ഇവിടെ നടന്‍മാര്‍ 500 കോടിക്കും 1000 കോടിയും പിന്നാലെ, മമ്മൂട്ടിയോ?: വാചാലനായി തമിഴ് മാധ്യമപ്രവര്‍ത്തകന്‍

ഇന്ന് മുതൽ ഷോകളുടെയും സ്ക്രീനുകളുടെയും എണ്ണത്തിൽ വർദ്ധനവുണ്ട്.

മാത്യു ദേവസി, മമ്മൂട്ടി എന്ന നടന്റെ അഭിയപാടവത്തിന്റെ മറ്റൊരു നേർ സാക്ഷ്യം ആയിരിക്കുകയാണ് ഈ കഥാപാത്രം. എന്നും ചെയ്യുന്ന വേഷങ്ങളിൽ വ്യത്യസ്തത തേടുന്ന മമ്മൂട്ടി മാത്യുവായി സ്ക്രീനിൽ എത്തിയപ്പോൾ അത് പ്രേക്ഷകന്റെ ഉള്ളിനെയും കണ്ണിനെയും ഈറൻ അണിയിച്ചു. ജിയോ ബേബിയുടെ സംവിധാനത്തിൽ ഇറങ്ങിയ 'കാതലി'ന് എങ്ങും പ്രശംസാപ്രവാഹം ആണ്. സോഷ്യൽ മീഡിയയിൽ എങ്ങും 'കാതൽ' തന്നെ താരം. ഈ അവസരത്തിൽ സിനിമയെയും മമ്മൂട്ടിയെയും പ്രശംസിച്ച് കൊണ്ട് രം​ഗത്ത് എത്തിയിരിക്കുകയാണ് തമിഴ് മാധ്യമപ്രവർത്തകൻ വിശൻ വി. 

തങ്ങളുടെ താരങ്ങൾ കോടി ക്ലബ്ബിലേക്ക് പോയ്ക്കൊണ്ടിരിക്കുമ്പോൾ മമ്മൂട്ടി വ്യത്യസ്ത തേടി പോകുകയാണെന്ന് വിശൻ പറയുന്നു 'ഇത് സ്നേഹം- കാതൽ. നമ്മുടെ മുൻനിര താരങ്ങൾ 500 കോടിയും 1000 കോടിയും ലക്ഷ്യമാക്കി സഞ്ചരിക്കുമ്പോൾ അയൽ സംസ്ഥാനത്തിലെ മഹാനായ കലാകാരൻ മമ്മൂട്ടി സ്‌ക്രീനിൽ വ്യത്യസ്തമായെന്തോ  അവതരിപ്പിക്കുകയാണ്!!! സിനിമ കണ്ടിട്ട് സമയം കുറെ കഴിഞ്ഞു. എന്നിട്ടും ആ ഞെട്ടലും ആശ്ചര്യവും കുറഞ്ഞിട്ടില്ല. സിനിമ ഒടിടിയിൽ റിലീസ് ചെയ്യുന്നത് വരെ കാത്തിരിക്കരുത്. കഴിയുമെങ്കിൽ ഉടൻ തിയറ്ററിൽ കാണൂ', എന്നാണ് വിശൻ കുറിച്ചത്. കുറിപ്പിനൊപ്പം മമ്മൂട്ടിയുടെ ക്യാരക്ടർ ലുക്കും അദ്ദേഹം പങ്കുവച്ചിട്ടുണ്ട്. 

അതേസമയം, ആദ്യദിനം കാതൽ നേടിയ കളക്ഷൻ 1.5 കോടിയാണെന്ന് ട്രാക്കർന്മാർ പറയുന്നു. ഇന്ന് മുതൽ ഷോകളുടെയും സ്ക്രീനുകളുടെയും എണ്ണത്തിൽ വർദ്ധനവുണ്ട്. അതുകൊണ്ട് തന്നെ വരും ദിവസങ്ങളിൽ കാതൽ ബോക്സ് ഓഫീസിൽ വൻ ചലനം സൃഷ്ടിക്കുമെന്നാണ് വിലയിരുത്തലുകൾ. 

കഴിഞ്ഞ ദിവസമാണ് കാതൽ റിലീസ് ചെയ്തത്. ജ്യോതികയാണ് നായിക. ഓമന എന്ന കഥാപാത്രമായി ഉള്ളുതൊടുന്ന അഭിനയം ആണ് ജ്യോതിക സ്ക്രീനിൽ കാഴ്ച വച്ചിരിക്കുന്നത്. മമ്മൂട്ടി കമ്പനി നിർമിച്ച ചിത്രത്തിന് തിരക്കഥ ഒരുക്കിയിരിക്കുന്നത് ആദർശ് സുകുമാരനും പോൾസൺ സ്കറിയയും ചേർന്നാണ്.

ഏഷ്യാനെറ്റ് ന്യൂസ് തത്സമയ വാർത്തകൾ..