'ആ സിനിമ കുറച്ചുകൂടി നന്നായി പ്രൊമോട്ട് ചെയ്തിരുന്നെങ്കിൽ'; 'ഡൊമിനിക്കിനെ'ക്കുറിച്ച് ഗൗതം മേനോൻ

ഗൗതം മേനോന്‍റെ മലയാളത്തിലെ സംവിധാന അരങ്ങേറ്റം

മമ്മൂട്ടിയുടെ ഈ വര്‍ഷത്തെ ആദ്യ റിലീസ് ആയി തിയറ്ററുകളില്‍ എത്തിയ ചിത്രമാണ് ഡൊമിനിക് ആന്‍ഡ് ദി ലേഡീസ് പഴ്സ്. ഗൗതം വസുദേവ് മേനോന്‍ മലയാളത്തില്‍ ആദ്യമായി സംവിധാനം ചെയ്യുന്ന ചിത്രമെന്ന പ്രത്യേകതയും ഈ സിനിമയ്ക്ക് ഉണ്ടായിരുന്നു. എന്നാല്‍ വലിയ പ്രേക്ഷകപ്രീതി നേടാന്‍ ചിത്രത്തിന് സാധിച്ചില്ല. ഇപ്പോഴിതാ ചിത്രം കുറച്ചുകൂടി നന്നായി പ്രൊമോട്ട് ചെയ്യപ്പെട്ടിരുന്നെങ്കില്‍ എന്ന് പറയുകയാണ് സംവിധായകന്‍ ഗൗതം മേനോന്‍. പേളി മാണിക്ക് നല്‍കിയ അഭിമുഖത്തിലാണ് ചിത്രത്തിന്‍റെ പരസ്യ പ്രചരണം പ്രേക്ഷകരിലേക്ക് എത്താന്‍ പര്യാപ്തമായിരുന്നില്ലെന്ന് അദ്ദേഹം പറയുന്നത്.

"കുറച്ചുകൂടി നന്നായി ആ സിനിമ പ്രൊമോട്ട് ചെയ്തിരുന്നെങ്കിലെന്ന് എനിക്ക് തോന്നി. ഡൊമിനിക്കിനെക്കുറിച്ച് ആളുകൾ അങ്ങനെ അറിഞ്ഞിരുന്നില്ല. മമ്മൂക്കയെ നായകനാക്കി നിങ്ങൾ സംവിധാനം ചെയ്ത സിനിമ എപ്പോഴാണ് റിലീസ് ചെയ്യുന്നതെന്ന് ഇപ്പോഴും ആളുകൾ എന്നോട് ചോദിക്കാറുണ്ട്. ഒരു ജേണലിസ്റ്റ് എന്നോട് ചോദിച്ചു രണ്ട് ചിത്രങ്ങളാണല്ലോ നിങ്ങളുടേതായി പുറത്തെത്താനുള്ളത് എന്ന്, വിക്രം നായകനാവുന്ന ധ്രുവനക്ഷത്രവും മമ്മൂട്ടി നായകനാവുന്ന ഡൊമിനിക്കും എന്ന്. സിനിമ റിലീസ് ആയി എന്ന് ഞാൻ പറഞ്ഞു. കേരളത്തിലും ഞാൻ ഈ ചോദ്യം നേരിട്ടിട്ടുണ്ട്", ഗൗതം മേനോന്‍ പറയുന്നു.

മമ്മൂട്ടി കമ്പനിയാണ് ഡൊമിന്ക് ആന്‍ഡ് ദി ലേഡീസ് പഴ്സ് നിര്‍മ്മിച്ചത്. ഈ ബാനര്‍ നിര്‍മ്മിക്കുന്ന ആറാമത്തെ ചിത്രമായിരുന്നു ഇത്. ഡൊമിനിക് ഡിറ്റക്റ്റീവ്സ് എന്ന പേരില്‍ കൊച്ചി നഗരത്തില്‍ ഒരു ഡിറ്റക്റ്റീവ് ഏജന്‍സി നടത്തുന്ന ആളാണ് മമ്മൂട്ടി അവതരിപ്പിക്കുന്ന ടൈറ്റില്‍ കഥാപാത്രം. അതേസമയം വിഷു റിലീസ് ആയി ഇന്ന് തിയറ്ററുകളില്‍ എത്തിയ ബസൂക്ക എന്ന മമ്മൂട്ടി ചിത്രത്തില്‍ ഗൗതം മേനോന്‍ ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. ഡീനോ ഡെന്നിസ് ആണ് ഈ ചിത്രത്തിന്‍റെ സംവിധാനം. 

ഏഷ്യാനെറ്റ് ന്യൂസ് ലൈവ് കാണാം