Wedding Rumour : രശ്മികയെ വിവാഹം ചെയ്യാന്‍ ഒരുങ്ങുന്നുവെന്ന വാര്‍ത്ത; പ്രതികരണവുമായി വിജയ് ദേവരകൊണ്ട

ലൈഗര്‍ ആണ് വിജയ് ദേവരകൊണ്ടയുടെ പുറത്തിറങ്ങാനുള്ള ചിത്രം

ചലച്ചിത്രതാരങ്ങളെക്കുറിച്ചുള്ള ഗോസിപ്പുകള്‍ ഇന്നോ ഇന്നലെയോ തുടങ്ങിയതല്ല. അവരുടെ പ്രണയത്തെയും വിവാഹത്തെയും കുറിച്ചുള്ള ഊഹാപോഹങ്ങള്‍ വാര്‍ത്തകള്‍ എന്ന നിലയില്‍ പലപ്പോഴും മാധ്യമങ്ങളില്‍ പ്രത്യക്ഷപ്പെടാറുണ്ട്. സോഷ്യല്‍ മീഡിയയിലൂടെ പ്രചരണം ശക്തമാവുമ്പോള്‍ അവസാനം താരങ്ങള്‍ക്ക് പ്രതികരിക്കേണ്ടി വരാറുമുണ്ട്. ഇപ്പോഴിതാ തെലുങ്ക് താരം വിജയ് ദേവരകൊണ്ടയ്ക്കാണ് ഒരു വ്യാജ വാര്‍ത്തയുടെ പേരില്‍ പ്രതികരിക്കേണ്ടി വന്നിരിക്കുന്നത്. നടി രശ്മിക മന്ദാനയുമായുള്ള വിജയ് ദേവരകൊണ്ടയുടെ വിവാഹം (Vijay Devarakonda Rashmika Mandanna Marriage) ഉറപ്പിച്ചുവെന്നും ഈ വര്‍ഷം തന്നെ വിവാഹം ഉണ്ടാവുമെന്നുമായിരുന്നു വാര്‍ത്ത. പ്രമുഖ ദേശീയ മാധ്യമങ്ങളിലടക്കം കഴിഞ്ഞ ദിവസങ്ങളില്‍ ഇത് വാര്‍ത്തയായി. സോഷ്യല്‍ മീഡിയയിലൂടെ ആരാധകരും ഇതിന് പ്രചാരം നല്‍കാന്‍ തുടങ്ങിയതോടെ പ്രതികരണവുമായി എത്തിയിരിക്കുകയാണ് വിജയ് ദേവരകൊണ്ട. ട്വിറ്ററിലൂടെയാണ് അദ്ദേഹത്തിന്‍റെ പ്രതികരണം.

പതിവുപോലെ അസംബന്ധം, എന്നാണ് വാര്‍ത്ത എന്തെന്ന് എടുത്ത് പറയാതെ ദേവരകൊണ്ടയുടെ പ്രതികരണം. സിനിമാസ്വാദകരുടെ ഇഷ്ട പ്രണയ ജോഡികളാണ് വിജയ് ദേവരകൊണ്ടയും രശ്മിക മന്ദാനയും. ​ഗീതാ ​ഗോവിന്ദം, ഡിയർ കൊമ്രേഡ് തുടങ്ങിയ ചിത്രങ്ങളിലൂടെ മലയാളികൾക്കും ഇരുവരും സുപരിചിതരായത്. ഇരുവരും പ്രണയത്തിലാണെന്ന തരത്തിലുള്ള വാർത്തകൾ മുന്‍പും സോഷ്യല്‍ മീഡിയയില്‍ ചര്‍ച്ചയായിട്ടുണ്ട്. എന്നാൽ ഇക്കാര്യത്തെക്കുറിച്ചുള്ള ചോദ്യത്തിന് തങ്ങൾ നല്ല സുഹൃത്തുക്കൾ മാത്രമാണെന്നാണ് ഇരുവരും മറുപടി നല്‍കാറ്.

അതേസമയം, ഇരുവരും തങ്ങളുടെ അഭിനയ ജീവിതത്തിന്റെ തിരക്കുകളിലാണ്. രശ്മിക ബോളിവുഡ് അരങ്ങേറ്റത്തിനുള്ള ഒരുക്കത്തിലാണ്. അമിതാഭ് ബച്ചനൊപ്പം  ‘ഗുഡ്ബൈ‘ എന്ന ചിത്രമാണ് ബോളിവുഡിൽ ഒരുങ്ങുന്നത്. ബോളിവുഡിലെ പ്രമുഖ നിർമ്മാതാവായ ഏക്ത കപൂറാണ് ചിത്രം നിർമ്മിക്കുന്നത്. അല്ലു അർജുൻ നായകനായി എത്തിയ ഹിറ്റ് ചിത്രം പുഷ്പയാണ് രശ്മികയുടേതായി ഒടുവിൽ പുറത്തിറങ്ങിയ ചിത്രം. ശ്രീവല്ലി എന്ന നായികാ കഥാപാത്രത്തെയാണ് രശ്മിക അവതരിപ്പിച്ചത്. കഴിഞ്ഞ വർഷം ഡിസംബര്‍ 17നാണ് പുഷ്പ ലോകവ്യാപകമായി തിയറ്ററില്‍ റിലീസ് ചെയ്തത്. തെലുങ്കിന് പുറമെ കന്നട, മലയാളം, തമിഴ്, ഹിന്ദി എന്നീ ഭാഷകളിലാണ് ചിത്രം പുറത്തിറങ്ങിയത്. തിയറ്ററിൽ മികച്ച പ്രതികരണം നേടിയ പുഷ്പ ജനുവരി ആദ്യ വാരം ആമസോൺ പ്രൈമിലൂടെ ഡിജിറ്റൽ സ്ട്രീമിങ്ങും ആരംഭിച്ചിരുന്നു. 

അതേസമയം പുരി ജഗന്നാഥിന്റെ ലൈഗർ എന്ന സിനിമയുടെ ചിത്രീകരണവുമായി തിരക്കിലാണ് വിജയ് ഇപ്പോൾ. അനന്യ പാണ്ഡേ നായികയാകുന്ന ചിത്രം വിജയ്‍യുടെ ആദ്യ ബോളിവുഡ് ചിത്രവുമാണ്. ബോക്സിംഗ് ഇതിഹാസം മൈക്ക് ടൈസണും ചിത്രത്തില്‍ അഭിനയിക്കുന്നുണ്ട്. മണി ശര്‍മയാണ് ചിത്രത്തിന്റെ സംഗീത സംവിധാനം. യാഷ് രാജ് ഫിലിംസാണ് ചിത്രത്തിന്റെ വിതരണം. മിക്സഡ് മാർഷ്യൽ ആർട്‍സ് താരമായാണ് വിജയ് ദേവരകൊണ്ട വേഷമിടുന്നത്.ഹിന്ദി, തെലുങ്ക് ഭാഷകളിലാണ് ചിത്രം പ്രദര്‍ശനത്തിന് എത്തുക. തമിഴിലും കന്നഡയിലും മലയാളത്തിലും മൊഴിമാറ്റ പതിപ്പും പ്രദര്‍ശനത്തിന് എത്തും. തിയറ്റര്‍ റിലീസ് ആണ് ചിത്രം.