മോഹന്‍ലാലിന്റെ മഹാഭാരതത്തില്‍ കര്‍ണനായി എത്തുന്നത് നാഗാര്‍ജുന

ആയിരം കോടി മുടക്കി ചിത്രീകരിക്കുന്ന മഹാഭാരതം സിനിമയെക്കുറിച്ച് കൂടുതല്‍ വിവരങ്ങള്‍ പുറത്തുവരുന്നു. മോഹന്‍ലാല്‍ ഭീമനായി അഭിനയിക്കുന്ന ചിത്രത്തില്‍ കര്‍ണനായി വേഷമിടുന്നത്, തെന്നിന്ത്യയിലെ സൂപ്പര്‍താരം നാഗാര്‍ജുനയാണ്. എം ടി വാസുദേവന്‍ നായരുടെ വിഖ്യാതമായ രണ്ടാമൂഴം എന്ന നോവലിനെ അടിസ്ഥാനമാക്കിയാണ് മഹാഭാരതം എന്ന പേരില്‍ സിനിമയാകാന്‍ പോകുന്നത്. 2018 സെപ്റ്റംബറില്‍ ചിത്രീകരണം ആരംഭിക്കുന്ന മഹാഭാരതം 2020ഓടെ തിയറ്ററുകളിലെത്തിക്കാനാണ് പദ്ധതിയിടുന്നത്. മലയാളത്തിന് പുറമെ ഇംഗ്ലീഷ്, ഹിന്ദി, തമിഴ്, തെലുങ്ക്, കന്നഡ ഭാഷകളിലും ഈ ചിത്രം പ്രദര്‍ശനത്തിനെത്തും.

കര്‍ണനായി അഭിനയിക്കാനുള്ള ക്ഷണം മറ്റൊന്നും ആലോചിക്കാതെ തന്നെ സ്വീകരിക്കുകയായിരുന്നുവെന്ന് നാഗാര്‍ജുന ഇന്ത്യന്‍ എക്‌സ്‌പ്രസിനോട് പറഞ്ഞു. കാര്യങ്ങളൊക്കെ ശരിയായവിധം പോകുകയാണെങ്കില്‍ മോഹന്‍ലാലും നാഗാര്‍ജുനയും ഒരുമിക്കുന്ന ആദ്യ സിനിമയായിരിക്കും ഇത്. നേരത്തെ മോഹന്‍ലാല്‍ ചിത്രമായ നരസിംഹത്തിന്റെ തെലുങ്ക് റീമേക്കായിരുന്ന അധിപതിയില്‍ നായകനായി അഭിനയിച്ചത് നാഗാര്‍ജുനയായിരുന്നു. 2001ലാണ് ഈ ചിത്രം പ്രദര്‍ശനത്തിനെത്തിയത്.