചാക്കോ ബോബനും അനഘയും അടുത്തിടെ പുറത്തിറങ്ങിയ അവരുടെ സിനിമ ഗര്‍ര്‍ര്‍-നെക്കുറിച്ചുള്ള അനുഭവങ്ങൾ പങ്കിടുന്നു. കൂടാതെ നടി പാർവതി തിരുവോത്ത് അവരുടെ പുതിയ സിനിമ ഉള്ളൊഴുക്ക് സംബന്ധിച്ച അനുഭവങ്ങൾ പങ്കുവെക്കും. സ്റ്റാർ സിംഗർ സീസൺ 9 വിധികർത്താക്കളായ കെ എസ് ചിത്ര, വിധു പ്രതാപ്, സിതാര എന്നിവരുടെ മാസ്മരിക ഗാന പ്രകടനങ്ങൾ ഈ  സായാഹ്നത്തിന് മാറ്റുകൂട്ടും. കൂടാതെ, ഈ സീസണിലെ മികച്ച 10 മത്സരാർത്ഥികളുടെ ചടുലമായ നൃത്ത പ്രകടനങ്ങൾ, സ്കിറ്റുകൾ, ആകർഷകമായ ഗാനങ്ങൾ എന്നിവയാൽ വേദി സജീവമാകും.

ഏഷ്യാനെറ്റ് ന്യൂസ് ലൈവ് കാണാം