രത്തൻ ടാറ്റയുടെ ജീവിത കഥ സിനിമയാക്കാൻ സുധ കൊങ്കര

സുധ കൊങ്കര ചിത്രം അടുത്ത വര്‍ഷം തുടങ്ങുമെന്നാണ് റിപ്പോര്‍ട്ട്.

'സൂരരൈ പൊട്ര്' എന്ന ചിത്രത്തിലൂടെ പ്രേക്ഷ ശ്രദ്ധ നേടിയ സംവിധായികയാണ് സുധ കൊങ്കര. എയര്‍ ഡെക്കാണ്‍ സ്ഥാപകനും ഇന്ത്യൻ ആര്‍മിയിലെ മുൻ ക്യാപ്റ്റനുമായ ജി ആര്‍ ഗോപിനാഥിന്റെ ജീവിത കഥ പറഞ്ഞ ചിത്രം ദേശീയ അവാര്‍ഡും നേടിയിരുന്നു.  ചിത്രത്തിന്റെ തിരക്കഥാകൃത്തുക്കളില്‍ ഒരാളുമായിരുന്നു സുധ കൊങ്കര. ഇപ്പോഴിതാ സുധ കൊങ്കരയുടെ പുതിയൊരു ചിത്രത്തെ കുറിച്ചുള്ള വാര്‍ത്തയാണ് പുറത്തുവരുന്നത്.

പ്രമുഖ വ്യവസായിയായ രത്തൻ ടാറ്റയുടെ ജീവിതകഥ പ്രമേയമാകുന്ന ചിത്രം സംവിധാനം ചെയ്യാൻ സുധ കൊങ്കര ഒരുങ്ങുന്നുവെന്നാണ് പുതിയ റിപ്പോര്‍ട്ട്. രത്തൻ ടാറ്റയുടെ ജീവിതത്തെ കുറിച്ച് പുറംലോകത്തിന് ലഭ്യമല്ലാത്ത വിവരങ്ങള്‍ വരെ ചിത്രത്തില്‍ ഉള്‍പ്പെടുത്തുമെന്ന് സുധ കൊങ്കരയുമായി അടുത്ത വാര്‍ത്താവൃത്തങ്ങള്‍ പറയുന്നു. ലോകമെമ്പാടുമുള്ള ഇന്ത്യക്കാര്‍ക്ക് ഒരു പ്രചോദനമാണ് രത്തൻ ടാറ്റ. അടുത്തവര്‍ഷം ആയിരിക്കും ചിത്രം തുടങ്ങുകയെന്നും ഇവര്‍ പറയുന്നു.

ദേശീയ അവാര്‍ഡ് ജേതാവും മലയാളിയുമായ കീര്‍ത്തി സുരേഷും സുധ കൊങ്കരയും ഒന്നിക്കുന്നുവെന്നും നേരത്തെ റിപ്പോര്‍ട്ടുകള്‍ വന്നിരുന്നു. 'കെജിഎഫി'ന്റെ നിര്‍മാതാക്കളായ ഹോംബാളെയുടെ പുതിയ ചിത്രം സുധ കൊങ്കര സംവിധാനം ചെയ്യുന്നുണ്ട്. കീര്‍ത്തി സുരേഷ് ചിത്രം സംബന്ധിച്ച് കൂടുതല്‍ വിവരങ്ങള്‍ ലഭ്യമല്ല. എന്തായാലും കീര്‍ത്തി ആരാധകര്‍ക്ക് ആവേശം പകരുന്ന ഒരു വാര്‍ത്തയാണ് ഇത്.

'സൂരരൈ പൊട്ര്' എന്ന സിനിമയില്‍ സുധ കൊങ്കരയുടെ സംവിധാനത്തില്‍ സൂര്യയായിരുന്നു നായകൻ. മലയാളികളുടെ പ്രിയ താരം അപര്‍ണ ബാലമുരളി നായികയുമായി എത്തി. ജി വി പ്രകാശ് കുമാറായിരുന്നു സംഗീത സംവിധായകൻ. ആമസോണ്‍ പ്രൈം വീഡിയോയിലൂടെയായിരുന്നു ചിത്രം റിലീസ് ചെയ്‍തത്. സൂര്യ തന്നെയായിരുന്നു ചിത്രം നിര്‍മിച്ചത്. മികച്ച ഫീച്ചര്‍ സിനിമയ്‍ക്കുള്ള ദേശീയ അവാര്‍ഡ് 'സൂരരൈ പൊട്ര്' നേടിയപ്പോള്‍ നടനായി സൂര്യയും നടിയായി അപര്‍ണ ബാലമുരളിയും പശ്ചാത്തല സംഗീത സംവിധായകനായ ജി വി പ്രകാശ് കുമാറും തെരഞ്ഞെടുക്കപ്പെട്ടു. രത്തൻ ടാറ്റയുടെ ജീവിത കഥയും സുധ കൊങ്കരയുടെ സംവിധാനത്തില്‍ മികച്ച ഒരു സിനിമയാകും എന്ന പ്രതീക്ഷയിലാണ് ആരാധകര്‍.