'എതക്ക് ഇവളോ ഹൈപ്പ്', മഞ്ഞുമ്മൽ ബോയ്സിൽ തൃപ്തിയല്ലെന്ന് നടി, രൂക്ഷ വിമർശനവുമായി മലയാളികൾ

ഞാൻ ഒരു മലയാളി ആണെന്ന് പറഞ്ഞ് കൊണ്ടാണ് ഇവർ സംസാരിച്ച് തുടങ്ങുന്നത്. 

നല്ല സിനിമകൾക്ക് ഭാഷ ഒരു പ്രശ്നമല്ലെന്ന് തെളിയിച്ച് കൊടുത്തിരിക്കുകയാണ് മഞ്ഞുമ്മൽ ബോയ്സ് എന്ന മലയാള സിനിമ. ചിദംബരത്തിന്റെ സംവിധാനത്തിൽ എത്തിയ ഈ സർവൈവൽ ത്രില്ലർ ചിത്രം ഒരുകൂട്ടം സുഹൃത്തുക്കളുടെ യഥാർത്ഥ കഥ ആയിരുന്നു പറഞ്ഞത്. മറ്റ് ഏത് ഭാഷകളിലെക്കാളും മഞ്ഞുമ്മലിന് വലിയ സ്വീകാര്യതയാണ് തമിഴ്നാട്ടിൽ ചിത്രത്തിന് ലഭിച്ചിരിക്കുന്നത്. ഒപ്പം മികച്ച കളക്ഷനും. എങ്ങും ചിത്രത്തെ കുറിച്ച് പ്രശംസകൾ മുഴങ്ങവെ മോശം പ്രതികരണവുമായി എത്തിയിരിക്കുകയാണ് തമിഴ് നടി മേഘ്ന(meghana.ellen). 

മേഘ്നയുടെ അരിമാപ്പട്ടി ശക്തിവേൽ എന്ന പുതിയ ചിത്രം ഇന്ന് റിലീസ് ചെയ്തിരുന്നു. സിനിമ കണ്ട ശേഷം തിയറ്റർ വിട്ടിറങ്ങിയപ്പോഴായിരുന്നു മേഘ്നയുടെ പ്രതികരണം. ഞാൻ ഒരു മലയാളി ആണെന്ന് പറഞ്ഞ് കൊണ്ടാണ് ഇവർ സംസാരിച്ച് തുടങ്ങുന്നത്. "ഞാൻ മനസിലാക്കിയിടത്തോളം കേരളത്തിൽ മഞ്ഞുമ്മൽ ബോയ്സിന് ഇത്രത്തോളം പ്രതികരണം ഒന്നുമില്ല. എന്തുകൊണ്ട് തമിഴ്നാട്ടിൽ ഇങ്ങനെ ആഘോഷിക്കുന്നതെന്ന് മനസിലാകുന്നില്ല. വ്യത്യസ്തമായി എന്തെങ്കിലും കൊടുത്തോ എന്നും അറിയില്ല. ഞാൻ സിനിമ കണ്ട ആളാണ്. പക്ഷേ ഈ പറയുന്ന രീതിയിൽ തൃപ്തികരമല്ല അത്. അങ്ങനെ ഒന്നും കിട്ടിയുമില്ല. ഇത്രത്തോളം ഹൈപ്പ് കൊടുക്കാൻ അതിൽ എന്താണ് ഉള്ളതെന്നും മനസിലാകുന്നില്ല", എന്നാണ് മേഘ്ന പറഞ്ഞത്. 

അരിമാപ്പട്ടി ശക്തിവേലിന്റെ സംവിധായകനും ഇവർക്കൊപ്പം ഉണ്ടായിരുന്നു. മേഘ്ന ഇത് പറഞ്ഞപ്പോൾ, മഞ്ഞുമ്മൽ ബോയ്സിൽ ഇമോഷൻസ് കണക്ട് ആകുന്നുണ്ടെന്നാണ് അദ്ദേഹം പറഞ്ഞത്. ഇതിന്റെ വീഡിയോ പുറത്തുവന്നതിന് പിന്നാലെ കമന്റുമായി മലയാളികളും രം​ഗത്ത് എത്തി. സംവിധായകന് കാര്യം മനസിലായെന്ന് പറഞ്ഞ ഇവർ നടിക്കെതിരെ രൂക്ഷ വിമർശനവും ട്രോളുമാണ് ഉയർത്തുന്നത്. 

"ആരാണിവർ ? മലയാളിയുടെ വിലകളയാനായിട്ട്, യാരെടാ ഈ മലയാളി.. ഇതെവിടുന്നു പൊട്ടി മുളച്ചു..ഡയറക്ടർ ഒരു പാവമാണെന്നു തോനുന്നു അതുകൊണ്ട് കൂടുതലൊന്നും പറയുന്നില്ല, മലയാളികളുടെ യഥാർത്ഥ സ്വഭാവം അവൾ കാണിച്ചു, മലയാളി ആയിട്ടും മഞ്ഞുമ്മൽ എന്ന് മര്യാദയ്ക്ക് പറയാൻ അറിയില്ലേ ഇവൾക്ക് ?മലയാളി തന്നെ ഇവൾ...മഞ്ച് അല്ല ഡയറി മിൽക്ക്...മഞ്ഞുമ്മൽ എന്ന് മര്യാദക്ക് പറയാൻ തന്നെ അറിയില്ല, ആഹാ മലയാളി സ്വഭാവം കാണിച്ചു, കൊള്ളാം മോളെ, പുതിയ സിനിമ ശ്രദ്ധിക്കപ്പെടുന്നില്ല. അതിന്റെ കലിപ്പ് കാണിക്കുന്നതാണ്", എന്നിങ്ങനെ പോകുന്നു കമന്റുകൾ. 

വീഡിയോ വന്നതിന് പിന്നാലെ നടി ആരാണെന്നും മലയാളികൾ കണ്ടെത്തി കഴിഞ്ഞു. 2017 റിലീസ് ചെയ്ത ഉരുതിക്കോൽ എന്ന ചിത്രത്തിലൂടെയാണ് മേഘ്ന വെള്ളിത്തിരയിൽ എത്തുന്നത്. ശേഷം ബൈരി, ഐപിസി 376 തുടങ്ങിയ സിനിമകളിലും പ്രധാന വേഷത്തിൽ എത്തിയിരുന്നു. എന്തായാലും മേഘ്നയുടെ വീഡിയോ സോഷ്യൽ മീഡിയയിൽ വൈറൽ ആകുകയാണ്.