14 ദിവസം, കണ്ടത് 17,000ലധികം പേർ ! നേടിയത് 105 ദശലക്ഷം യെൻ; ജപ്പാനിൽ 'പുഷ്പ 2' തരംഗം

സുകുമാർ സംവിധാനം ചെയ്ത അല്ലു അർജുൻ ചിത്രം 'പുഷ്പ 2: ദ റൂൾ' ജപ്പാനിൽ മികച്ച വിജയം നേടുന്നു. ദൈർഘ്യമേറിയ സിനിമകൾക്ക് മുൻഗണന നൽകാത്ത ജാപ്പനീസ് വിപണിയിലെ ഈ സ്വീകാര്യത, അല്ലു അർജുന്റെ വർധിച്ചുവരുന്ന ആഗോള സ്വാധീനത്തെയാണ് വ്യക്തമാക്കുന്നത്.

ഇന്ത്യയിൽ ചരിത്രം കുറിച്ച അല്ലു അർജുന്‍റെ 'പുഷ്പ 2: ദ റൂൾ' ജപ്പാനിലും തരംഗമാകുന്നു. റിലീസ് ചെയ്ത് വെറും 14 ദിവസത്തിനുള്ളിൽ 6.1 കോടി രൂപ (105 ദശലക്ഷം യെൻ) ജപ്പാൻ ബോക്സ് ഓഫീസിൽ നിന്ന് ചിത്രം സ്വന്തമാക്കി. ഏകദേശം 17,000ത്തിലധികം ആളുകളാണ് രണ്ടാഴ്ചയ്ക്കുള്ളിൽ ജാപ്പനീസ് തിയേറ്ററുകളിൽ സിനിമ കാണാനെത്തിയത്.

ലോകത്തിലെ തന്നെ ഏറ്റവും സെലക്ടീവായ സിനിമാ വിപണികളിലൊന്നായ ജപ്പാൻ, അല്ലു അർജുനെ ഇരുകൈയ്യും നീട്ടിയാണ് സ്വീകരിച്ചിരിക്കുന്നത് എന്നാണ് ഇത് സൂചിപ്പിക്കുന്നത്. സാധാരണയായി ദൈർഘ്യം കുറഞ്ഞ സിനിമകൾക്ക് മുൻഗണന നൽകുന്ന ജാപ്പനീസ് പ്രേക്ഷകർ, 3 മണിക്കൂർ 40 മിനിറ്റ് നീളമുള്ള ഈ ബ്രഹ്മാണ്ഡ ചിത്രത്തെ നെഞ്ചിലേറ്റിയത് താരത്തിന്‍റെ ആഗോള സ്വാധീനത്തെയാണ് വ്യക്തമാക്കുന്നത്.

കഴിഞ്ഞ കുറച്ച് വർഷങ്ങളായി ഇന്ത്യൻ സിനിമയുടെ സാംസ്കാരിക അംബാസഡറായി അല്ലു അർജുൻ മാറിക്കൊണ്ടിരിക്കുകയാണ്. സുകുമാർ സംവിധാനം ചെയ്ത 'പുഷ്പ 2'വിലൂടെ ഭാഷയുടെയും സംസ്കാരത്തിന്‍റേയും അതിർവരമ്പുകൾ ഭേദിച്ച് ജപ്പാനിലെ മുഖ്യധാര സിനിമാ ചർച്ചകളിൽ ഇടംപിടിക്കാൻ അദ്ദേഹത്തിന് സാധിച്ചു.

ജാപ്പനീസ് വിപണിയിൽ സിനിമകൾക്ക് ദീർഘകാലം തിയേറ്ററുകളിൽ ഓടാനുള്ള ശേഷിയുള്ളതിനാൽ വരും ദിവസങ്ങളിലും കളക്ഷനിൽ വലിയ വർദ്ധനവുണ്ടാകുമെന്നാണ് ട്രേഡ് അനലിസ്റ്റുകളുടെ വിലയിരുത്തൽ. ഈ നേട്ടം അല്ലു അർജുന്‍റെ വരാനിരിക്കുന്ന ആഗോള പ്രോജക്റ്റുകൾക്കും വലിയ ഊർജ്ജമാകും എന്നാണ് കണക്ക് കൂട്ടുന്നത്.

ഇന്ത്യന്‍ സിനിമയില്‍ കഴിഞ്ഞ വര്‍ഷം ഏറ്റവും കാത്തിരിപ്പ് ഉയര്‍ത്തി എത്തിയ ചിത്രമായിരുന്നു പുഷ്പ 2 ദി റൂള്‍. 2021 ല്‍ പുറത്തെത്തിയ പുഷ്പ 2 ദി റൈസ് നല്‍കിയ വമ്പന്‍ ജനപ്രീതിയും വിജയവും തന്നെയായിരുന്നു പ്രേക്ഷകരുടെ ഈ പ്രതീക്ഷയ്ക്ക് കാരണം. പുഷ്പ 2 തിയറ്ററുകളിലെത്തിയപ്പോള്‍ ഉത്തരേന്ത്യന്‍ പ്രേക്ഷകരാണ് കൂടുതല്‍ ആവേശകരമായ വരവേല്‍പ്പ് നല്‍കിയത്. രശ്മിക മന്ദാന നായികയായ ചിത്രത്തില്‍ ഫഹദ് ആണ് മറ്റൊരു പ്രധാന കഥാപാത്രത്തെ അവതരിപ്പിച്ചിരിക്കുന്നത്. ദേവി ശ്രീ പ്രസാദാണ് ചിത്രത്തിന്‍റെ സംഗീതം. മൈത്രീ മൂവിമേക്കേര്‍സാണ് നിര്‍മ്മാണം.