'യാത്രയ്ക്കപ്പുറം'; വീണ്ടും എഴുത്തുകാരിയുടെ റോളില്‍ ഗായത്രി അരുൺ

കേരള ലിറ്ററേച്ചർ ഫെസ്റ്റിവലിൽ വെച്ചായിരുന്നു പുസ്തക പ്രകാശനം

സിനിമ, സീരിയൽ അഭിനയത്തോടൊപ്പം അവതരണവും പുസ്തകമെഴുത്തും വ്ലോഗിങ്ങും ബിസിനസുമെല്ലാം ഒരുമിച്ച് കൊണ്ടുപോകുന്ന താരമാണ് ഗായത്രി അരുൺ. 'അച്ചപ്പം കഥകൾ' എന്ന ആദ്യപുസ്തകത്തിനു പിന്നാലെ ഇപ്പോൾ ഗായത്രിയുടെ രണ്ടാമത്തെ പുസ്തകവും പ്രകാശനം ചെയ്യപ്പെട്ടിരിക്കുകയാണ്. 'യാത്രയ്ക്കപ്പുറം' എന്നാണ് ഗായത്രിയുടെ പുതിയ പുസ്തകത്തിന്റെ പേര്.

കോഴിക്കോടു വെച്ചു നടന്ന കേരളാ ലിറ്ററേച്ചർ ഫെസ്റ്റിവലിൽ വെച്ചായിരുന്നു പുസ്തക പ്രകാശനം. ഡിസി ബുക്ക്സ് ആണ് പ്രസാധകർ. യൂട്യൂബർ ബൈജു എൻ നായർ മോഡറേറ്റർ ആയി, ഷെഫ് പിള്ളയോടൊപ്പം നടന്ന സെഷനിൽ വെച്ചായിരുന്നു ഗായത്രിയുടെ പുസ്തകത്തിന്റെ പ്രകാശനകർമം നിർവഹിക്കപ്പെട്ടത്.

കുടുംബത്തോടൊപ്പവും സുഹൃത്തുക്കളോടൊപ്പവും ഒറ്റക്കും ഗായത്രി നടത്തിയ യാത്രാ ഓർമകളിലൂടെയുള്ള ഒരു സഞ്ചാരമാണ് 'യാത്രയ്ക്കപ്പുറം'. ''ഈ പുസ്തകം ഒരു യാത്രാവിവരണമാണോ ഓർമക്കുറിപ്പാണോ എന്നു ചോദിച്ചാൽ രണ്ടും ചേർന്നതാണ് എന്നു തന്നെ പറയാം'', എന്നാണ് ഗായത്രി പുസ്തകത്തിൽ കുറിച്ചിരിക്കുന്നത്. ''അച്ഛപ്പം കഥകൾക്ക് ശേഷം മറ്റൊരു പുസ്തകരചനയെ കുറിച്ച് ചിന്തിച്ചിരുന്നില്ല, ഡിസി ബുക്സിൽ നിന്നും എഡിറ്റർ ദീപ്തിയുടെ കോൾ വരുന്നത് വരെ. ‘യാത്രകളെ കുറിച്ച് ഒരു പുസ്തകം എഴുതാമോ?’ അങ്ങനെ എഴുതിത്തുടങ്ങിയ എന്റെ രണ്ടാമത്തെ പുസ്തകമാണ് യാത്രകൾക്കപ്പുറം'', എന്നും ഗായത്രി ഇൻസ്റ്റഗ്രാമിൽ കുറിച്ചു.

സ്വന്തമായി ഒരു നെയിൽ ആർട്ട് സ്റ്റുഡിയോയും ഗായത്രി അടുത്തിടെ ആരംഭിച്ചിരുന്നു. സ്വന്തം നാടായ ചേർത്തലയിൽ തന്നെയാണ് സ്റ്റുഡിയോയുടെ പ്രവർത്തനം.  ബിസിനസ് ഒരിക്കലും തനിക്ക് വഴങ്ങില്ല എന്നു കരുതിയിരുന്നതാണെന്നും വളരെ പെട്ടെന്നെടുത്ത ഒരു തീരുമാനമായിരുന്നു പുതിയ സംരംഭത്തിന് പിന്നിലെന്നും ഗായത്രി പറഞ്ഞിരുന്നു. ഗായത്രിയുടെ ഭർത്താവും ഒരു ബിസിനസ്മാനാണ്.

ഏഷ്യാനെറ്റ് ന്യൂസ് ലൈവ് കാണാം