ശ്രീകാന്തിനെ ഹോട്ടലിൽ ചെന്ന് കണ്ട് സച്ചി- ചെമ്പനീർ പൂവ് സീരിയൽ റിവ്യൂ

ഏഷ്യാനെറ്റിൽ സംപ്രേഷണം ചെയ്യുന്ന ചെമ്പനീർ പൂവ് സീരിയൽ റിവ്യൂ 

കഥ ഇതുവരെ 

ശ്രീകാന്തും വർഷയും വീട്ടിൽ ഇല്ലാത്ത വിഷമത്തിലാണ് ചന്ദ്രയും രവിയും. അവർ മാത്രമല്ല സച്ചിയും രേവതിയും അവർ വീട്ടിൽ നിന്ന് പോയ വിഷമത്തിലാണ്. അതേസമയം ഈ വിഷയത്തിൽ എങ്ങനെ കുത്തിത്തിരുപ്പ് ഉണ്ടാക്കാം എന്ന ആലോചനയിലാണ് ശ്രുതി. അതേസമയം വർഷയെ കണ്ട് നടന്ന സംഭവങ്ങളെല്ലാം തുറന്ന് പറയാൻ തീരുമാനിച്ചിരിക്കുകയാണ് രേവതി. ഏഷ്യാനെറ്റിൽ  സംപ്രേഷണം ചെയ്യുന്ന ചെമ്പനീർപൂവ് സീരിയൽ റിവ്യൂ നോക്കാം.

വർഷ സ്റ്റുഡിയോയിൽ ഡബ്ബിങ്ങിൽ ആയിരുന്നു. രേവതി വർഷയെ കാണാൻ നേരെ സ്റ്റുഡിയോയിലേക്കാണ് പോയത്. രേവതിയെ കണ്ട ഉടനെ വർഷ അവിടെ നിന്ന് പോകാൻ ഒരുങ്ങി. സച്ചിയേട്ടൻ തന്റെ അച്ഛനെ അടിച്ചത് തെറ്റായിപ്പോയെന്നും, അതുകൊണ്ടാണ് വീട്ടിലേയ്ക്ക് വരാത്തതെന്നും വർഷ രേവതിയോട് പറഞ്ഞു. എന്നാൽ വർഷ അറിയാത്ത പല കാര്യങ്ങളുമുണ്ടെന്നും എന്തുകൊണ്ടാണ് സച്ചിയേട്ടൻ വർഷയുടെ അച്ഛനെ അടിച്ചതെന്നും രേവതി അവളോട് പറഞ്ഞുകൊടുത്തു. തന്നെ കള്ളി എന്ന് വിളിച്ചതും, മോഷണം ചെയ്താണ് ജീവിക്കുന്നതെന്ന് പറഞ്ഞതും, താൻ മോഷ്ടിച്ച് കൊണ്ടുകൊടുത്ത പണത്തിനാണ് സച്ചിയേട്ടൻ മദ്യപിക്കുന്നതെന്ന് പറഞ്ഞതും, ഒടുവിൽ പിച്ചയെടുത്ത് ജീവിക്കാൻ പറഞ്ഞതുമുൾപ്പടെ വർഷയുടെ അച്ഛൻ പറഞ്ഞ സകല കാര്യവും രേവതി വർഷയോട് പറഞ്ഞു. സത്യത്തിൽ വർഷ അത് കേട്ട് ഞെട്ടി. ഇങ്ങനെയൊക്കെയാണ് സംഭവിച്ചതെന്ന് വർഷ അറിഞ്ഞിരുന്നില്ല. കരഞ്ഞ് തളർന്ന് നിൽക്കുന്ന രേവതിയോട് എന്ത് മറുപടി പറയുമെന്നറിയാതെ വിഷമിച്ച് നിൽക്കുകയാണ് വർഷ. എന്തായാലും ശെരിയാണെന്ന് തോന്നുന്നത് ചെയ്യാൻ പറഞ്ഞ് രേവതി വീട്ടിലേയ്ക്ക് പോയി. 

അതേസമയം ശ്രീകാന്തിനെ കാണാൻ ഹോട്ടലിൽ എത്തിയിരിക്കുകയാണ് സച്ചി. ശ്രീകാന്ത് വർഷയോടൊപ്പം അവളുടെ വീട്ടിലാണ് നിൽക്കുന്നത് എന്നാണ് സച്ചി കരുതിയത്. പക്ഷെ ഹോട്ടലിൽ വർക്ക് ഏരിയയിലെ ഒരു കുടുസു മുറിയിലാണ് ശ്രീകാന്ത് താമസിക്കുന്നതെന്ന് കേട്ടപ്പോൾ സച്ചിയ്ക്ക് കണ്ണ് നിറഞ്ഞുപോയി. അവനോട് എല്ലാം മറന്ന് വീട്ടിലേയ്ക്ക് വരാൻ സച്ചി പറഞ്ഞു. എന്നാൽ വർഷയ്ക്ക് താൻ ഒറ്റയ്ക്ക് ചന്ദ്രോദയത്തിലേയ്ക്ക് വന്നാൽ വിഷമമാകും എന്നും അതുകൊണ്ട് അവളുടെ ദേഷ്യം മാറിയ ശേഷം ഒന്നിച്ച് വരാമെന്നും ശ്രീകാന്ത് സച്ചിയോട് പറഞ്ഞു . ശ്രീകാന്തിനോട് തിരിച്ച് എന്ത് മറുപടി പറയണമെന്നറിയാതെ നിൽക്കുന്ന സച്ചിയേ കാണിച്ചുകൊണ്ടാണ് ഇന്നത്തെ എപ്പിസോഡ് അവസാനിക്കുന്നത്. സംഭവബഹുലമായ കഥകളുമായി ചെമ്പനീർപൂവ് ഇനി അടുത്ത ദിവസം കാണാം.