ഇന്‍സ്റ്റഗ്രാമില്‍ തരംഗമായി കോലിയുടെ ഹണിമൂണ്‍ സെല്‍ഫി

വിവാഹ ചടങ്ങുകള്‍ പൂര്‍ത്തിയാക്കി കുടുംബാംഗങ്ങളെല്ലാം തിരിച്ചെത്തിയ ചിത്രങ്ങള്‍ പ്രചരിക്കുമ്പോള്‍ ആരാധകര്‍ തിരഞ്ഞത് എവിടെ അനുഷ്‌കയും വിരാടുമെന്നാണ്. അതിന് മറുപടിയെന്നോണം അനുഷ്‌കയുടെ ഇന്‍സ്റ്റഗ്രാമില്‍ ചിത്രമെത്തി. ഇരുവരും ഹണിമൂണ്‍ ആഘോഷിക്കുന്നതിന്റെ സെല്‍ഫി നിമിഷങ്ങള്‍കൊണ്ടാണ് വൈറലായത്. 

ഇരുവരും എവിടെയാണെന്ന് വ്യക്തമായി അറിയില്ലെങ്കിലും യൂറോപ്പിലെ വിന്റര്‍ വണ്ടര്‍ലാന്റുകളിലെവിടെയെങ്കിലുമാകുമെന്നാണ് ആരാധകരുടെ കണക്കുകൂട്ടല്‍. ആദ്യ 20 മിനുട്ടില്‍ 2 ലക്ഷം പേരാണ് ചിത്രത്തിന് ലൈക്ക് ചെയ്തത്. ഇരുവരെയും ആശംസിച്ചുകതൊണ്ടുള്ള കമ്മന്റുകളുടെ പ്രവാഹമാണ് ചിത്ത്രിന് താഴെ. 

ഇറ്റലിയിലെ മിലാനില്‍ വച്ചാണ് ഡിസംബര്‍ 11ന് ഇരുവരും വിവാഹിതരായത്.  നടന്ന വിവാഹത്തില്‍ ഇരുവരുടേയും അടുത്ത ബന്ധുക്കളും സുഹൃത്തുകളും മാത്രമാണ് പങ്കെടുത്തത്. ഇന്ത്യ-ശ്രീലങ്ക ഏകദിന പരമ്പരയില്‍ നിന്നൊഴിഞ്ഞ് വിരാടും സിനിമാഷൂട്ടിംഗിന് അവധി നല്‍കി അനുഷ്‌കയും തിരക്കുകളില്‍ നിന്നു മാറി നിന്നപ്പോള്‍ തന്നെ ഇരുവരുടേയും വിവാഹം ഉടനുണ്ടെന്ന രീതിയില്‍ അഭ്യൂഹങ്ങള്‍ ശക്തമായിരുന്നു.

എന്നാല്‍ ഇക്കാര്യത്തില്‍ കൃത്യമായ ഒരു സ്ഥിരീകരണം കോലിയോ അനുഷ്‌കയോ ഇവരുമായി ബന്ധപ്പെട്ടവരോ നല്‍കിയിരുന്നില്ല. ഒടുവില്‍ തിങ്കളാഴ്ച്ച രാത്രി ഒന്‍പത് മണിയോടെ ഇരുവരും ട്വിറ്ററിലൂടെ വിവാഹചിത്രം പങ്കുവച്ചപ്പോള്‍  ആണ് സസ്‌പെന്‍സിന് അവസാനമായത്. 

വിവാഹചടങ്ങുകള്‍ മിലാനില്‍ വച്ചാണ് നടന്നതെങ്കിലും സിനിമ-ക്രിക്കറ്റ് ലോകത്തെ സുഹൃത്തുകള്‍ക്കായി മുംബൈയില്‍ വധൂവരന്‍മാര്‍ ചേര്‍ന്ന് ഗംഭീരവിരുന്നൊരുക്കുന്നുണ്ട്. 2013ലാണ് ഇന്ത്യയുടെ ബാറ്റിംഗ് വിസ്മയം കോലിയും ബോളിവുഡ് സുന്ദരി അനുഷ്‌കയും തമ്മില്‍ പ്രണയം മൊട്ടിടുന്നത്. ഇടക്കാലത്ത് ഇരുവരും തമ്മില്‍ അകന്നതായി വാര്‍ത്തകളുണ്ടായിരുന്നുവെങ്കിലും ഇരുവരും ബന്ധം തുടര്‍ന്നു.