പുലിവാല് പിടിച്ച് ബച്ചൻ, വിവാദ ഫോട്ടോയില്‍ പ്രതികരണവുമായി മുംബൈ പൊലീസ്

അമിതാഭ് ബച്ചനെ വിമര്‍ശിച്ച് ആരാധകര്‍ രംഗത്ത് എത്തിയിരുന്നു.

അമിതാഭ് ബച്ചൻ പങ്കുവെച്ച ഒരു ഫോട്ടോ കഴിഞ്ഞ ദിവസം വലിയ ചര്‍ച്ചയായി മാറിയിരുന്നു. ട്രാഫിക്ക് ബ്ലോക്കില്‍ കുടുങ്ങിയ തന്നെ സിനിമാ സെറ്റില്‍ എത്താൻ ഒരു ബൈക്ക് യാത്രികൻ സഹായിച്ചു എന്ന് വ്യക്തമാക്കിയാണ് അമിതാതാഭ് ബച്ചൻ ഫോട്ടോ പങ്കുവെച്ചത്. ഒട്ടേറെ പേര്‍ താരത്തെ അഭിനന്ദിച്ച് രംഗത്ത് എത്തുകയും ചെയ്‍തു. എന്നാല്‍ ഹെല്‍മെറ്റ് വയ്‍ക്കാത്തതിന് പേരില്‍ താരം ഇപ്പോള്‍ കുടുങ്ങിയിരിക്കുകയാണ്.

ഈ റൈഡിന് നന്ദിയുണ്ട് സുഹൃത്തേ. നിങ്ങളെ എനിക്കറിയില്ല. പക്ഷെ നിങ്ങള്‍ കൃത്യമായി എന്നെ ജോലിക്കായി കുരുക്കഴിയാത്ത ട്രാഫിക്ക് ജാം ഒഴിവാക്കി വേഗത്തില്‍ തന്നെ ലൊക്കേഷനില്‍ എത്തിച്ചു. മഞ്ഞ ടീഷര്‍ട്ടും, തോപ്പിയും ഇട്ട സുഹൃത്തേ നിങ്ങള്‍ക്ക് നന്ദി എന്നായിരുന്നു അമിതാഭ് ബച്ചൻ എഴുതിയിരുന്നത്.

തിരക്കുള്ള റോഡില്‍ ലിഫ്റ്റ് എടുത്താണെങ്കിലും ജോലിക്ക് എത്തുന്ന അമിതാഭിന്‍റെ കൃത്യനിഷ്ഠയെ പലരും പുകഴ്ത്തി. എന്നാല്‍ എല്ലാവര്‍ക്കും മാതൃകയാകേണ്ട ഒരു സിനിമാ നടൻ ഹെല്‍മറ്റ് ഇല്ലാതെ ഇരുചക്രവാഹനത്തില്‍ സഞ്ചരിക്കുന്നത് ശരിയാണോ എന്ന ചോദ്യമാണ് മറ്റ് ചിലര്‍ ഉയര്‍ത്തിയത്. എന്തായാലും പെട്ടെന്നുള്ള യാത്രയല്ലേ, പ്രതീക്ഷിച്ചു കാണില്ല, പെട്ടെന്ന് ഹെല്‍മറ്റ് കിട്ടിയില്ലെന്ന് ചിലര്‍ ആരാധകര്‍ മറുപടി പറഞ്ഞു. പക്ഷേ മാതൃകാപരമാല്ലാത്ത ഇത്തരം ഒരു ഫോട്ടോബച്ചന്‍ പോസ്റ്റ് ചെയ്യുന്നത് എന്തിന് എന്ന മറുചോദ്യവുമായി വിമര്‍ശകരും എത്തി.

മുംബൈ പൊലീസിനെ ടാഗ് ചെയ്‍ത് ചിത്രം ചിലര്‍ പങ്കുവയ്‍ക്കുകയും ചെയ്‍തു. ഞങ്ങള്‍ ഇത് ട്രാഫിക് ഡിപ്പാര്‍ട്‍മെന്റിനെ അറിയിച്ചിട്ടുണ്ട് എന്നായിരുന്നു മുംബൈ പൊലീസ് ഇതിനോട് പ്രതികരിച്ചത്. വികാസ് ബഹല്‍ സംവിധാനം ചെയ്യുന്ന ചിത്രം 'ഗണപത്- പാര്‍ട്ട് വണ്‍' ആണ് അമിതാഭ് ബച്ചന്റേതായി ഇപ്പോള്‍ ചിത്രീകരിച്ചുകൊണ്ടിരിക്കുന്നത്. പ്രഭാസ് നായകനാകുന്ന ഏറ്റവും പുതിയ ചിത്രം 'പ്രൊജക്റ്റ് കെ'യിലും അമിതാഭ് ബച്ചൻ ഒരു പ്രധാന വേഷത്തില്‍ എത്തുന്നുണ്ട്.