റെക്കോര്‍ഡുകള്‍ ഒന്നല്ല, മൂന്ന്; അംഗീകാര നിറവില്‍ ഗിന്നസ് പക്രു

റെക്കോര്‍ഡ് തിളക്കത്തില്‍ പക്രു

കൊച്ചി: അത്ഭുത ദ്വീപിലൂടെ ഏറ്റവും ഉയരം കുറഞ്ഞ സിനിമാ നായകനെന്ന ഗിന്നസ് ബുക്ക് ഓഫ് വേള്‍ഡ് റെക്കോര്‍ഡ്സ് സ്വന്തമാക്കിയ അജയ് കുമാര്‍ എന്ന ഗിന്നസ് പക്രുവിന് വീണ്ടും റെക്കോര്‍ഡ് തിളക്കം. ഏറ്റവും ഉയരം കുറഞ്ഞ സിനിമാ സംവിധായകനുള്ള മൂന്ന് സംഘടനകളുടെ റെക്കോർഡ് സര്‍ട്ടിഫിക്കറ്റുകളാണ് താരം ഒരു ദിവസം തന്നെ ഏറ്റുവാങ്ങിയത്.   2013ൽ പുറത്തിറങ്ങിയ കുട്ടീം കോലും എന്ന ചിത്രം സംവിധാനം ചെയ്തതോടെയാണ് പക്രു ഈ നേട്ടത്തിന് അര്‍ഹനായത്. 

യൂണിവേഴ്‌സൽ റെക്കോർഡ്‌സ് ഫോറം , ലിംക ബുക്ക് ഓഫ് റെക്കോർഡ്, ബെസ്റ്റ് ഓഫ് ഇന്ത്യ റെക്കോർഡ് ബുക്കുകളിലും സ്വന്തം പേര് എഴുതിച്ചേർത്ത പക്രു മൂന്ന് സര്‍ട്ടിഫിക്കറ്റുകളും കഴിഞ്ഞ ദിവസം എറണാകുളം പ്രസ് ക്ലബ്ബിൽ നടന്ന ചടങ്ങിൽ ഏറ്റുവാങ്ങി. യൂണിവേഴ്‌സൽ റെക്കോർഡ്‌സ് ഫോറത്തിന്റെ ചീഫ് എഡിറ്ററും ഏഷ്യൻ ജൂറിയുമായ ഡോ. ഗിന്നസ് സുനിൽ ജോസഫ്, കലാമണ്ഡലം ഹേമലത, ബെസ്റ്റ് ഓഫ് ഇന്ത്യ റെക്കോർഡ് പ്രതിനിധി ടോളി എന്നിവരില്‍നിന്നാണ് പക്രു സര്‍ട്ടിഫിക്കറ്റുകള്‍ ഏറ്റുവാങ്ങിയത്.  

ശാരീരിക വൈകല്യങ്ങളിൽ തളച്ചിടാതെ ജീവിതത്തിൽ മുന്നേറുവാനുള്ള പ്രചോദനമായി തന്റെ നേട്ടം മാറുമെന്നാണ് കരുതുന്നതെന്ന്  ചടങ്ങില്‍ ഗിന്നസ് പക്രു പറഞ്ഞു. മേല്‍വിലാസം, അപ്പോത്തിക്കിരി എന്നീ ചിത്രങ്ങളുടെ സംവിധായകനായ മാധവ് രാംധാസിന്‍റെ ഇളയരാജ എന്ന ചിത്രത്തിലൂടെ വീണ്ടും നായകനാകാന്‍ ഒരുങ്ങുകയാണ്  പക്രു. തൃശ്ശൂരില്‍ ഏപ്രില്‍ 27നാണ് സിനിമയുടെ ചിത്രീകരണം ആരംഭിക്കുന്നത്.