കേരളത്തില് 'കാന്താര 1' ന് കാത്തിരിപ്പുണ്ടോ? അഡ്വാന്സ് ബുക്കിംഗിന്റെ ആദ്യ മണിക്കൂറുകളില് നേടിയത്
Synopsis
ഒക്ടോബർ 2-ന് റിലീസ് ചെയ്യുന്ന കാന്താര ചാപ്റ്റർ 1 ന്റെ അഡ്വാൻസ് ബുക്കിംഗിന് മികച്ച പ്രതികരണമാണ് ലഭിക്കുന്നത്.
ഇന്ത്യന് സിനിമയില് സമീപകാലത്ത് കാന്താര ചാപ്റ്റര് 1 നോളം കാത്തിരിപ്പ് ഉയര്ത്തിയിരിക്കുന്ന ഒരു ചിത്രം അപൂര്വ്വമാണ്. 2022 ല് പുറത്തെത്തിയ കാന്താര ആദ്യ ഭാഗം നേടിയ അഭൂതപൂര്വ്വമായ വിജയം തന്നെയാണ് കാണികള്ക്കിടയില് പാന് ഇന്ത്യന് തലത്തില് ഈ കാത്തിരിപ്പ് സൃഷ്ടിച്ചിരിക്കുന്നത്. കെജിഎഫിന് ശേഷം കന്നഡ സിനിമയ്ക്ക് ഭാഷാതീതമായി റീച്ച് ഉണ്ടാക്കിക്കൊടുത്ത ചിത്രമായിരുന്നു കാന്താര. ഒക്ടോബര് 2 നാണ് കാന്താര ചാപ്റ്റര് 1 ലോകമെമ്പാടുമുള്ള തിയറ്ററുകളില് എത്താന് ഒരുങ്ങുന്നത്. ചിത്രത്തിന്റെ അഡ്വാന്സ് ബുക്കിംഗ് ആരംഭിച്ചത് ഇന്നലെ ആയിരുന്നു. ഇപ്പോഴിതാ അഡ്വാന്സ് ബുക്കിംഗിലൂടെ നേടിയ ആദ്യ കളക്ഷന് സംബന്ധിച്ച റിപ്പോര്ട്ടുകള് പുറത്തെത്തിയിരിക്കുകയാണ്.
പ്രമുഖ ട്രാക്കര്മാരായ സാക്നില്കിന്റെ കണക്ക് പ്രകാരം ചിത്രം ഇന്ത്യയില് നിന്ന് ആദ്യ ദിനം അഡ്വാന്സ് ബിക്കിംഗിലൂടെ നേടിയ കളക്ഷന് 4.77 കോടിയാണ്. ബ്ലോക്ക് സീറ്റുകള് കൂട്ടാതെയുള്ള കണക്കാണ് ഇത്. ബ്ലോക്ക് സീറ്റുകള് ചേര്ത്ത് ചിത്രം ഇന്ത്യയില് നിന്ന് അഡ്വാന്സ് ബുക്കിംഗിന്റെ ആദ്യ ദിനം നേടിയിരിക്കുന്നത് 8.11 കോടിയുമാണ്. കേരളത്തിലും മികച്ച പ്രതികരണമാണ് അഡ്വാന്സ് ബുക്കിംഗിലൂടെ ലഭിക്കുന്നത്.
കേരളത്തിലെ ട്രാക്കര്മാര് ഇന്നലെ വൈകുന്നേരം പുറത്തുവിട്ട കണക്കുകള് പ്രകാരം ചിത്രം ആദ്യ മണിക്കൂറുകളില് കേരളത്തില് നിന്ന് നേടിയിട്ടുള്ളത് 60- 70 ലക്ഷമാണ്. പ്രധാന സെന്ററുകളിലെ പ്രമുഖ തിയറ്ററുകളിലൊക്കെ ചിത്രത്തിന് ഇതിനകം നിരവധി ഫാസ്റ്റ് ഫില്ലിംഗ് ഷോകളും ലഭിച്ചിട്ടുണ്ട്. റിലീസിന് മൂന്ന് ദിനം കൂടി അവശേഷിക്കുന്നതിനാല് അഡ്വാന്സ് ബുക്കിംഗിലൂടെത്തന്നെ ചിത്രം ഇനിയുമേറെ മുന്നോട്ട് പോകാന് സാധ്യതയുണ്ട്. ആദ്യ ഷോയിലെ ആദ്യ പ്രതികരണങ്ങള് പോസിറ്റീവ് ആകുന്നപക്ഷം വലിയ ഹിറ്റിലേക്കാവും ചിത്രം കുതിക്കുക. അത്തരത്തില് ഒരു പോസിറ്റീവ് മൗത്ത് പബ്ലിസിറ്റിക്കുവേണ്ടിയാണ് കന്നഡ സിനിമാലോകം കാത്തിരിക്കുന്നതും.
പൃഥ്വിരാജ് പ്രൊഡക്ഷന്സ് ആണ് ചിത്രം കേരളത്തില് വിതരണം ചെയ്യുന്നത്. കന്നഡത്തിലെ പ്രമുഖ ബാനര് ആയ ഹൊംബാലെ ഫിലിംസ് ആണ് ചിത്രം നിര്മ്മിക്കുന്നത്. കന്നഡ, ഹിന്ദി, തെലുങ്ക്, തമിഴ്, മലയാളം, ഇംഗ്ലീഷ്, ബംഗാളി ഭാഷകളിലാണ് ആഗോള റിലീസ് ആയി ചിത്രം ഒക്ടോബര് 2 ന് എത്തുന്നത്. മൂന്ന് വർഷത്തെ ഷൂട്ടിംഗ് പൂർത്തിയാക്കിയാണ് ചിത്രം തിയറ്ററുകളിലേക്ക് എത്തുന്നത്.