കടുവകളെ ദത്തെടുത്ത് വിജയ് സേതുപതി; ചെന്നൈയിലെ മൃഗശാലയ്ക്ക് കൈമാറിയത് അഞ്ച് ലക്ഷം

മൃ​ഗശാല അധികൃതരുമായി ബന്ധപ്പെട്ട് ആറുമാസത്തേയ്ക്ക് രണ്ട് കടുവകളെ ദത്തെടുക്കാൻ തീരുമാനിക്കുകയായിരുന്നു.

ചെന്നൈ: മൃ​ഗശാലയിൽ നിന്ന് കടുവകളെ ദത്തെടുത്ത് വിജയ് സേതുപതി. ചെന്നൈ വണ്ടലൂർ മൃ​ഗശാലയിൽ നിന്നാണ് അഞ്ച് വയസ്സുള്ള ആദിത്യ, നാലര വയസ്സുള്ള ആർതി എന്നീ കടുവകളെ ദത്തെടുത്തത്. മൃ​ഗശാലയിൽ സംഘടിപ്പിച്ച ചെറിയ ചടങ്ങിൽ വച്ച് കടുവകളെ സംരക്ഷിക്കുന്നതിന് വേണ്ടി അഞ്ച് ലക്ഷം രൂപയുടെ ചെക്ക് മൃ​ഗശാല അധികൃതർക്ക് താരം കൈമാറിയതായി ടൈംസ് ഓഫ് ഇന്ത്യ റിപ്പോർട്ട് ചെയ്യുന്നു. ഡയറക്ടർ യോ​ഗേഷ് സിം​ഗ്, ഡെപ്യൂട്ടി ഡയറക്ടർ സുധാ രമൺ എന്നിവരാണ് ചെക്ക് സ്വീകരിച്ചത്.

തന്റെ സുഹൃത്തുക്കളിലൊരാളാണ് മൃ​ഗങ്ങളെ ദത്തെടുക്കുന്നതിനെക്കുറിച്ച് തന്നോട് പറഞ്ഞതെന്ന് വിജയ് സേതുപതി വെളിപ്പെടുത്തി. പിന്നീട് മൃ​ഗശാല അധികൃതരുമായി ബന്ധപ്പെട്ട് ആറുമാസത്തേയ്ക്ക് രണ്ട് കടുവകളെ ദത്തെടുക്കാൻ തീരുമാനിക്കുകയായിരുന്നു. ആറ് മാസത്തിന് ശേഷം മറ്റ് മൃ​ഗങ്ങളിലൊന്നിനെ ദത്തെടുക്കാൻ ആലോചനയുണ്ടെന്നും താരം വ്യക്തമാക്കി. മൃ​ഗശാലയിൽ നിന്ന് ഏതെങ്കിലും ഒരു മൃ​ഗത്തെ ആളുകൾ ദത്തെടുക്കണമെന്നായിരുന്നു മൃ​ഗശാലയിലെത്തിയവരോട് താരത്തിന്റെ അഭ്യർത്ഥന. 

2009 ലാണ് മൃ​ഗങ്ങളെ ദത്തെടുക്കൽ പദ്ധതി ഈ മൃ​ഗശാലയിൽ ആരംഭിച്ചത്. കഴിഞ്ഞ വർഷം വരെ 71.61 ലക്ഷം രൂപയാണ് ഈ പദ്ധതി പ്രകാരം മൃ​ഗശാലയ്ക്ക് ലഭിച്ചത്. സ്വകാര്യ കമ്പനികളും വ്യക്തികളും ​ഗവൺമെന്റ് അം​ഗീകൃത സ്ഥാപനങ്ങളും ഈ പദ്ധതിയിൽ പങ്കാളികളായിട്ടുണ്ട്.